Laglagipem nga Ikararagan ti Dadduma

1. Kasanotayo nga ammo a nakapatpateg ken Jehova dagiti kararagtayo?

TI KARARAG ket nakasaysayaat a regalo ni Jehova kadatayo. Panunotem daytoy: Adda dagiti trabaho nga impaannong ni Jehova kadagiti anghel. (Sal. 91:11) Inikkanna met ti Anakna kadagiti nadagsen a responsabilidad. (Mat. 28:18) Ngem adda kadi sabali a nangtedanna iti annongen a mangdengngeg kadagiti kararagtayo? Awan. Ngamin, kayat ni Jehova nga isuna a mismo ti mangaramid iti dayta. Personal a dengdenggennatayo ni Jehova, ti “Managdengngeg iti kararag.”—Sal. 65:2.

2. Kasano a nagbalin a nasayaat nga ulidan ni apostol Pablo no maipapan iti panangikararag iti dadduma?

² Nawayatayo a mangikararag ken Jehova kadagiti pakaseknantayo. Ngem ditay koma liplipatan nga ikararagan met ti dadduma. Kasta ti inaramid ni apostol Pablo. Kas pagarigan, imbagana iti kongregasion ti Efeso: “Kanayon a dakdakamatenkayo kadagiti kararagko.” (Efe. 1:16) Inkararagan met ni Pablo dagiti espesipiko nga indibidual. Kas pagarigan, imbagana ken Timoteo: “Agyamanak iti Dios, . . . a kanayon a laglagipenka iti panagpakpakaasik iti aldaw ken rabii.” (2 Tim. 1:3) Adda met dagiti bukod a pakadanagan ni Pablo a kasapulanna nga ikararag. Ngem nangiwaya latta iti panawen a mangikararag iti dadduma.—2 Cor. 11:23; 12:​7, 8.

3. Apay a posible a malipatantayo nga ikararagan ti dadduma?

³ Adda dagiti tiempo a posible a malipatantayo nga ikararagan ti dadduma. Apay? Imbaga ti maysa a sister a ni Sabrinaa ti maysa a rason: “Nakabis-busy ti lubong ita. Ken iti kinaad-adu ti problematayo, baka dagiti laengen bukodtayo a problema ti maikarkararagtayo.” Kastaka kadi met no dadduma? No wen, makatulong kenka daytoy nga artikulo. Ilawlawagna (1) no apay a napateg nga ikararagantayo ti dadduma ken (2) no kasanotayo nga aramiden dayta.

APAY NGA IKARARAGANTAYO TI DADDUMA?

4-5. Apay a ‘nabileg ti epekto’ dagiti kararagtayo para iti dadduma? (Santiago 5:16)

⁴ ‘Nabileg ti epekto’ ti kararagtayo iti dadduma. (Basaen ti Santiago 5:16.) Talaga kadi nga adda epektona iti dadduma no ikararagantayo ida? Wen, adda. Ammon ni Jesus nga ilibak isuna ni apostol Pedro isu nga imbagana kenkuana: “Nagpakpakaasiakon a saan koma a kumapuy ti pammatim.” (Luc. 22:32) Ammo met ni Pablo a dakkel ti epektona iti dadduma ti kararag. Idi naibalud idiay Roma gapu iti ulbod a pammabasol, insuratna ken Filemon: “Mangnamnamaak a babaen kadagiti kararagyo, makasubliakto kadakayo.” (Flm. 22; kitaen ti study note a “for I am hoping that through your prayers.”) Ket dayta a talaga ti napasamak. Di nagbayag, nawayawayaan ni Pablo ket nakapangasaba manen.

⁵ Siempre, saanna met ketdi kayat a sawen a kanayon a sungbatan ni Jehova dagiti ikarkararagtayo kenkuana. Ngem makitkitana no kasano kapateg para kadagiti agserserbi kenkuana dagiti kararagda, ket adda dagiti tiempo a patganna dagiti kiddawda. Gapu iti dayta, kayattayo la ketdi a sipapasnek nga ikararag ken Jehova ti maipapan iti maysa a situasion, ken agtalektayo nga isunan ti makaammo iti dayta.—Sal. 37:5; kitaen ti 2 Corinto 1:11 ken dagiti study note.

