Gubat ken Panaglalaban—Kasano nga Agpatingga?

PUKAWENTO TI DIOS DAGITI GOBIERNO TI TAO

Pagpatinggaento ti Dios dagiti gobierno ti tao babaen ti aw-awagan ti Biblia a gubat ti Armagedon.a (Apocalipsis 16:16) Iti dayta a tiempo, maurnongto ‘dagiti ari iti intero a daga’ para iti “gubat ti naindaklan nga aldaw ti Dios a Mannakabalin-amin.” (Apocalipsis 16:14) Ti gubat ti Armagedon ti usaren ti Dios a mangpasardeng iti amin a gubat.

Sukatanto ti Dios dagiti gobierno ti tao iti gobiernona, wenno iti Pagarianna. Dayta a Pagarian ket agturturayen idiay langit ken saanto a pulos madadael. (Daniel 2:44) Pinili ti Dios ti Anakna a ni Jesu-Kristo nga agbalin nga Ari. (Isaias 9:​6, 7; Mateo 28:18) Dayta a gobierno ket isu ti Pagarianb nga insuro ni Jesus nga ikararag dagiti pasurotna. (Mateo 6:​9, 10) Gapu ta maymaysanton ti gobierno iti intero a lubong a ni Jesus ti Agturay, agkaykaysanton ti amin a tattao.

Us-usaren dagiti tattao ti autoridadda para iti bukodda a pagsayaatan. Ngem saan a kasta ni Jesus ta patas ken saan a mangidumduma. Aniaman ti itsuram, pagiliam, wenno dimmakkelam, saankanto a madanagan a baka mabaybay-anka wenno saan a nasayaat ti pannakatratom. (Isaias 11:​3, 4) Saanto metten nga ilaban dagiti tattao dagiti kalinteganda. Apay? Gapu ta interesado ni Jesus iti pagimbagan ti tunggal tao. “Ispalennanto dagiti napanglaw nga agpatpatulong, agraman dagiti marigrigat ken ti asinoman nga awan katulonganna. . . . Isalakannanto ida iti pannakairurumen ken iti kinaranggas.”—Salmo 72:​12-14.

Ikkatento ti Pagarian ti Dios ti amin nga armas ditoy daga. (Mikias 4:3) Dadaelennanto met dagiti dakes a tattao nga agtultuloy a makilaban ken mangdangran iti padada a tao. (Salmo 37:​9, 10) Sadinoman ti papananto dagiti tattao ditoy daga, lalaki man wenno babai, ken uray dagiti ubbing, natalgeddanto amin.—Ezekiel 34:28.

Inton agturay ti gobierno ti Dios ditoy daga, nakasaysayaatton ti biag dagiti tattao. Mapukawton dagiti problema a pakaigapuan ti panaglalaban, kas iti kinarigat ti biag, bisin, ken kinaawan balay ti adu a tattao. Makapanganton ti amin a tao kadagiti nasustansia a makan, ken addaandanton iti napintas a balay.—Salmo 72:16; Isaias 65:​21-23.

Iti panagturay ti Pagarian ti Dios, awanton dagiti dakes nga epekto ti gubat. Maawanton dagiti sugat ken uray dagiti nasaem a kapadasan ken rikrikna a nangparigat kadagiti tattao. Ken agbiagto manen dagiti natay ditoy daga. (Isaias 25:8; 26:19; 35:​5, 6) Agkakaduanto manen dagiti agkakapamilia ken saandanton a malagip dagiti nasaem a kapadasanda gapu iti gubat, ta “dagiti dati a bambanag ket limmabasen.”—Apocalipsis 21:4.

PUKAWENTO TI DIOS TI BASOL

Pagkaykaysaento ti Pagarian ti Dios dagiti tattao nga agdayaw iti maymaysa ken pudno a Dios a ni Jehovac, “ti Dios ti ayat ken ti talna.” (2 Corinto 13:11) Masursuronto dagiti tattao ti agbalin a mannakikappia. (Isaias 2:​3, 4; 11:9) Dagidiay agtulnog iti Dios saandanton a maapektaran kadagiti epekto ti basol.—Roma 8:​20, 21.

PUKAWENTO TI DIOS NI SATANAS KEN DAGITI DEMONIONA

Dadaelento ti Pagarian ti Dios dagiti promotor iti gubat a ni Satanas ken dagiti demoniona. (Apocalipsis 20:​1-3, 10) No awanen ti impluensiada, ‘agsaknapton ti talna.’—Salmo 72:7.

Makapagtalekka a pumayso ti kari ti Dios a pagpatinggaenna ti gubat ken naranggas a panaglalaban. Kayana ken kayatna a pagpatinggaen dagita.

• Gapu ta masirib ken mannakabalin ti Dios, kayana a pagpatinggaen ti gubat ken panaglalaban. (Job 9:4) Awan ti imposible kenkuana.—Job 42:2.

• Saan a kayat ti Dios a makita dagiti tattao nga agrigrigat. (Isaias 63:9) “Kagurana [met] ti asinoman a mangay-ayat iti kinaranggas.”—Salmo 11:5.

• Kanayon a tungpalen ti Dios ti saona, ken saan nga agulbod.—Isaias 55:​10, 11; Tito 1:2.