Ania ti Mapasamakto iti Relihion?—Ti Ibaga ti Biblia
Dismayadoka kadi wenno marurodka pay ketdin iti relihion? Adda dagiti nasayaat nga epekto ti relihion iti dadduma a komunidad ken tattao. Ngem adu met dagiti dakes nga imbungana. “Dadduma kadagiti kadadaksan a gubat iti lubong ket resulta ti agduduma a patpatien ken sursuro dagiti relihion,” kuna ti Encyclopedia of Religion and War. Dagiti lider ti relihion masansan nga us-usarenda ti relihion, saan a para iti panagdaydayaw, no di ket tapno iwarasda dagiti kapanunotanda iti politika. Adda met dagiti lider ti relihion a nangilemmeng iti seksual a panangabuso wenno korapsion.
No dismayadokan iti relihion, baka pampanunotem no ania ngata ti panagrikna ti Dios iti dayta. Ibaga ti Biblia a kagura ti Dios ti kaaduan a relihion gapu kadagiti inar-aramidda. Dakamatenna pay dagiti padto a mangipakita iti aramidento ti Dios. Nagusar ti Biblia kadagiti simbolo a mangilawlawag iti dandanin aramiden ti Dios kontra kadagiti relihion iti intero a lubong.
Ania ti ibaga ti Biblia a mapasamakto iti relihion?
Padto: Iti libro ti Biblia nga Apocalipsis, adda nailadawan a balangkantis a maawagan iti Babilonia a Dakkel. Nakatugaw ti balangkantis iti nalabaga a narungsot nga animal. Ngem inton agangay, bueltaen ken dadaelento ti narungsot nga animal ti balangkantis.—Apocalipsis 17:3, 5, 16.
Kaipapananna: Ti balangkantis a maawagan iti Babilonia a Dakkel isimbolona ti amin nga ulbod a relihion, kayatna a sawen, dagiti relihion a saan nga anamongan ti Dios.a Ti nalabaga a narungsot nga animal isimbolona ti United Nations (UN).b Ti panagtugaw ti balangkantis iti nalabaga a narungsot nga animal ipakitana nga ikagkagumaan ti ulbod a relihion nga impluensiaan wenno kontrolen pay ketdi ti UN. Ti panangpatay ti narungsot nga animal iti balangkantis ipakitana a rauten ken dadaelento ti UN ken dagiti gobierno a mangsupsuporta iti dayta ti amin nga ulbod a relihion iti lubong. Talaga a nagkaro dayta a pannakadadael.
Kasanonto a madadael ti ulbod a relihion?
Padto: “Ti nakitam a 10 a sara ken ti narungsot nga animal guraendanto ti balangkantis ket alaendanto ti amin a kinabaknangna . . . ken interamente a puoranda. Ta inkabil dayta ti Dios iti pusoda [iti puso dagiti lider ti lubong] tapno itungpalda ti panunotna, uray ti panangitungpalda iti maymaysa a panggepda babaen ti panangtedda iti pagarianda iti narungsot nga animal . . . Iti uneg ti maysa nga aldaw, dumtengto kenkuana dagiti didigra, ipapatay ken panagladingit ken nakaro a bisin, ket interamente a mapuoranto, ta napigsa ni Jehovac a Dios a nangukom kenkuana.”—Apocalipsis 17:16, 17; 18:8.
Kaipapananna: Imulanto ti Dios “ti panunotna” iti puso dagiti nasion iti intero a lubong. Tignayennanto ida a mangted iti UN ti “pagarianda,” wenno ti napolitikaan a pannakabalinda. Kalpasan a maawat ti UN dayta a pannakabalin nga inted dagiti nasion, dadaelennanto ti ulbod a relihion iti intero a lubong. Kasla mapasamak laeng daytoy “iti uneg ti maysa nga aldaw,” kayatna a sawen, biglanto a mapasamak dayta ken makigtotto ti adu a tattao gapu ta saanda nga ekspektaren.—Apocalipsis 18:21.
Apay a madadaelto ti ulbod a relihion?
Padto: “Nakadanonen idiay langit ti kaadu ti basolna, ket linagip ti Dios dagiti inaramidna a kinaawan hustisia.”—Apocalipsis 18:5.
Kaipapananna: Nakaad-adun ti dakes nga inaramid ti ulbod a relihion iti ginasgasut a tawen. Dagitoy ti dadduma kadagiti basolna isu nga imbaga ti Dios a dadaelenna:
Makibibiang iti politika. Insuro ni Jesu-Kristo kadagiti pasurotna nga imbes a makiramanda iti politika, masapul nga agtalekda iti Pagarian ti Dios. Dayta ket gobierno idiay langit a mangsukatto iti gobierno ti tao.d (Daniel 2:44; Mateo 6:9, 10; Juan 6:15; 18:36) Ngem sabali ti inaramid ti ulbod a relihion. Aktiboda a makibibiang iti politika imbes nga agbalinda a matalek iti Dios. Isu nga iti padto iti Apocalipsis, nailadawan ti Babilonia a Dakkel kas nakabasol iti “seksual nga immoralidad” ken isu met la gayam a naawagan iti “agdindinnamag a balangkantis.”—Apocalipsis 17:1, 2; Santiago 4:4.
