“Ni Jehova ti Mangikeddeng no Asino ti Mangabak iti Gubat”

Nangrugi ti isyu idi maudi a paset ti 1990’s. Imbaga ti gobierno ti France a masapul a mabuisan dagiti donasion a naawat ti sangaytayo iti France manipud idi 1993 agingga 1996. Saan a nainkalintegan dayta! Gapu iti dayta, nangyulitayo kadagiti kaso kadagiti korte ti France, ngem naabaktayo. Saan met a napatgan ti panagapelartayo iti Court of Appeals. Innala ti gobierno ti nagyan ti bank account ti sangay a nasurok nga uppat ket kagudua a milion a euro ($6,300,000 U.S.). Ti laeng pangnamnamaantayo idin tapno mapasubli dayta ket ti ECHR. Ngem sakbay a mabista ti kaso, imbilin ti ECHR a masapul a makimitingkami kadagiti abogado ti gobierno ti France a kadua ti pannakabagi ti European Court tapno makita no posible nga aginnareglokami laengen.

Ekspektarenmi idi a pilitennakami ti pannakabagi ti ECHR a bayadanmi laengen iti gobierno ti France ti mapagsasabtanmi a gatad. Ngem nalawag kadakami nga uray maysa la a euro ti itedmi, adda prinsipio ti Biblia a masalungasingmi. Donasion ngamin dayta dagiti kakabsat a para kadagiti interes ti Pagarian isu a saan a mabalin nga alaen dayta ti gobierno. (Mat. 22:21) Ngem nakimitingkami latta tapno ipakitami ti respetomi iti paglintegan ti korte.

Nagmimitingkami iti maysa kadagiti napintas a conference room ti Korte. Saan a nasayaat ti rugi dayta a miting. Dagus nga imbaga ti pannakabagi ti ECHR a masapul nga ited dagiti Saksi ni Jehova iti France ti uray mano pay laeng iti buis a kidkiddawen ti gobierno. Ngem tinignaynakami ti espiritu ni Jehova a mangisaludsod kenkuana, “Ammoyo kadi nga innalan ti gobierno ti nasurok nga uppat ket kagudua a milion a euro iti bank account-mi?”

Madlaw a nakigtot. Idi inamin dagiti abogado ti gobierno a kasta a talaga ti inaramidda, simmabalin ti reaksionna. Inungtanna ida ken dagus nga impasardengna ti miting. Talaga a nakitak no kasano a binaliktad ni Jehova ti desision iti pamay-an a dimi man la pulos napanunot. Permi ti ragsakmi a pimmanaw iti korte ta kasla imposible ti napasamak.

Idi Hunio 30, 2011, nagkaykaysa ti amin a hues ti ECHR iti desisionda a pabor kadatayo. Winaswasda ti buis ken imbilinda iti gobierno nga isublida ti innalada a kuartatayo agraman interesna! Dayta a nagpateg a desision ti korte ti mangprotprotektar pay laeng agingga ita iti pudno a panagdaydayawtayo idiay France. Dayta a saludsod a saan man la a karaman kadagiti insaganami ket kas iti bato a limmumlom iti ulo ni Goliat. Dayta ti arigna namagpatingga iti gubat ta nalpasen ti kaso. Apay a nangabaktayo? Gapu ta kas iti imbaga ni David ken Goliat, “ni Jehova ti mangikeddeng no asino ti mangabak iti gubat.”—1 Sam. 17:​45-47.

Saan la a dayta ti gundaway a nangabaktayo kadagiti kaso iti korte. Uray no idaddadanesdatayo dagiti nabileg a gobierno ken relihion, addan 1,225 a nangabakantayo a kaso kadagiti Korte Suprema iti 70 a pagilian ken iti nadumaduma nga internasional a korte. Gapu kadagita a panangabaktayo kadagiti korte, maprotprotektaran dagiti kangrunaan a kalintegantayo, kas iti kalintegantayo a mabigbig kas maysa a legal a relihion, mangasaba iti publiko, agkedked a makiraman kadagiti nasionalistiko a seremonia, ken agpayalison iti dara.