6. Ania ti mabalin a mariknatayo para iti dadduma no ikarkararagantayo ida? (1 Pedro 3:8)

⁶ No ikararagantayo ti dadduma, maaddaantayo iti “nadungngo a pannakipagrikna.” (Basaen ti 1 Pedro 3:8.) No mannakipagriknatayo, ammotayo no marigrigatan ti maysa ken matignaytayo a mangtulong kenkuana. (Mar. 1:​40, 41) Imbaga ti maysa a panglakayen a ni Michael: “No ikarkararagak ti dadduma, mas maawatak ti problemada ken lallalo pay nga umuneg ti panagayatko kadakuada. Isu a panagriknak, nasingsingedakon kadakuada uray no saanda nga ammo.” Imbaga met ti maysa a panglakayen a ni Richard: “No ikarkararagak ti maysa, mas matignayak a mangtulong kenkuana.” Innayonna pay: “No tultulongantayo ti maysa nga ikarkararagantayo, kas man la datayon a mismo ti mangar-aramid iti pamay-an tapno masungbatan dagiti kararagtayo para kenkuana.”

7. No ikararagantayo ti dadduma, apay a maaddaantayo iti umiso a panangmatmat kadagiti problematayo? (Filipos 2:​3, 4) (Kitaen met dagiti ladawan.)

⁷ No ikararagantayo ti dadduma, maaddaantayo iti umiso a panangmatmat kadagiti problematayo. (Basaen ti Filipos 2:​3, 4.) Adda amin problematayo gapu ta agbibiagtayo iti lubong a kontrolado ti Diablo. (1 Juan 5:19; Apoc. 12:12) Isu a no iyugalitayo nga ikararagan ti dadduma, maipalagip kadatayo a dagiti pakarigatantayo ket ‘sagsagabaen met laeng ti amin a kakabsattayo ditoy lubong.’ (1 Ped. 5:9) Imbaga ti maysa a payunir a ni Katherine: “No ikarkararagak ti dadduma, maipalagip kaniak a saan laeng gayam a siak ti adda problemana. Makatulong dayta tapno saanak unay nga agpokus kadagiti problemak.”

KASAPULANDA DAGITI KARARAGTAYO

8. Siasino dagiti mabalintayo nga ikararagan?

⁸ Siasino dagiti mabalintayo nga ikararagan? Mabalintayo nga ikararagan ti agduduma a grupo dagiti tattao. Kas pagarigan, dagidiay adda sakitda, dagiti agtutubo a mabul-bully wenno pilpiliten dagiti kaeskuelaanda nga agaramid iti dakes, wenno uray dagiti bumakbaket ken lumaklakayen. Adu a kakabsat ti busbusoren dagiti kapamiliada wenno ti gobierno. (Mat. 10:​18, 36; Ara. 12:5) Adda met dagiti kakabsat a napilitan a nangpanaw kadagiti lugarda gapu iti gulo iti politika. Naapektaran met ti dadduma kadagiti natural a didigra. Mabalin a saantayo nga am-ammo ti tunggal maysa kadakuada. Ngem mabalintayo ida nga ikararagan. No aramidentayo dayta, sursurotentayo ti bilin ni Jesus nga ‘agiinnayattayo.’—Juan 13:34.

9. Apay a masapul nga ikararagantayo dagiti mangidadaulo iti organisasion ni Jehova agraman dagiti assawada?

⁹ Mabalintayo met nga ikararagan dagiti mangidadaulo iti organisasion ni Jehova. Karaman dita ti Bagi a Manarawidwid ken dagiti katulonganda, dagiti Komite ti Sangay, dagiti overseer kadagiti sanga nga opisina, dagiti manangaywan iti sirkito, papanglakayen, ken ministerial nga adipen. Adu met ti pakadanagan dagitoy a kakabsat. Ngem nakaad-adu ti ar-aramidenda para kadatayo. (2 Cor. 12:15) Kas pagarigan, imbaga ti maysa a manangaywan iti sirkito a ni Mark: “Maysa kadagiti pagdandanagak unay ket dagiti nagannakko. Malaksid nga adayoda kaniak, lumaklakay ken bumakbaketdan ken addaandan kadagiti sakit. Agpayso met ketdi nga ay-aywanan ida ni manangko ken ni bayawko. Ngem tunggal malagipko a nagbassit laeng ti maar-aramidak para kadakuada, masnaayanak unay.” Ammotayo man wenno saan dagiti pagdandanagan dagitoy a nareregta a kakabsat, nasayaat no iramantayo ida kadagiti kararagtayo. (1 Tes. 5:​12, 13) Mabalintayo met nga ikararagan dagiti assawada. Dakkel ti maar-aramidanda tapno maitungpal dagiti assawada dagiti annongenda.

