Nakitak a Mismo ti Ibagbaga ti Biblia!

DAMO a nangngegko ti maipapan kadagiti Saksi idi agad-adalak iti kolehio iti siudad ti Kutaisi. Imbaga ti maysa a kaarrubami a saan nga agus-usar dagiti Saksi kadagiti imahen a pagdaydayawan ken saanda a mamati a ni Jesus ti Mannakabalin-amin a Dios. Maikontra dayta kadagiti patpatiek nga ipatpategko la unay kas maysa nga Orthodox Christian.

Idi nagsubliak iti ilimi a Tsageri idi 1992, naammuak a mangaskasaba met laeng dagiti Saksi sadiay. Adu a positibo a banag ti nangngeg ni Nanang maipapan kadagiti Saksi. Gapu ta negatibo pay laeng ti panangkitak kadakuada, imbagana kaniak, “Ammuem a mismo no ania ti isursuroda.”

Regular a bumisbisita ti dua a payunir a brother a da Pavle ken Paata iti maysa a pamilia a kaarrubami. No bumisbisitada, dumdumngeg ken agsalsaludsod met ti adu a kaarrubami isu a nakiramanak kadagiti saritaanda. Tunggal agdamagak, luktanda ti Biblia sada ipabasa kaniak. Nagdakkel ti epekto dayta kaniak​—nakitak a mismo ti ibagbaga ti Biblia!

Di nagbayag, nakikaduaak iti maysa a grupo nga iyad-adalan dagiti kakabsat. Iti simmaruno a tawen, sangapulo kadakami ti nabautisaran. Idi agangay, nagbalin met a Saksi ni Jehova ni Nanang.

Agyamyamanak unay ta sinungbatan idi dagiti kakabsat ti amin a saludsodko babaen ti panangipabasada iti sungbat ti Biblia. Nakatulong dayta tapno makapagdesisionak a mangtallikud kadagiti patpatiek. Gapu ta nakatulong unay kaniak ti panangipabasada a mismo iti Biblia, us-usarek dayta a pamay-an a tumulong iti sabsabali nga umawat iti kinapudno!