No Kasanom a Mapasayaat Dagiti Kararagmo

1-2. (a) No agkarkararagtayo, ania ti mabalin a manglapped kadatayo a mangyebkas ken Jehova iti talaga a marikriknatayo? (b) Kasanotayo nga ammo a talaga a dengdenggen ni Jehova dagiti kararagtayo?

MARIKNAM kadi a no dadduma ket maulit-ulit, kasla naikabesa, wenno nagbalin laengen a rutina ti kararagmo? No wen, saan la a sika ti kasta. Gapu ta busy-tayo no dadduma, mabalin nga adda tendensiatayo nga agapura no agkarkararagtayo. Mabalin pay ketdi a marigatantayo a mangibaga ken Jehova iti linaon ti pusotayo. Ngamin, panagriknatayo ket saantayo a maikari nga umasideg kenkuana.

² Isursuro ti Biblia a ti napateg ken Jehova ket dagiti naimpusuan a kararag, saan a dagiti detalyado wenno napintas ti pannakayebkasna a kararag. Dengdenggenna “ti kiddaw dagiti naemma.” (Sal. 10:17) Dengdenggenna ti amin nga ibagbagatayo gapu ta talaga a maseknan kadatayo.—Sal. 139:​1-3.

3. Ania dagiti saludsod nga usigentayo iti daytoy nga artikulo?

³ Mabalin nga isaludsodtayo: Apay a saantayo koma a bumdeng nga agkararag ken Jehova? Kasanotayo nga agkararag tapno ad-adda a sumingedtayo ken Jehova? Kasano a makatulong dagiti naimpusuan a kararag a naisurat iti Biblia tapno mapasayaattayo dagiti kararagtayo? Ania ti mabalintayo nga aramiden no marigatantayo a mangibaga ken Jehova iti linaon ti pusotayo? Kitaentayo ti sungbat kadagitoy a saludsod.

SAANKA A BUMDENG NGA AGKARARAG KEN JEHOVA

4. Ania ti makatulong tapno saantayo a bumdeng nga agkararag ken Jehova? (Salmo 119:145)

⁴ Ni Jehova ket napudno a gayyem ken kayatna nga agballigitayo. No kombinsidotayo iti dayta, saantayo a bumdeng nga agkararag kenkuana. Kasta ti narikna ti nangisurat iti Salmo 119. No agkarkararag idi ken Jehova, ibilbilangna kas nasinged a gayyemna. Agpayso nga adda dagiti problemana. Napadasanna ti napadpadakes. (Sal. 119:​23, 69, 78) Naupay met gapu iti kinaimperpektona. (Sal. 119:5) Nupay kasta, naimpusuan latta a nagkararag ken Jehova.—Basaen ti Salmo 119:145.

5. Apay a saantayo koma nga ipalubos a dagiti negatibo a rikna ti manglapped kadatayo nga agkararag? Mangted iti pagarigan.

⁵ Aw-awisen ni Jehova nga agkararag kenkuana uray dagiti nakaaramid iti nadagsen a basol. (Isa. 55:​6, 7) Ditay ngarud koma ipalubos a dagiti negatibo a rikna ti manglapped kadatayo nga agkararag. Kas pagarigan, ammo ti piloto ti eroplano a no kasapulanna ti tulong, mabalinna latta ti makikomunikar kadagiti air traffic controller (dagiti mangkonkontrol iti trapiko iti tangatang). Bumdeng kadi a makisarita kadakuada gapu laeng ta mabain a nayaw-awan wenno nagkamali? Siempre, saan! Kasta met laeng kadatayo. No saantayo nga ammo ti aramidentayo wenno no nakaaramidtayo pay ketdi iti basol, saantayo koma a bumdeng nga agkararag ken Jehova.—Sal. 119:​25, 176.

NO KASANOTAYO NGA AGKARARAG TAPNO AD-ADDA A SUMINGEDTAYO KEN JEHOVA

6-7. Ania ti maitulong ti panangpanunottayo kadagiti kualidad ni Jehova tapno ad-adda a sumingedtayo kenkuana no agkararagtayo? Mangted iti pagarigan. (Kitaen met ti footnote.)

⁶ Lallalo a sumingedtayo ken Jehova no ibagatayo ti amin a marikrikna ken pampanunotentayo. Ania ngarud ti makatulong tapno mapasayaattayo dagiti kararagtayo?

