Nakasursurokami iti Naindaklan nga Instruktortayo iti Intero a Panagbiagmi

TI ULIDAN DAGITI NAGANNAKKO

Taga-Italy dagiti nagannakko. Ngem idi 1957, immakarda iti Kindersley, Saskatchewan, Canada. Di nagbayag kalpasanna, naammuanda ti kinapudno, ket daytan ti nagbalin a kapatgan iti biagmi. Malaglagipko idi ubingak, idi agtawenak pay laeng iti walo. Adu nga oras a mangaskasabakami a sangapamiliaan. Isu nga iyang-angawko no kua, “auxiliary pioneer-akon”!

Saan a nabaknang dagiti nagannakko. Ngem nagsayaatda nga ulidan iti panagsakripisio para ken Jehova. Kas pagarigan, idi 1963, inlakoda ti adu a gamitda tapno makaurnongda iti kuarta. Iti kasta, maatenderanmi ti internasional a kombension idiay Pasadena, California, U.S.A. Idi 1972, immakarkami iti Trail, British Columbia, Canada nga agarup 1,000 a kilometro (agarup 620 mi) tapno tumulong a mangasaba kadagiti Italiano iti dayta a lugar. Janitor ni tatangko ngem saanna nga inawat dagiti gundaway a mai-promote tapno ad-adu ti tiempona nga agserbi ken Jehova.

Agyamyamanak iti ulidan dagiti nagannakko kadakami nga uppat nga agkakabsat. Ti ulidanda ti nagbalin a nalagda a pundasion ti pannakasanayko nga agserbi ken Jehova. Insuroda met ti banag a diakto pulos malipatan: No sapulek nga umuna ti Pagarian, aywanannak ni Jehova.—Mat. 6:33.

TI PANANGRUGI TI AMIN-TIEMPO A PANAGSERBIK

Idi 1980, inkasarko ti napintas ken naregta a sister a ni Debbie. Kayatmi ti agpayunir, isu a tallo a bulan kalpasan ti kasarmi, nangrugin nga agpayunir ni Debbie. Idi makatawenmin nga agassawa, immakarkami iti bassit a kongregasion ket nangrugiak metten nga agpayunir.

Idi agangay, naupaykami ket kayatmin ti pumanaw. Ngem nakisaritakami nga umuna iti manangaywan iti sirkito. Siaayat ngem sipaprangka nga imbagana kadakami: “No aramidenyo dayta, lallalo a marigatankayo. Ngamin, dagiti negatibo ti sangkapanunotyo. Ngem no agpokuskayo iti positibo, sumayaatto ti panangmatmatyo iti bambanag.” Dayta a balakad ti eksakto a kasapulanmi. (Sal. 141:5) Dagus nga inyaplikarmi dayta. Di nagbayag, nakitami nga adu gayam a positibo a banag ti dimi makitkita. Adda dagiti kakongregasionmi ti kayatda nga ad-adu pay ti maaramidanda para ken Jehova, kas koma dagiti agtutubo ken uray dagidiay saan pay a Saksi ti assawada. Nakapatpateg dayta a nasursuromi. Masapul nga agpokuskami iti positibo ken agtalekkami a tulongannakami ni Jehova nga agibtur agingga a solbarenna ti maysa a narigat a situasion a pakaipaspasanguanmi. (Mik. 7:7) Gapu iti dayta, rimmagsakkami manen ken simmayaaten ti bambanag.

Dagiti instruktormi iti immuna a panageskuelami kas payunir ket nagserbi idi kadagiti sabali a pagilian. Ket nagipabuyada kadagiti piktiur ken inyestoriada dagiti rigat a napasaranda. Inyestoriada met dagiti bendision a naawatda. Gapu iti dayta, nariing ti tarigagaymi nga agserbi kas misionero isu a pinagbalinmi dayta a kalat.

Tapno maragpatmi dayta a kalat, immakarkami iti Quebec a French ti pagsasaona idi 1984. Nasurok a 4,000 a kilometro (2,485 mi) ti kaadayo dayta iti British Columbia, isu a masapul a sursuruenmi ti baro a kultura ken lengguahe sadiay. Ti sabali pay a problemami ket masansan a bassit ti makukuartami. Adda idi tiempo a puro patatas ti kankanenmi. Impalubos ti maysa a mannalon nga agpidutkami kadagiti nabatbati a patatas iti bangkagna. Nagadu ti naimbento ni Debbie a luto ti patatas! Uray adda dagiti rigat, inkagumaanmi ti nagibtur isu a naragsakkami latta. Nakitami met a saannakami a binaybay-an ni Jehova.—Sal. 64:10.