Kinaranggas. Inladawan ti Biblia a ti ulbod a relihion ti mapabasol iti ipapatay “ti amin a napapatay ditoy daga.” (Apocalipsis 18:24) Ngamin, saan nga isursuro ti adu a relihion kadagiti miembroda nga agbalinda a mannakikappia. Dadduma met ti mangsupsuporta wenno mangdurdurog pay ketdi kadagiti tattao a makigubatda ken makiramanda iti terorismo.
Kinaagum. Agbibiag ti ulbod a relihion iti “nakababain a kinaluho.” (Apocalipsis 17:4; 18:7) Ngamin, adu a relihion ti mangus-usar iti koneksion ken impluensiada tapno agakup iti nakaad-adu a kinabaknang. Kagura ti Dios dayta a kinaagumda.—Tito 1:7.
Kinaulbod. Isursuro ti ulbod a relihion kadagiti tattao a patienda ken aramidenda dagiti banag a saan nga isursuro ti Biblia.e Isu a maal-allilaw dagiti tattao ken saan a mapadpadayawan ti Dios. Isu met la gayam a sigun iti padto, ti ulbod a relihion ket naawagan “ti ina . . . ti makarimon a bambanag iti daga.”—Apocalipsis 17:5; 18:23.
Madadaelto kadi ti amin a relihion?
Saan. Ibaga ti libro nga Apocalipsis ti maipapan iti maysa a grupo dagiti tattao iti intero a lubong a maaw-awagan iti “dakkel a bunggoy.” (Apocalipsis 7:9) Nailadawanda a ‘nakabado iti puraw,’ kayatna a sawen, simamatalek nga agdaydayawda iti Dios iti pamay-an a kayatna. Makalasatdanto iti “dakkel a rigat.” Iti Biblia, ti dakkel a rigat ket ti tiempo inton madadael ti ulbod a relihion ken ti amin a dadduma pay a kabusor ti Dios. (Apocalipsis 7:13, 14; 19:11, 19-21) Ti dakkel a bunggoy a nakabado iti puraw ket paset ti pudno a relihion—daydiay agtalinaed iti agnanayon.f
Makalasatto ti dakkel a bunggoy dagiti pudno nga agdaydayaw iti Dios inton madadael ti ulbod a relihion
Ania ti epektona kenka ti pannakadadael ti ulbod a relihion?
Natalged ti riknam ta ammom a saan a kayat ti Dios dagiti dakes nga ar-aramiden dagiti relihion. Maaddaanka iti namnama ta ammom a dandani maawanen ti amin a relihion a saan a mangpadpadayaw iti Dios ken makimbasol no apay nga agrigrigat dagiti tattao.
Makapagtalekka met nga adda ti pamay-an ti panagdaydayaw nga akseptaren ti Dios. Ibaga ti Biblia a “dagiti pudno nga agdaydayaw dayawenda ti Ama maitunos iti espiritu ken kinapudno, ta sapsapulen ti Ama dagiti kasta nga agdaydayaw kenkuana.” (Juan 4:23) Ibagbaga ti Dios kadakuada: “Rummuarkayo kenkuana [iti Babilonia a Dakkel], tattaok, no diyo kayat ti mairaman kadagiti basolna, ken no diyo kayat a lak-amen dagiti didigrana.” (Apocalipsis 18:4, 5) Aw-awisen ti Dios dagiti tattao nga agdayaw kenkuana maitunos iti kinapudno nga adda iti Biblia. (1 Timoteo 2:3, 4) Dagidiay mangawat iti awisna ikarkarina kadakuada nga agbiagdanto iti agnanayon.—1 Juan 2:17.
a Tapno maammuam ti uppat a detalye a makatulong kenka a mangilasin iti Babilonia a Dakkel, basaem ti artikulo nga “Ania ti Babilonia a Dakkel?”
b Tapno maammuam ti innem a detalye a makatulong kenka a mangilasin iti daytoy nga animal, basaem ti artikulo nga “Ania ti Eskarlata ti Kolorna nga Atap nga Animal iti Apocalipsis Kapitulo 17?”
c Jehova ti personal a nagan ti Dios. (Salmo 83:18) Kitaem ti artikulo nga “Asino ni Jehova?”
d Tapno maammuam ti ad-adu pay, buyaem ti video nga Ania ti Pagarian ti Dios?
e Tapno makitam ti dadduma a pagarigan, kitaem ti kahon a “Karaman Kadi iti Babilonia a Dakkel ti Aniaman a ‘Kristiano’ a Relihion?”
f Tapno maammuam no kasano a makatulong kenka ti Biblia a mangilasin iti pudno a relihion, basaem ti artikulo a “Kasanok a Masarakan ti Pudno a Relihion?”