Apay a karamanak kadagiti tumultulong kadagiti kaso iti Europe idinto ta agserserbiak iti Sangalubongan a Hedkuarter dagiti Saksi ni Jehova iti New York, U.S.A.?

PINADAKKELDAK DAGITI NAREGTA A NAGANNAKKO

Dagiti nagannakko a da George ken Lucille ket naggraduar iti maika-12 a klase ti Gilead. Agserserbida kas misionero idiay Ethiopia idi nayanakak idi 1956. Pinanaganandak iti Philip. Innalada dayta iti nagan ni Felipe nga ebanghelisador idi umuna a siglo. (Ara. 21:8) Adda pay dua a kakabsatko—ni manang Judy ken ti adingmi a ni Leslie a nayanak met idiay Ethiopia. Idi 1957, imparit ti gobierno ti trabahotayo. Uray ubingak pay la idi, malagipko no kasanokami a naggigimong ken nangasaba a didakami matiliwan. Gapu ta ubingak pay la idi, awan ti dadanagak! Ngem makapaladingit ta pinapanawnakami ti gobierno iti Ethiopia idi 1960.

Immakarkami a sangapamiliaan idiay Wichita, Kansas, U.S.A. Ngem saan a pulos a bimmaaw ti regta dagiti nagannakko iti ministerio uray no saandan a misionero. Impategda ti kinapudno ken insuroda kadakami nga annakda nga ayatenmi ni Jehova ken agserbikami kenkuana iti amin a puso. Nabautisaranak idi 13 ti tawenko. Tallo a tawen kalpasanna, immakarkami a sangapamiliaan iti lugar a dakdakkel ti panagkasapulanna idiay Arequipa, Peru.

Idi 1974, idi agtawenak iti 18, imbaonnak ti sangay ti Peru agraman ti uppat pay a brother nga agserbi kas special pioneer. Mangasabakami kadagiti di pay naas-asak a teritoria iti kabambantayan ti Central Andes. Karaman kadagiti kasabaanmi dagiti komunidad dagiti katutubo a Quechua ken Aymara. Ti us-usarenmi nga agbiahe ket ti maysa a trak nga inawaganmi iti The Ark gapu ta kasla dayta iti daong. Daytan ti nagbalin a pannakabalaymi. Maragragsakanak no malaglagipko dagiti tiempo nga inusarmi ti Biblia a mangipakita kadagiti katutubo a dandanin ikkaten ni Jehova ti kinarigat ti biag, sakit, ken ipapatay. (Apoc. 21:​3, 4) Adu ti immawat iti kinapudno.

PANAGSERBI ITI SANGALUBONGAN A HEDKUARTER

Idi 1977, bimmisita idiay Peru ni Albert Schroeder a miembro ti Bagi a Manarawidwid dagiti Saksi ni Jehova. Pinaregtanak nga agaplay iti Bethel iti sangalubongan a hedkuarter ket inaramidko dayta. Di nagbayag kalpasanna, idi Hunio 17, 1977, nangrugiakon nga agserbi iti Brooklyn Bethel. Iti simmaruno nga uppat a tawen, nagtrabahoak kadagiti departamento a Cleaning ken Maintenance.

Idi Hunio 1978, naam-ammok ni Elizabeth Avallone iti maysa nga internasional a kombension idiay New Orleans, Louisiana. Kas met la kaniak a pinadakkel dagiti naregta a nagannakna. Idi naam-ammok isuna, uppat a tawenen a regular pioneer ken kayatna nga itultuloy ti agserbi iti amin-tiempo iti intero a panagbiagna. Intultuloymi ti nagin-innammo. Di nagbayag, natnag ti riknami iti maysa ken maysa ket nagkasarkami idi Oktubre 20, 1979. Kalpasanna, nagserbikami iti Bethel kas agassawa.

