Gubat ken Panaglalaban—Apay nga Agtultuloy?
Ibaga ti Biblia no apay nga adda gubat ken naranggas a panaglalaban ken no apay nga agtultuloy dagita.
BASOL
Pinarsua ti Dios dagiti umuna a nagannaktayo a da Adan ken Eva sigun iti ladawanna. (Genesis 1:27) Kayatna a sawen, kayada nga ipakita dagiti kualidad ti Dios a kas iti talna ken ayat. (1 Corinto 14:33; 1 Juan 4:8) Ngem nagsukir da Adan ken Eva iti Dios ket nagbasolda. Dayta ti gapuna a natawidtayo amin ti basol ken ipapatay. (Roma 5:12) Gapu iti natawidtayo a basol, adda tendensiatayo nga agpanunot ken agaramid iti dakes.—Genesis 6:5; Marcos 7:21, 22.
GOBIERNO TI TAO
Saannatayo a pinarsua ti Dios tapno iturayan ti bagitayo. Kuna ti Biblia: “Saan a naikkan ti tao iti autoridad a mangiturong uray iti addangna.” (Jeremias 10:23) Dayta ti gapuna a saan a naan-anay a maikkat ti gobierno ti tao ti gubat ken kinaranggas.
NI SATANAS KEN DAGITI DEMONIONA
Ibaga ti Biblia a “ti intero a lubong ket adda iti pannakabalin daydiay managdakdakes.” (1 Juan 5:19) Dayta a “managdakdakes” ket ni Satanas a Diablo. Maysa isuna a mammapatay. (Juan 8:44) Im-impluensiaan ni Satanas ken dagiti demoniona dagiti tattao a mangirugi iti gubat ken agbalin a naranggas.—Apocalipsis 12:9, 12.
Saantayo a kabaelan nga ikkaten dagiti makagapu nga adda gubat ken kinaranggas, ngem kabaelan dayta ti Dios.