⁷ Panunotem dagiti kualidad ni Jehova.a No ad-adda a pampanunotentayo dagiti kualidadna, nalaklakatayo nga ibaga ti amin a marikrikna ken mapampanunottayo. (Sal. 145:​8, 9, 18) Kitaentayo ti kapadasan ti sister a ni Kristine a naranggas ti tatangna. Imbagana: “Gapu ta kasta ni tatangko, marigatanak idi nga agkararag ken Jehova ken mangibilang kenkuana kas nadungngo nga Ama. Panagriknak ngamin ket panawannakto met laeng gapu ta kanayon nga agkamaliak.” Ania a kualidad ni Jehova ti nakatulong kenkuana? Innayonna: “Kanayon a pinampanunotko ti napudno nga ayat ni Jehova. Gapu iti dayta, mariknak a natalgedak. Ammok a kanayonto latta a kibinennak. Uray no matuangak, siaayat a bangonennak. Kanayon a pampanunotek a dungdungnguennak ni Jehova isu a naglakak laeng a maibaga kenkuana ti amin a mangparparagsak ken mangpalpaliday kaniak.”

8-9. Ania dagiti pagsayaatanna no panunotem nga umuna ti ibagam sakbayka nga agkararag? Mangted iti pagarigan.

⁸ Panunotem ti ibagam. Sakbayka nga agkararag, mabalinmo nga isaludsod dagitoy iti bagim: ‘Ania nga espesipiko a problema ti pakaipaspasanguak ita? Adda kadi asinoman a masapul a pakawanek? Adda kadi situasion nga ita la a mapadasak a kasapulak unay ti tulong ni Jehova?’ (2 Ar. 19:​15-19) Laglagipem met ti insuro ni Jesus nga ikararagtayo tapno mairamanmo iti kararagmo ti maipapan iti nagan ni Jehova, ti Pagarianna, ken ti pagayatanna.—Mat. 6:​9, 10.

⁹ Naammuan ti sister a ni Aliska nga adda nakaro a kanser iti utek ni lakayna ken dandanin matay. Gapu iti dayta, narigatan ni Aliska nga agkararag. Imbagana: “Permi a maburiboran ken madanaganak ken diak payen ammo ti ikararagko.” Ania ti nakatulong kenkuana? Inyestoriana: “Sakbay nga agkararagak, panunotek nga umuna no ania ti ibagak. Nakatulong dayta tapno saan la a maipapan iti bagik ti ikararagko. No ar-aramidek dayta, mas kalmado ti riknak ken adu pay ketdin ti mainayonko nga ikararag ken Jehova.”

10. Apay a saantayo koma nga agdardaras nga agkararag? (Kitaen met dagiti ladawan.)

¹⁰ Saanka nga agdardaras nga agkararag. Siempre, sumingedtayo latta ken Jehova uray ababa ti kararagtayo. Ngem ad-adda a mayebkastayo ti rikrikna ken pampanunotentayo no napapaut ken saantayo nga agdardaras nga agkararag.b Imbaga ni Elijah nga asawa ni Aliska: “Ikagkagumaak ti napapaut ken mamin-adu nga agkararag ken Jehova iti agmalem, ken saanak nga agdardaras. Kas resultana, mariknak a nasingsingedak ken Jehova. Saan a matuokan ni Jehova a mangdengngeg kadagiti kararagko, isu nga apay koma nga agdardarasak?” Padasem daytoy: Panunotem no ania nga oras ken no sadino ti kasayaatan a pagkararagam iti napapaut ken saanka a masinga. Baka mabalinmo pay ketdi a pigsaan ti kararagmo. No kanayon a kasta ti aramidem, mayugalimton ti saan nga agdardaras nga agkararag.

PANUNOTEM DAGITI NAIMPUSUAN A KARARAG A MABASA ITI BIBLIA

11. Ania ti maitulongna kadatayo no panunotentayo dagiti naimpusuan a kararag a mabasa iti Biblia? (Kitaen met ti kahon a “Kastoy Met Kadi ti Marikriknam?”)

¹¹ Mabalin a makatulong kenka no panunotem dagiti naimpusuan a kararag a mabasa iti Biblia agraman dagiti kanta, wenno salmo, a mangidaydayaw ken Jehova. Bayat a kitkitaem no kasano nga inyebkas dagiti adipen ti Dios ti pampanunoten ken rikriknada, maparegtaka a mangibukbok iti linaon ti pusom ken Jehova. Posible pay ketdi a makakitaka kadagiti sasao nga inusar dagiti adipen ti Dios a mabalinmonto nga usaren kadagiti kararagmo. Baka addanto pay ketdi dagiti makitam a kararag dagiti adipen ni Jehova a kapadam iti situasion.