10-11. Sungbatan kadi ni Jehova dagiti kararagtayo para kadagiti kakabsat uray no saantayo nga espesipiko nga inaganan ida? Ilawlawag.

¹⁰ Kas napagsasaritaantayon, masansan nga ikarkararagantayo ti agduduma a grupo dagiti kakabsat. Kas pagarigan, mabalintayo a kiddawen ken Jehova a tulonganna dagiti naibalud ken liwliwaenna dagiti natayan, uray no awan met ti espesipiko a tao nga adda iti panunottayo. Imbaga ti maysa a panglakayen a ni Donald: “Nakaad-adu a kakabsat ti addaan iti problema. Isu a no dadduma, mayat no ti ikararagtayo ket para koma iti amin tapno maikararagantayo ti amin nga agrigrigat.”

¹¹ Sungbatan kadi ni Jehova dagita a kararag? Siempre! Saantayo met ngamin nga ammo dagiti eksakto a kasapulan dagiti kakabsat. Isu nga okey laeng a dagiti kararagtayo ket para iti agduduma a grupo dagiti kakabsat. (Juan 17:20; Efe. 6:18) Ti agpayso, ipakita dagita a kararag nga ‘ay-ayatentayo ti amin a kakabsattayo.’—1 Ped. 2:17.

AGKARARAGTAYO PARA ITI ESPESIPIKO NGA INDIBIDUAL

12. Kasano a makatulong ti panagpaliiw tapno mas espesipiko dagiti kararagtayo?

¹² Agpaliiwka. Malaksid iti panangikararag iti agduduma a grupo dagiti kakabsat, nasayaat met no iramantayo iti kararagtayo ti espesipiko a nagan ti maysa nga indibidual. Kas pagarigan, adda kadi kakongregasionmo a nakaro ti sakitna? Adda kadi agtutubo a maup-upay gapu ta ibul-bully-da idiay eskuelaan? Adda kadi agsolsolo a nagannak nga agregregget a mangpadakkel iti anakna “iti disiplina ken pammagbaga ni Jehova”? (Efe. 6:4) No agpaliiwka, mas maipakitam ti ayat ken empatia iti dadduma, ket dayta ti mangtignay kenka a mangikararag kadakuada.b—Roma 12:15.

13. Kasanotayo a maikararagan dagiti saantayo a personal nga am-ammo?

¹³ Inaganantayo ida kadagiti kararagtayo. Maaramidtayo dayta uray kadagiti saantayo a personal nga am-ammo. Kas pagarigan, mabalintayo nga iraman kadagiti kararagtayo ti nagan dagiti naibalud a kakabsat kadagiti pagilian a kas iti Crimea, Eritrea, Russia, ken Singapore. Makitam iti jw.org dagiti naganda.c Imbaga ti manangaywan iti sirkito a ni Brian: “Nakitak a no isuratko ti nagan ti naibalud a kabsat sa basaek dayta iti napigsa, nalaklakak a malagip ti naganna inton agkararagakon.”

14-15. Kasano nga agbalin a mas espesipiko dagiti kararagtayo?

¹⁴ Espesipiko koma dagiti kiddawmo. Imbaga ni Michael a nadakamat itay: “No basbasaek iti jw.org dagiti salaysay maipapan kadagiti kakabsat a naibalud, im-imadyinek no ania ngata ti mariknak no siak ti adda iti situasionda. Sigurado a madanaganak met ken baketko ken kayatko a siguraduen a saan isuna a mabaybay-an. Gapu iti dayta, mas espesipikon dagiti ikarkararagko maipapan kadagiti kakabsat a naibalud nga adda assawada.”—Heb. 13:​3, ftn.