Maysa nga aldaw, adda di ninamnama a tawagmi iti telepono. Aw-awisendakami nga agserbi iti Bethel iti Canada. Ngem sakbay dayta, nagaplaykamin nga ageskuela iti Gilead. Naragsakankami met ketdi iti dayta nga awis ngem medio nalidayankami. Nupay kasta, inawatmi ti awis nga agserbikami iti Bethel. Idi simmangpetkamin, insaludsodmi ken Brother Kenneth Little, a miembro ti Komite ti Sangay, “Kasano ngayen no maawiskami iti Gilead?” Insungbatna, “Asikasuentayto dayta no maawiskayo.”

Makalawas kalpasanna, naawiskami ken Debbie nga ageskuela iti Gilead. Isu a masapul nga agdesisionkami. Imbaga kadakami ni Brother Little: “Aniaman ti desisionyo, addanto dagiti aldaw a baka mapanunotyo a nag-Bethelite-kayo latta koman wenno nag-Gilead-kayo. Ngem agpada a nasayaat dagita a pribilehio ta aniaman kadagita ket bendisionan ni Jehova.” Inawatmi ti awis nga ageskuelakami iti Gilead. Iti panaglabas dagiti tawen, napaneknekanmi nga agpayso ti imbalakad ni Brother Little. Masansan nga ibagbagami dagiti imbalakadna kadagidiay masapul nga agdesision no ania ti pilienda nga asaynment.

TI BIAGMI KAS MISIONERO

Nakaragragsakkami ta karamankami kadagiti 24 nga estudiante ti maika-83 a klase ti Gilead. Naangay dayta idiay Brooklyn, New York, idi Abril 1987. Da Brother Ulysses Glass ken Jack Redford ti kangrunaan nga instruktormi. Nagbiit a limmabas ti lima a bulan ket naggraduarkami idi Septiembre 6, 1987. Naibaonkami iti Haiti. Kaduami da John ken Marie Goode.

Awanen ti naibaon a misionero iti Haiti sipud idi napaawid ti kaudian kadakuada idi 1962. Tallo a lawas kalpasan a naggraduarkami, nangrugikamin nga agserbi iti Haiti iti bassit a kongregasion a buklen ti 35 nga agibumbunannag iti tengnga ti kabambantayan. Ubbingkami pay idi ken awan pay unay ti kapadasanmi. Dakdakami laeng iti pagtaengan dagiti misionero. Marigrigat unay dagiti tattao sadiay ken kaaduan kadakuada ket saan a makabasa. Idi karugrugimi kas misionero, napadasanmi ti gerra sibil, kudeta, panagpuor kadagiti barikada, ken adu a bagyo.

Adu ti nasursuromi kadagiti mannakibagay ken naragsak a kakabsat iti Haiti. Narigat ti biag ti adu kadakuada. Ngem ay-ayatenda ni Jehova ken naregtada iti ministerio. Maysa a baket a sister ti saan a makabasa. Ngem kabesadona ti agarup 150 a teksto. Ti inaldaw a makitkitami a kasasaad sadiay ti mangpabpabileg iti determinasionmi a mangitultuloy a mangikasaba iti mensahe ti Pagarian—ti kakaisuna a solusion ti amin a problema dagiti tattao. Maragragsakankami a makakita a dagiti immun-una nga inyad-adalanmi iti Biblia ket agserserbin kas regular pioneer, special pioneer, ken panglakayen.

Bayat nga addakami iti Haiti, naam-ammok ni Trevor a maysa a misionero dagiti Mormon. Namin-adu a napagsaritaanmi ti Biblia. Tawtawen kalpasanna, diak ninamnama a sinuratannak. Imbagana: “Agbautisarakon inton umay nga asamblea! Kayatkonto ti agsubli iti Haiti ken agserbi kas special pioneer iti lugar a nagserbiak kas misionero dagiti Mormon.” Kasta ti inaramidna iti adu a tawen a kaduana ni baketna.