Nakaay-ayat kadakami dagiti kakabsat iti umuna a kongregasionmi, ti Brooklyn Spanish. Iti panaglabas ti tiempo, nayakarkami iti tallo pay a kongregasion. Nakaay-ayatda kadakami ken pinaregtadakami nga agtultuloy nga agserbi iti Bethel. Maap-apresiarmi unay ti suportada kadakami ken ti panangtulong kadakami dagiti gagayyem ken kapamiliami a mangaywan kadagiti nagannakmi idi nataengandan.

PANAGSERBI ITI LEGAL DEPARTMENT

Nakigtotak ta idi Enero 1982, nayakarak iti Legal Department iti Bethel. Tallo a tawen kalpasanna, pinageskueladak iti unibersidad tapno agbalinak nga abogado. Bayat ti panageskuelak, naragsakanak ta inadalmi a gapu kadagiti kaso nga impangabak dagiti Saksi ni Jehova, matagtagiragsak dagiti umili ti United States ken ti dadduma a pagilian dagiti kangrunaan a kalinteganda a tagtagilag-anen laeng ti kaaduan a tattao. Dagita a kaso ket inadalmi a naimbag iti klasemi.

Idi 1986, nagbalinak nga overseer ti Legal Department. Trenta la ti tawenko idi. Permi ti ragsakko ta nagdakkel ti naitalek kaniak uray no ubingak pay. Ngem ammok a narigat dayta a trabaho ta adu pay ti saanko nga ammo.

Nagbalinak nga abogado idi 1988. Ngem diak naamiris ti dakes nga epekto kaniak ti panageskuelak ken iti relasionko ken Jehova. Gapu iti nangato nga edukasion, posible nga agbalin nga ambisioso ti maysa ken mariknana a natantan-ok isuna ngem kadagiti saan a nakagun-od iti kasta nga edukasion. Imbag laengen ta adda ni Elizabeth. Tinulongannak a mangaramid manen kadagiti banag a mangpatibker iti espiritualidadko. In-inut a simminged manen ti relasionko ken Jehova. Napaneknekak a saan a ti kaadu ti ammo ti maysa ti kapatgan iti biag. Ti talaga a kapatgan iti biag ket ti nasinged a relasion ken Jehova ken ti nauneg a panagayat kenkuana ken iti ilina.

PANANGIDEPENSA KEN PANAGREGGET A GUMUN-OD ITI LEGAL A KALINTEGAN A MANGIKASABA ITI NAIMBAG A DAMAG

Idi nalpasakon nga ageskuela, nakapagpokusakon a tumulong iti Legal Department. Tumultulong ti departamentomi a mangasikaso kadagiti banag a konektado iti linteg ken iti panangprotektar iti organisasion ni Jehova ken iti kalintegantayo a mangikasaba iti naimbag a damag. Nakaragragsakak iti trabahok ngem adda met dagiti karit. Ngamin, nagpartak dagiti panagbalbaliw iti organisasiontayo. Kas pagarigan, agkidkiddawtayo idi iti kontribusion para kadagiti publikasiontayo. Ngem manipud idi 1990, nakiddaw iti Legal Department a tumulong iti pannakaaramid ti instruksion no kasano a maisardeng dayta nga urnos. Kalpasan dayta, libren dagiti publikasion nga iwarwarastayo. Gapu iti dayta, napasimple ti trabaho iti Bethel ken kadagiti kongregasion. Maprotprotektaran met dagiti aktibidadtayo iti di nainkalintegan a panagbuis. Impagarup idi ti dadduma a gapu iti dayta a panagbalbaliw, bumassit ti pondo ket marigatantayo a mangitultuloy iti ministeriotayo. Ngem saan a kasta ti napasamak. Manipud idi 1990, nasurok a doble ti immaduan dagiti agserserbi ken Jehova. Ket ita, makaalan dagiti tattao kadagiti libre ken makaispal biag a naespirituan a taraon. Nakitak a mismo nga agballigi laeng dagiti dadakkel a panagbalbaliw iti organisasion iti tulong ni Jehova ken iti panangiwanwan ti matalek nga adipen.—Ex. 15:2; Mat. 24:45.

