GEORGIA
Saanen a Maidisso ni Lakayko ti Biblia!
Marina Kopaliani
NAYANAK 1957
NABAUTISARAN 1990
ABABA A PAKASARITAANNA Uray padpadakkelen da Marina ken Badri ti dua nga annakda, naregtada latta a Saksi. Nagserbi ni Badri kas miembro ti Komite ti Pagilian ket nagtalinaed a matalek agingga a natay idi 2010.
IDI 1989, naam-ammomi ken lakayko dagiti Saksi iti balay ti kaarrubami. Ni Brother Givi Barnadze idi ti mangyad-adal iti Biblia iti kaarrubami. Awan ti bukodna a kopia ti Biblia ta narigat idi ti makabirok iti Biblia ditoy Georgia.
Nagustuanmi ti nangngegmi isu a kayatmi met ti maaddaan iti Biblia. Naminsan, nakita ni lakayko ni manongna ket imbagana nga agsapsapul iti Biblia. Nasdaaw ni lakayko idi imbaga ni manongna nga adda kagatgatangna a baro a bersion ti Biblia iti Georgian ken maragsakan a mangiregalo kenkuana.
Idi nakaawiden ni Badri, nagtugaw sa binasana ti Biblia agingga iti rabii. Idi nakariing kabigatanna, intuloyna ti nagbasa. Idi nakaawidakon a naggapu iti trabaho, nasangpetak nga agbasbasa pay laeng iti Biblia. Saannan a maidisso ti Biblia! Isu nga imbagak nga agbakasion pay laeng iti trabahona iti sumagmamano nga aldaw tapno malpasna ti basbasaenna. Di nagbayag, nabasanan ti intero a Biblia.
Idi inyadal ni Brother Barnadze kadakami ti libro a Ti Kinapudno a Mangiturong iti Biag nga Awan Inggana, nakaragragsakkami ta addan bukodmi a Biblia. Nagsayaat ti panagadalmi ta uray awan Bibliana, adda Bibliami, ken uray awan ti libromi a Kinapudno, adda librona! Kalpasan ti agarup makatawen, nabautisarankami ken lakayko.