¹⁵ No panunotentayo ti biag dagiti kakabsat a nakabalud, makapanunottayo iti dadduma pay nga espesipiko nga ikararagtayo para kadakuada. Kas pagarigan, mabalintayo nga ikararag nga agbalin koma a nasingpet kadakuada dagiti guardia iti pagbaludan. Kasta met, ikararagtayo nga ipalubos koma dagiti autoridad ti nawaya a panagdaydayaw dagita a kakabsat. (1 Tim. 2:​1, 2) Mabalintayo met nga ikararag a maparegta koma dagiti kakongregasionda iti kinamatalekda. Ikararagtayo met a madlaw koma dagiti saan pay a manamati ti nasayaat a kababalin dagitoy a kakabsat tapno ipangagda ti mensahetayo. (1 Ped. 2:12) Siempre, mabalintayo met nga aramiden dayta uray kadagiti kakabsat a maipaspasango kadagiti pakarigatan. No agpaliiwtayo, inaganantayo ti dadduma iti kararagtayo, ken agbalintayo nga espesipiko, maipakitatayo ‘a napnotayo iti ayat iti maysa ken maysa.’—1 Tes. 3:12.

UMISO A PANANGMATMAT KADAGITI KARARAGTAYO

16. Ania koma ti umiso a panangmatmattayo kadagiti kararagtayo? (Mateo 6:8)

¹⁶ Kas iti napagsasaritaantayon, posible a sumayaat ti situasion ti dadduma gapu kadagiti kararagtayo. Ngem masapul koma nga umiso ti panangmatmattayo kadagiti kararagtayo. Saantayo koma a panunoten nga agkararagtayo tapno ibagatayo ken Jehova ti maysa a banag a saanna pay nga ammo. Saantayo met nga agkararag tapno diktaran isuna iti kasayaatan nga aramidenna iti maysa a situasion. Ammo ni Jehova ti talaga a kasapulan dagiti adipenna sakbay pay a maammuanda dayta wenno sakbay pay nga ikararagtayo. (Basaen ti Mateo 6:8.) No kasta, apay pay la ngarud nga ikararagantayo ti dadduma? Malaksid kadagiti napagsasaritaantayon iti daytoy nga artikulo, ikararagantayo ti dadduma gapu ta maseknantayo kadakuada. Ay-ayatentayo ngamin ida. Ket no makitkita ni Jehova a tultuladentayo ti panagayatna kadagiti adipenna, maparagsaktayo isuna.

17-18. Ania ti marikna ni Jehova no ikararagantayo dagiti kapammatiantayo? Mangted iti ilustrasion.

¹⁷ Ngem no kasla saan latta met a nagbaliw ti situasion dagiti kakabsat uray no inkararagantayo idan, laglagipentayo a ti panangikararagtayo kadakuada ket ebidensia nga ay-ayatentayo ida. Makitkita dayta ni Jehova. Kitaentayo daytoy nga ilustrasion: Adda agkabsat nga ubbing a lalaki ken babai. Adda sakit ti lalaki isu nga impakaasi ni adingna ken tatangna: “Pa, tulongam man ni manong. Kakaasi met!” Adda met ketdin ti ar-aramiden ni tatangda. Ay-aywananna ti anakna gapu ta ay-ayatenna. Ngem nakaragragsak la ketdi ti tatang ta nangngeg ken nakitana nga ipatpateg unay ti balasitangna ni manongna nga uray la ipakpakaasina a tulonganna.

¹⁸ Dayta ti kayat ni Jehova nga aramidentayo—ayaten ken ikararagantayo ti maysa ken maysa. No aramidentayo dayta, ipakpakitatayo a saan laeng a ti bagitayo ti pampanunotentayo. Ipakpakitatayo met ti nauneg nga ayattayo kadagiti kakabsat ket makitkita dayta ni Jehova. (2 Tes. 1:3; Heb. 6:10) Kasta met, kas napagsasaritaantayon, posible pay ketdi nga adda ti nasayaat nga epektona iti dadduma dagiti kararagtayo. Isu a laglagipentayo koma nga ikararagan ti maysa ken maysa.