12. Ania dagiti mabalintayo nga isaludsod iti bagitayo bayat a pampanunotentayo dagiti kararag a mabasa iti Biblia?

¹² Bayat a pampanunotem ti linaon ti maysa a kararag a mabasa iti Biblia, isaludsodmo iti bagim: ‘Asino ti nagkararag? Ania ti situasionna ken apay a kasta ti inkararagna? Agpadakami kadi iti marikrikna? Ania ti masursurok iti kararagna?’ Baka kasapulan nga ag-research-ka pay tapno maammuam ti sungbat dagita a saludsod. Ngem sigurado a saan a sayang ti panagreggetmo. Pagsasaritaantayo ita ti maipapan iti uppat a kararag.

13. Ania ti maysa a masursurotayo maipapan iti kararag ni Hanna? (1 Samuel 1:​10, 11) (Kitaen met ti ladawan.)

¹³ Basaen ti 1 Samuel 1:​10, 11. Idi inkararag dagita ni Hanna, adda ti dua a dakkel a problemana. Lupes la ngaruden, kanayon pay nga in-insultuen ti sabali pay nga asawa ni lakayna. (1 Sam. 1:​4-7) No adda problemam a kasla saanen nga agpatingga, ania ti masursurom iti kararag ni Hanna? Limmag-an ti riknana kalpasan ti napaut a panagkararagna ken idi imbukbokna ti amin a linaon ti pusona ken Jehova. (1 Sam. 1:​12, 18) Mabang-arantayo met no ‘ipalladawtayo ken Jehova ti dadagsentayo.’ Maaramidtayo dayta no ibagatayo kenkuana ti amin a detalye dagiti pagdandanagantayo ken dagiti epekto dagita kadatayo.—Sal. 55:22.

14. (a) Ania pay ti masursurotayo iti ulidan ni Hanna? (b) Kasano a makatulong ti panangutob iti Kasuratan tapno ad-adu ti maibagatayo kadagiti kararagtayo? (Kitaen met ti footnote.)

¹⁴ Kalpasan ti sumagmamano a tawen, naaddaan met laengen ni Hanna iti anak—ni Samuel. Idi agangay, impan ni Hanna ni Samuel iti Nangato a Padi a ni Eli. (1 Sam. 1:​24-28) Iti naimpusuan a kararag ni Hanna, nagyaman ken Jehova ta salsaluadan ken ay-aywananna dagiti napudno nga adipenna.c (1 Sam. 2:​1, 8, 9) Posible a saan a napukaw ti amin a problema ni Hanna. Ngem nagpokus isuna no kasano a bembendisionan ni Jehova. Ania ti masursurotayo? Mas kayatayo a sanguen dagiti pakarigatan no agpokustayo no kasanonatayo a tultulongan ni Jehova.

15. No makapasartayo iti kinaawan hustisia, ania ti masursurotayo iti kararag ni propeta Jeremias? (Jeremias 12:1)

¹⁵ Basaen ti Jeremias 12:1. Adda idi gundaway a naupay ni propeta Jeremias gapu ta dagiti managdakdakes ti kasla agbalballigi. Kimmapuy pay ketdi ti pakinakemna ta saan a nasayaat ti panangtrato kenkuana dagiti padana nga Israelita. (Jer. 20:​7, 8) Kasta met laeng ti makitkitatayo ita isu a matarusantayo ti nariknana. Nupay inyebkas ni Jeremias ti pannakaupayna, saanna a kinuestionaran ti hustisia ti Dios. Idi nakitana no kasano nga inlinteg ni Jehova ti rebelioso nga ilina, immuneg la ketdi ti panagtalekna nga ipakat ni Jehova ti hustisia. (Jer. 32:19) No masaksaktantayo met unay gapu iti kinaawan hustisia a makitkita wenno mapaspasarantayo, mabalintayo nga iyebkas dayta ken Jehova. Kasta met, mabalintayo nga ibaga nga agtaltalektayo kenkuana nga ilintegna ti amin a bambanag iti umiso a tiempo.

16. No kasla limitadon ti maaramidantayo, ania ti masursurotayo iti naipanaw a Levita? (Salmo 42:​1-4) (Kitaen met dagiti ladawan.)

