Baro a Gimong a Panagbiag ken Ministeriotayo kas Kristiano

ITI tinawen a miting ti Watch Tower Bible and Tract Society of Pennsylvania idi Oktubre 3, 2015, inyanunsio ni Anthony Morris, a miembro ti Bagi a Manarawidwid, a ti Teokratiko nga Eskuelaan ti Panagministro, Gimong ti Serbisio, ken ti Panagadal ti Kongregasion iti Biblia ket masuktan iti baro a gimong a maawagan iti Panagbiag ken Ministeriotayo kas Kristiano. Imbaga pay ni Brother Morris a Ti Ministeriotayo iti Pagarian ket masuktan iti dekolor ken walo ti panidna a binulan a publikasion a napauluan iti Panagbiag ken Ministeriotayo kas Kristiano—Workbook iti Gimong. Naglaon dayta iti linawas nga eskediul ti gimong ken kadagiti ladawan a nadisenio tapno mas makagunggona ti personal a panagbasa iti Biblia.

Adda tallo a kangrunaan a seksion ti baro a gimong:

1. Gameng Manipud iti Sao ti Dios. Ti umuna a paset daytoy a seksion ket sangapulo a minuto a palawag a naibatay iti linawas a panagbasa iti Biblia ken iti ladawan iti workbook. Iti maikadua a paset a “Panagkali iti Naespirituan a Gameng,” mapagsasaritaan dagiti punto iti linawas a panagbasa iti Biblia babaen iti walo a minuto a saludsod ken sungbat, sa sarunuen ti uppat a minuto a panagbasa iti Biblia.

2. Agbalin a Mas Epektibo iti Ministerio. Iti daytoy a seksion, kaaduanna nga adda tallo nga estudiante a mangiparang iti demostrasion iti damo a pannakisarita, panagsarungkar, ken panangyadal iti Biblia.

3. Panagbiag kas Kristiano. Maadal iti daytoy a seksion no kasano nga iyaplikar dagiti prinsipio iti Biblia iti inaldaw a panagbiag. Karaman iti daytoy a seksion ti saludsod ken sungbat a Panagadal ti Kongregasion iti Biblia.

Inyebkas dagiti kakabsat iti nadumaduma a pagilian ti panangapresiarda iti panangsanay nga ipapaay ti baro a gimong. Insurat ti maysa a brother a taga-Australia: “Nagmayat ti Gimong a Panagbiag ken Ministerio! Mas praktikal itan dagiti mapagadalan, ken simple dagiti pagtuladan a presentasion. Dim mapupuotan ti oras ta ab-ababa dagiti paset, direkta iti punto, ken makapainteres, aglalo dagiti paset nga addaan iti video ken pannakipartisipar dagiti ubbing.”

Insurat ti maysa a bagi dagiti panglakayen idiay Italy: “Nadlawmi a gapu iti baro a gimong, natignaykami amin a mas agsagana a naimbag ket, kas resultana, simmayaat ti panangisuromi. Ad-adda a simmayaat ti pamay-an ni Jehova a mangisuro iti ilina babaen iti baro a gimong. Imbaga ti maysa a kabsat nga agtawen iti 15: ‘Marigatanak idi nga agpokus iti gimong. Ngem iti daytoy a baro a gimong, makapagpokusakon ken mas makapagsaganaakon a naimbag.’”

Insurat ti maysa a pamilia idiay Austria: “Marigatankami idi nga agsagana iti linawas a panagbasa iti Biblia a kadua ti balasangmi a 10 ti tawenna. Ngem gapu iti ‘Gameng Manipud iti Sao ti Dios,’ mas mayebkasmin dagiti kapanunotanmi. Maragragsakanmi itan nga agsagana iti linawas a panagbasa iti Biblia. Kasta met, rumangrang-ayen ti espiritualidad ti balasangmi.”

Imbaga ni Ines a taga-Germany: “Natignayak a mangisagana kadagiti maadal ken mangpanunot a naimbag kadagita. Mas agsuksukimatak itan ket nadekdekketakon ken Jehova. Ib-ibusen ti lubong ni Satanas ti pigsak. Ngem mapabpabilegak kadagiti gimong ken maparparegtaak nga agtultuloy nga agserbi.”

Maragragsakan dagiti kongregasion idiay Solomon Islands iti baro a gimong ken agsaksakripisioda tapno naan-anay a mabenepisiaranda iti dayta. Adu a kongregasion ti adda iti adayo a lugar nga awan ti koriente ken Internet, ken nakasimsimple ti biag dagiti kakabsat sadiay. Kasanoda a makaala iti pagbuyaan ken maka-download kadagiti binulan a video para iti gimong? Iti maysa a kongregasion iti isla ti Malaita, nagtitinnulong dagiti kakabsat nga aglako iti kopra. Indonarda iti kongregasion ti naglakuanda tapno makagatangda iti simple a pagbuyaan a mai-charge babaen ti solar power. Ken tapno mabuyada dagiti binulan a video, adda dagiti kakabsat a mapmapan iti kaasitgan a lugar nga adda Internet tapno ag-download kadagiti video, sa kopiaento met dagiti kakabsat iti kongregasion.

“Nalaklakaak a makasursuro babaen kadagiti visual aid,” insurat ti maysa a brother idiay United States. “Nasuroken nga 40 a tawen a marigrigatanak nga agsursuro. Masapul nga ulit-ulitek pay a basaen ti maysa a topiko sakbay a mailawlawagko iti sabsabali. Isu nga agyamyamanak iti Bagi a Manarawidwid kadagiti visual aid nga ar-aramidenda. Nagmayat dagiti video ti introduksion kadagiti libro ti Biblia, ken dakkel ti maitultulongna kaniak dagiti ladawan iti workbook! Talaga a bembendisionan ni Jehova ti panagreggetyo a mangaramid kadagitoy para iti ilina. Pagyamanan unay.”