Gapu laeng kadi ta nalalaing dagiti abogadotayo isu a mangab-abaktayo kadagiti kasotayo iti korte? Saan! Masansan a ti rason a pabor kadatayo ti desision dagiti hues ken opisial ti gobierno ket gapu iti nasayaat a kababalintayo. Napaneknekak dayta idi immatender ti tallo a miembro ti Bagi a Manarawidwid ken ti assawada kadagiti espesial a kombension idiay Cuba idi 1998. Inlawlawagmi kadagiti opisial ti gobierno a neutraltayo iti politika. Ngem ti ad-adda a nakakombinsiranda ket ti nasingpet ken nadayaw a kababalin dagita a kakabsat.

Ngem no dadduma, masapul a mapantayo iti korte tapno ‘idepensatayo ken pagreggetantayo ti gumun-od iti legal a kalintegan a mangikasaba iti naimbag a damag.’ (Fil. 1:7) Kas pagarigan, adu a tawen a saan a binigbig dagiti opisial ti gobierno iti Europe ken South Korea ti kalintegantayo nga agkedked nga agsoldado. Gapu iti dayta, agarup 18,000 a kakabsat iti Europe ken nasurok a 19,000 a kakabsat iti South Korea ti naibalud. Ngamin, saanda a kayat ti agsoldado gapu ta saan a maawat dayta ti konsiensiada.

Makaparagsak ta idi Hulio 7, 2011, impaulog ti ECHR ti nakallalagip a desisionna iti kaso a Bayatyan v. Armenia. Imbilinna iti amin a pagilian iti Europe nga ipalubosda a mangaramid iti alternatibo a panagserbi dagiti sibilian, imbes nga agsoldadoda gapu ta saan a maawat dayta ti konsiensiada. Kasta met laeng ti desision ti South Korean Constitutional Court idi Hunio 28, 2018. Saantayo koma a nagballigi kadagita a kaso no adda sumagmamano nga agtutubo a kakabsat a nagkompromiso.

Ar-aramiden ti Legal Deparment iti hedkuarter ken kadagiti adda kadagiti sangay iti intero a lubong ti amin a kabaelanda a mangidepensa kadagiti interes ti Pagarian. Ibilangmi a maysa a pribilehio ti agserbi kas pannakabagi dagiti kakabsat nga idaddadanes dagiti gobierno. Mangabaktayo man wenno saan kadagiti korte, ti kasotayo ket agresulta iti panangsaksi kadagiti gobernador ken ar-ari ken kadagiti nasion. (Mat. 10:18) Masapul nga usigen dagiti hues, pannakabagi ti gobierno, ti media, ken dagiti tattao dagiti teksto nga iramramantayo kadagiti dokumento ken kadagiti ibagbagatayo nga argumento iti korte. Maammuan dagiti nasingpet a tattao no asino dagiti Saksi ni Jehova ken talaga a naibatay iti Biblia dagiti patpatientayo. Gapu iti dayta, nagbalin a kapammatiantayo ti dadduma kadakuada.

PAGYAMANAN, JEHOVA!

Iti napalabas a 40 a tawen, naaddaanak iti pribilehio a makitinnulong iti nadumaduma a sangay iti intero a lubong para kadagiti kasoda, sumango iti nadumaduma a korte, ken kadagiti nangato nga opisial ti gobierno. Ipatpategko ken ap-apresiarek dagiti katrabahuak iti Legal Department ditoy man sangalubongan a hedkuarter ken kadagiti sangay. Nakaragragsak ken makapnek unay ti biagko.

Napudno ken nadungngo ni baketko nga Elizabeth. Iti napalabas a 45 a tawen, kanayon a sinuportarannak, iti man nasayaat ken narigat a tiempo. Bilibak ken baketko ta maar-aramidanna dayta uray adda sakitna a mangpakpakapuy iti immune system-na ken mangpakpakapsut kenkuana.

Napaneknekanmi a mismo a ti panagballigitayo ket saan a gapu iti bukodtayo a pigsa ken abilidad. Kas imbaga ni David, “ni Jehova ti mangpapigsa kadagiti tattaona.” (Sal. 28:8) Talaga a “ni Jehova ti mangikeddeng no asino ti mangabak iti gubat.”