Maysa a Pudno nga Anak ni Sara

NADUNGNGO ken mannakigayyem ni nanangko ken ipatpategna ti Biblia. Idi naam-ammona ni Gertrud Ott, a maysa a misionera idiay Manado, North Sulawesi, dagus a nakipagadal iti Biblia ken inawatna ti kinapudno. Ngem ti tatangko a ni Erwin, a prominente ken nangato ti posisionna iti banko ken idi agangay nagbalin a chairman iti Jakarta Stock Exchange, ket nakaro ti panangbusorna iti baro a pammati ni nanangko.

Naminsan, inikkan ni Tatang ni Nanang iti ultimatum.

“Agpilika! Ti relihionmo wenno siak?” imbugkawna.

Nagpanunot a naimbag ni Nanang. Sa kalmado nga insungbatna, “Pilienkayo a dua​—sika ken ni Apo Jehova.”

Napaulimek ni Tatang, ken bimmaaw ti pungtotna.

Idi agangay, saannan a parparitan ni Nanang gapu ta ay-ayatenna unay ken maap-apresiarna ti kinasirib ken pannakaawatna.

Nupay kasta, il-iliwen ni Nanang a makadua ni Tatang iti pudno a panagdayaw. Kalpasan nga inkararagna dayta, nalagipna a magusgustuan ni Tatang ti agsursuro kadagiti lengguahe isu a nangidispley iti balaymi kadagiti teksto iti Biblia iti Ingles. “Kayatko ti lumaing nga agsao iti Ingles,” kinuna ni Nanang. Ammona a magusgustuan ni Tatang ti agdengngeg kadagiti agsasao iti publiko isu nga agpatulong no kua kenkuana nga agpraktis iti pasetna iti Teokratiko nga Eskuelaan ti Panagministro ket kayatna met. Managpadagus ni Tatang isu nga impakada ni Nanang no mabalinda a padagusen iti balay ti manangaywan iti sirkito ket impalubosna met. Ken gapu ta ipatpategna ti pamiliana, imbaga ni Nanang a baka kayatnakami a katugaw kadagiti Nakristianuan a kombension isu nga um-umay ni Tatang.

Ti kinaanus ken naannad a panangikagumaan ni Nanang ti in-inut a nanglunag iti puso ni Tatang. Idi agangay, immakar ti pamiliami idiay England. Nakigimgimong ni Tatang ken nagbalin a gayyemna ni Brother John Barr, a nagbalin a miembro ti Bagi a Manarawidwid dagiti Saksi ni Jehova. Iti dayta met la a tawen, nabautisaran ni Tatang ket uray la timmukno iti langit ti ragsak ni Nanang. Iti sumarsaruno a tawen, ad-adda pay nga inayatna ni Nanang.

Kuna ti dadduma a gagayyem ti pamiliami a ni Nanang ket kas ken Lidia, maysa a managpadagus a Kristiano a babai idi umuna a siglo. (Ara. 16:14, 15) Ngem para kaniak, ad-adda a makitak kenkuana ni Sara, a naimpusuan a nagpasakup ken Abraham nga asawana. (1 Ped. 3:4-6) Naemma, narespeto, ken natibker ti espiritualidad ni Nanang. Naparparegta dagiti makaam-ammo kenkuana. Dagiti nasayaat nga impakpakitana ti nakatulong ken Tatang nga umawat iti kinapudno. Para kaniak, ni Nanang ket maysa a pudno nga anak ni Sara.