EUROPE—KALPASANNA AFRICA

Naibaonkami nga agserbi iti maysa a lugar iti Europe a sadiay nga in-inuten a napalubosan ti trabahotayo. Idi 1992, simmangpetkami idiay Ljubljana, Slovenia. Asideg dayta iti dimmakkelan dagiti nagannakko sakbay nga immakarda idiay Italy. Madama pay la idi ti gubat kadagiti lugar ti dati a Yugoslavia. Ti sangay iti Vienna, Austria, agraman dagiti opisina iti Zagreb, Croatia, ken Belgrade, Serbia, ti mangas-asikaso iti trabahotayo iti dayta a rehion. Ngem nayurnos nga addanton maaramid a pasilidad ti Bethel kadagita a lugar.

Kaipapanan dayta a masapul a sursuruenmi ti sabali manen a lengguahe ken kultura. Sangkaibaga dagiti lumugar ti, “Jezik je težek,” a kaipapananna “Narigat ti lengguahemi.” Ket talaga a narigat! Bilibkami iti kinamatalek dagiti kakabsat a situtulok a nangawat iti aniaman a panagbalbaliw nga inaramid ti organisasion, ken nakitami no kasano a bembendisionan ida ni Jehova. Napaneknekanmi manen a kanayon nga ilinteg ni Jehova dagiti bambanag iti naayat a pamay-an ken iti umiso a tiempo. Nakaad-adu ti nasursuromi bayat ti kaaddami idiay Slovenia. Nakaad-adu met ti nasursuromi sakbaykami a napan a nakatulong kadakami a mangibtur kadagiti pakasuotan sadiay.

Ngem adu pay a panagbalbaliw ti naipasango kadakami. Idi 2000, naibaonkami idiay Côte d’Ivoire, iti West Africa. Sa idi Nobiembre 2002, gapu iti gerra sibil, nagbakuitkami idiay Sierra Leone. Kalkalpas la idi ti 11 a tawen a gerra sibil sadiay. Nagrigat ti dagus a pumanaw iti Côte d’Ivoire. Ngem dagiti nasursuromi iti napalabas ti nakatulong kadakami tapno agtultuloykami latta a naragsak.

Impamaysami ti biagmi iti nabunga a ministerio ken kadagiti nadungngo a kakabsat sadiay a nagibtur iti adu a tawen gapu iti gubat. Narigat ti panagbiagda. Ngem kayatda nga iranud ti adda kadakuada. Adda maysa a sister a nangted ken Debbie kadagiti bado. Idi saan a kayat ni Debbie nga awaten, impapilit ti sister. Imbagana: “Bayat ti gubat, dagiti kakabsat iti dadduma a pagilian ti timmulong kadakami. Dakami met itan a, ti tumulong.” Inkagumaanmi a tuladen ti ulidanda.

Idi agangay, nagsublikami iti Côte d’Ivoire. Ngem gapu kadagiti problema ti politika, adda manen dagiti panaggugubat. Isu nga idi Nobiembre 2004, nagbakuitkami babaen ti helikopter. Ti laeng mabalinmi nga itugot ket saggaysakami a bag a ti kadagsenna ket 10 a kilo (22-lb). Naturogkami iti suelo ti maysa a base militar ti France iti maysa a rabii. Kabigatanna, napankami idiay Switzerland. Idi nakadanonkamin iti sangay iti agarup tengnga ti rabii, sibabara a pinasangbaydakami ti Branch Committee ken dagiti instruktor ti Ministerial Training School agraman dagiti assawada. Inarakupdakami, pinakandakami kadagiti kalluto a makan, ken inikkandakami iti nagadu a Swiss chocolate. Nariknami ti nabara nga ayatda.

Temporario a naibaonkami idiay Ghana, sa nagsublikami idiay Côte d’Ivoire idi kimmalman ti situasion sadiay. Gapu iti kinaimbag dagiti kakabsat, naibturanmi dagiti makapaistres a situasion gapu iti panagbakuit ken kadagiti temporario nga asaynmentmi. Nupay ti kasta a nainkabsatan nga ayat ket gagangay iti organisasion ni Jehova, nagsaritaanmi ken Debbie a dimi pulos tagilag-anen dayta no di ket kanayon ketdi nga apresiarenmi. Ngamin, dagita a narigat a kasasaad ket nagdakkel ti naitulongna iti pannakasanaymi.

