Surat Manipud iti Bagi a Manarawidwid
BAYAT a sumrektayo iti umuna a tawtawen ti maika-21 a siglo, maragsakankami nga agsurat kadakayo, ‘ti intero a timpuyog dagiti kakabsat’ iti intero a lubong, tapno komendarandakayo iti kinagagetyo. (1 Ped. 2:17) Dandani 2,000 a tawenen ti napalabas, insaludsod ni Jesus: “Inton dumteng ti Anak ti tao, pudno aya a masarakannanto ti pammati ditoy daga?” (Luc. 18:8) Ti sireregta a panagtrabahoyo bayat ti napalabas a tawen serbisio ti mangsungbat iti saludsod ni Jesus iti gumluong a wen! Dadduma kadakayo ti nalalais ken narabrabak gapu iti pammatiyo. Iti adu a lugar, inibturanyo dagiti gubat, didigra, sakit, wenno bisin. (Luc. 21:10, 11) Ngem gapu iti regtayo kadagiti naimbag nga aramid, ni Jesus ket mabalin a ‘makasarak pay ti pammati ditoy daga.’ Sigurado nga agragrag-oda idiay langit gapu iti dayta!
Pagaammomi a narigat ti agibtur. Usigenyo dagiti pakasuotan ti kakabsattayo iti maysa a pagilian iti makinlaud nga Asia. Dandani gagangayen ti kinaranggas kadagiti Saksi ni Jehova iti dayta a pagilian. Nabiit pay a riniribuk dagiti polis ti natalna nga asamblea ti agarup 700. Nalapdan ti itatabuno ti agarup 1,300 a sabsabali pay gapu kadagiti bangen iti kalsada. Maysa a bunggoy dagiti nakamaskara a managderraaw, a polis ti sumagmamano kadakuada, ti rimmaut iti pagasamblean, kinabkabilda ti adu kadagiti delegado, sada pinuoran ti palapala a pagasambleanda koma. Iti dadduma nga okasion, dagiti ekstremista iti relihion ti siraranggas a nangkabkabil kadagiti kakabsattayo kadagiti pang-or a namulaan kadagiti lansa.
Makapakigtot dagita a panangraut ngem saan a nakaskasdaaw. Napaltiingan ni apostol Pablo nga agsurat: “Amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” (2 Tim. 3:12) Idi umuna a siglo, inibturan dagiti Kristiano ti napagsasawan ken nakabkabil, ken napapatay pay ketdi ti dadduma. (Ara. 5:40; 12:2; 16:22-24; 19:9) Pudno met dayta iti maika-20 a siglo, ket awan duadua nga agtultuloy dayta iti maika-21 a siglo. Kaskasdi, ibaga ni Jehova kadatayo: “Aniaman nga igam a mabukelto maibusor kenka saanto nga agballigi.” (Isa. 54:17) Anian a nagsayaat a pammasiguro dayta! Kinapudnona, nakapatpategtayo ken Jehova ta kinunana babaen ken mammadtona a Zacarias: “Ti mangsagid kadakayo sagidenna ti bukel ti matak.” (Zac. 2:8) Awan gundaway ti adu a kabusor dagiti agdaydayaw ken Jehova nga agballigi a naan-anay. Agballiginto ti pudno a panagdayaw!
Kas pagarigan, iti nadakamat itay a pagilian, sinagrap dagiti Saksi ni Jehova ti dua a baro a kangatuan a bilang dagiti agibumbunannag bayat ti 2001 a tawen serbisio. Wen, naregget dagiti kakabsattayo sadiay nupay adu ti rigat, kas iti mapaspasamak iti dadduma a lugar. Iti intero a lubong bayat ti napalabas a tawen serbisio, adda 5,066 a nagpabautisar iti kada lawas kas simbolo ti dedikasionda ken Jehova. Ita, determinadon dagitoy a kabbaro, agraman kadatayo amin nga ‘agtakder a naan-anay ken addaan natibker a panamati iti isuamin a pagayatan ti Dios.’—Col. 4:12.
Usigenyo met ti nabiit pay a paspasamak idiay Grecia. Nupay adu a tawenen ti nakaro a panangbusor ti Greek Orthodox Church, dagiti Saksi ni Jehova ket bigbigen itan ti gobierno kas “nalatak a relihion.” Kuna pay ti dokumento a nangipaay iti daytoy a pannakabigbig a dagiti patakder ti Bethel idiay Grecia ket “sagrado ken naideklara a nasantuan a lugar, naidedikar iti panagdayaw iti Dios.” Maragsakankami met a mangibaga kadakayo a bayat ti napalabas a tawen serbisio, nangipaulog ti adu a korte kadagiti makaay-ayo ken legal a desision a mangapektar iti panagdayawtayo idiay Alemania, Bulgaria, Canada, Estados Unidos, Japan, Romania, ken Russia. Anian a panagyamantayo ken Jehova iti panamagtalinaedna a silulukat ti ruangan a mangiturong iti panagserbi kadagidiay a pagilian!
Bayat nga usigentayo dagiti pamay-an ti panangandingay ni Jehova iti ilina bayat dagitoy maudi nga al-aldaw, makitatayo nga isu pay laeng ti kasayaatan a Gayyemtayo. Maragsakantayo a makilangen kenkuana, ta ammotayo nga ay-ayatennatayo, sursuruannatayo, ken at-aturennatayo. Wen, agtultuloy a mapasarantayo dagiti pakasuotan ti pammatitayo. Ngem ti di maisin a pammatitayo ken Jehova ti agtultuloy a mangpabileg kadatayo. Insurat ni Santiago: “Ibilangyo a rag-o amin, kakabsatko, no maipasangokayo iti nadumaduma a pakasuotan, yantangay ammoyo a daytoy nasubok a kualidad ti pammatiyo mangpataud iti panagibtur.” (Sant. 1:2, 3) Kasta met a ti panagibturtayo ti mangipakita iti panagayattayo ken Jehova, ket daytoy ti mangparagsak unay kadatayo! Dungdungoenmi a kakabsat, ipasiguradomi nga andingayen ni Jehova ti tunggal maysa kadatayo. No agtalinaedtayo a matalek, di bumurong a tulongannatayo a sumrek iti baro a lubong. Kayatna nga agballigitayo.
Isu a paregtaendakayo kakabsat, agtutubo man ken nataengan, a kanayon a sipapanunottay koma kadagiti nakaskasdaaw a bendision nga adda iti masakbayan. Tuladentayo koma ti kababalin ni apostol Pablo, a nagsurat: “Ibilangko a dagiti panagsagaba iti agdama a panawen awan aniaman a pategda no maidilig iti dayag a maipanayagto kadatayo.” (Roma 8:18) Agkammatalekkayo ken Jehova no maipasangokayo iti aniaman a kita ti rigat. Agibturkayo, ket dikay sumuko. Diyonto pulos pagbabawyan dayta. Ipasigurado ti Sao ti Dios kadatayo: “No maipapan iti daydiay nalinteg, babaen ti kinamatalekna agtultuloyto nga agbiag.”—Hab. 2:4.
Dagiti kakabsatyo,
Bagi a Manarawidwid Dagiti Saksi ni Jehova