¹⁶ Basaen ti Salmo 42:​1-4. Daytoy a kanta ket insurat ti maysa a Levita a naipanaw ken saan a makapagdaydayaw a kadua dagiti padana nga Israelita. Ipakita ti salmona ti marikriknana. Mabalin a mariknatayo met ti kasta no saantayo a makapanaw iti balaytayo wenno no naibaludtayo gapu iti pammatitayo. Agbaliwbaliw man ti emosiontayo, nasayaat no iyebkastayo dagita iti kararag. Makatulong dayta tapno mas maawatantayo no apay a kasta ti marikriknatayo ken tapno mas makitatayo ti intero a situasion. Kas pagarigan, nakita ti Levita nga adda dagiti nakalukat a gundaway a maidaydayawna ni Jehova. (Sal. 42:5) Pinampanunotna met no kasano nga ay-aywanan isuna ni Jehova. (Sal. 42:8) Ania ti masursurotayo? Makatulong ti napasnek a panagkararag tapno mas maawatantayo ti riknatayo, agbalintayo manen a kalmado, ken tapno makapagibturtayo.

17. (a) Ania ti masursurotayo kadagiti kararag ni propeta Jonas? (Jonas 2:​1, 2) (b) No adda problematayo, apay a nasayaat a tantandaanantayo dagiti sasao iti sumagmamano a bersikulo iti Salmo? (Kitaen met ti footnote.)

¹⁷ Basaen ti Jonas 2:​1, 2. Adda ni propeta Jonas iti tian ti dakkel nga ikan idi inyebkasna dayta a kararag. Uray no nagsukir ni Jonas, kombinsido latta a denggen ni Jehova ti timekna. Iti panagpakpakaasina, inusarna ti adu a sasao a mabasa iti Salmo.d Kabesadona la ketdi dagita. Idi dagita ti pinampanunotna, nasiguradona a tulongan ni Jehova. Makatulong met ngarud no ikagumaantayo nga ikabesa ti sumagmamano a bersikulo ti Biblia. Mabalin a dagita ti malagiptayo ken mangliwliwa kadatayo inton agkararagtayo ken Jehova kadagiti narigat a situasion.

ITULTULOYMO TI SUMINGED KEN JEHOVA BABAEN TI KARARAG

18-19. No adda dagiti tiempo a saanmo nga ammo ti ikararagmo, ania ti ipasigurado ti Roma 8:​26, 27? Mangted iti pagarigan.

¹⁸ Basaen ti Roma 8:​26, 27. Mabalin nga adda dagiti tiempo a nakaro ti panagdanagtayo ket saantayo nga ammo ti ikararagtayo. Ngem adda makatulong. Kadagita a gundaway, “agpakaasi” ti nasantuan nga espiritu ti Dios para kadatayo. Kasano? Babaen ti espiritu ni Jehova, impaisuratna ti adu a kararag iti Saona. Mabalin nga awaten ni Jehova dagita a sasao a masarakan kadagita a kararag ket ibilangna kas personal a kararagtayo ken posible a sungbatanna dagita.

¹⁹ Dayta ti nakatulong iti taga-Russia a sister a ni Yelena. Naaresto gapu iti panagkararag ken panagbasana iti Biblia. Permi ti pannaka-stress ni Yelena ken saanna payen a mapagsusurot ti kararagna. Imbagana: “No diak idi ammo ti ikararagko gapu ta permi a madandanaganak, ammok nga ibilang ni Jehova dagiti kararag dagiti adipenna a naisurat iti Biblia . . . kas personal a kararagko kenkuana. . . . Uray no nagrigat ti situasionko, dayta ti nangliwliwa unay kaniak.”

20. No mais-stress-tayo, kasanotayo a maisagana ti panunottayo sakbay nga agkararagtayo?

²⁰ No mais-stress-tayo, mabalin a marigatantayo nga agpokus bayat ti panagkararagtayo. Tapno maisaganatayo ti isiptayo, mabalintayo nga ipigsa a basaen ti dadduma a Salmo. Mabalintayo met nga isurat dagiti marikriknatayo kas iti inaramid idi ni Ari David. (Sal. 18, 34, 142; dagiti superskripsion.) Siempre, awan ti istrikto a paglintegan no kasanotayo nga isagana ti bagitayo sakbay nga agkararagtayo. (Sal. 141:2) Aramidem no ania ti makatulong kenka.

21. Apay a mabalintayo nga ibukbok ti linaon ti pusotayo iti kararag?

²¹ Makaliwliwa unay a maammuan a maawatan ni Jehova ti riknatayo sakbay pay nga ibagatayo dayta. (Sal. 139:4) Ngem maragsakan met no mangngegna nga iyebkastayo ti panagtalektayo kenkuana. Isu a saanka koma a bumdeng nga agkararag iti nailangitan nga Amam. Usarem dagiti sasao a masarakan kadagiti kararag a naisurat iti Saona. Agkararagka a naimpusuan. Ibagam kenkuana dagiti mangparparagsak ken mangpalpaliday kenka. Ni Jehova ti pudno a Gayyemmo ket dinakanto pulos panawan!