NAPANKAMI IDIAY MIDDLE EAST

Idi 2006, adda naawatmi a surat manipud iti sangalubongan a hedkuarter maipapan iti baro nga asaynmentmi iti Middle East. Kaipapanan dayta a maipasangokami manen iti baro a situasion, rigat, agsursurokami iti baro a lengguahe, ken makibagay iti sabali a kultura. Nagadu ti masapul a sursuruenmi ta nagadu ti problema iti politika ken relihion iti dayta a lugar. Magustuanmi ta uray no agduduma ti lengguahe dagiti kakabsat kadagiti kongregasion, adda latta panagkaykaysa gapu ta sursurotenda amin dagiti instruksion ti organisasion. Maparparegtakami kadagiti kakabsat ta uray no kaaduan kadakuada ket busbusoren dagiti kapamilia, kaeskuelaan, katrabahuan, ken kaarrubada, situturedda latta nga agib-ibtur.

Inatenderanmi ti espesial a kombension idi 2012 idiay Tel Aviv, Israel. Dayta a kombension ti kaunaan nga inangay dagiti Saksi ni Jehova iti dayta a nasion sipud idi Pentecostes 33 C.E. Anian a nakallalagip nga okasion!

Bayat kadagita a tiempo, naibaonkami a bumisita iti maysa a pagilian a maiparparit ti trabahotayo. Adda dagiti intugotmi a publikasiontayo. Nakiramankami iti panangasaba ken inatenderanmi dagiti babbabassit nga asamblea. Sadinoman ti papananmi, adda dagiti armado a soldado ken checkpoint. Ngem natalged ti riknami bayat a nagan-annadkami a nagbiahe a kadua ti sumagmamano a kakabsat.

PANAGSUBLI ITI AFRICA

Idi 2013, adda naidumduma nga asaynment a naawatmi. Nagserbikami iti sangay iti Kinshasa, Congo. Nagdakkel dayta a pagilian ken nakapimpintas. Ngem nagadu latta ti marigrigat ken masansan ti panaglalaban sadiay. Idi damo, imbagami, “Kabesadomin ti Africa; nakasaganakamin a mapan.” Ngem nakaad-adu latta gayam ti masapul a sursuruenmi, lalo no maipapan iti panagbiahe kadagiti lugar nga awan pay kalsada ken rangtayna. Ngem nakaad-adu dagiti positibo a banag a naapresiarmi. Karaman dita ti panagibtur ken kinaragsak dagiti kakabsat uray no marigrigatda. Ipatpategda met ti ministerio ken ikagkagumaanda ti makigimong ken makiasamblea. Nakitami a mismo no kasano a rumangrang-ay ti trabaho ti Pagarian gapu laeng iti tulong ken pamendision ni Jehova. Adu ti nasursuromi bayat ti panagserbimi iti Congo a diminto malipatan. Immadu met dagiti gagayyemmi nga ibilbilangmi a kapamiliami.

Idi ngudo ti 2017, adda manen sabali nga asaynmentmi—iti South Africa. Dayta pay laeng ti kadakkelan a sangay a nagserbianmi. Barbaro met kadakami dagiti asaynmentmi iti Bethel. Adu manen dagiti baro a sursuruenmi. Ngem nakatulong dagiti nasursuromi iti napalabas. Ipatpategmi ti adu a kakabsat a dinekdekadan nga agib-ibtur. Makaparagsak met a makita ti pamilia ti Bethel nga agkaykaysa nga agtrabtrabaho uray no agduduma ti puli ken kulturada. Nalawag a bembendisionan ni Jehova ti ilina iti talna bayat nga ikagkagumaanda nga isuot ti baro a personalidad ken iyaplikar dagiti prinsipio ti Biblia.

Iti panaglabas dagiti tawen, adu nga asaynment ti naawatmi ken Debbie. Nakibagaykami iti nagduduma a kultura ken adu a baro a lengguahe ti sinursuromi. Saan a kanayon a nalaka dayta. Ngem kanayon a nariknami ti napudno nga ayat ni Jehova babaen ti organisasionna ken dagiti kakabsat. (Sal. 144:2) Kombinsidokami a ti adu a nasursuromi bayat ti panagserbimi iti amin-tiempo ti nakatulong tapno agbalinkami a nasaysayaat nga adipen ni Jehova.

Ap-apresiarek ti panangpadakkel kaniak dagiti nagannakko, ti suporta ti ipatpategko nga asawa a ni Debbie, ken ti nagsayaat nga ulidan ti naespirituan a pamiliatayo iti intero a lubong. Bayat a pampanunotenmi ken baketko ti sumaruno a kapitulo ti biagmi, determinadokami nga agtultuloy nga agpaisuro iti Naindaklan nga Instruktortayo.