Kapkapadasan Dagiti Saksi ni Jehova iti Moderno a Panawen
Norway
Panunotenyo no kasano ti mangasaba iti pagilian nga aduan iti fjord (paset ti baybay iti baet ti natatayag a bantay), bambantay, yelo, niebe, ken ugsa. Ti tangatangna iti tiempo ti lam-ek ket silsilnagan ti naraniag a lawag iti amianan. Kasta ti Norway. Basaenyo ti maipapan kadagiti kakabsattayo a nagusar iti bangka ken ski tapno madanonda dagiti naiputputong nga umili ken ti maipapan iti kabsat a nagnagna a sakasaka a napan nakigimong. Ammuenyo met ti maipapan kadagiti Kristiano a nangipakita iti pammati ken tured iti sidong ti panangparigat dagiti Nazi a nangsakup iti Norway.
Rwanda
Iti pakasaritaan daytoy a pagilian iti Africa, nabatad a makita ti managsakripisio nga ayat a kinuna ni Jesus a pakailasinan dagiti adalanna. Iti laksid ti guranggura iti nagbabaetan dagiti puli a nagresulta iti nakaal-alingget a panangpapatay, nagsisinnalaknib dagiti kakabsat uray no nagpeggad ti biagda ken natay pay ketdi ti dadduma gapu iti dayta. Maysa daytoy a di malipatan a salaysay ti panagibtur iti sidong ti pannakaidadanes ken panangiparit, ken pakasaritaan ti kinatarnaw iti laksid ti rigat, suot, ken nakaal-alingget a paspasamak.