Kristiano Kadi Dagiti Saksi ni Jehova?

Wen. Kristianokami maibatay kadagiti sumaganad a rason:

• Ikagkagumaanmi a suroten a naimbag dagiti pannursuro ken kababalin ni Jesu-Kristo.—1 Pedro 2:21.

• Patienmi a ni Jesus ti tulbek ti pannakaisalakan, ta “awan ti sabali a nagan iti baba ti langit a naited kadagiti tattao a masapul a pakaisalakanantayo.”—Aramid 4:12.

• No agbalin a Saksi ni Jehova dagiti tattao, mabautisaranda iti nagan ni Jesus.—Mateo 28:18, 19.

• Agkarkararagkami babaen ti nagan ni Jesus.—Juan 15:16.

• Patienmi a ni Jesus ti Ulo, wenno daydiay nadutokan nga addaan iti autoridad iti tunggal tao.—1 Corinto 11:3.

Nupay kasta, adu ti nakaidumaanmi kadagiti dadduma a relihion a maaw-awagan iti Kristiano. Kas pagarigan, mamatikami nga isursuro ti Biblia a ni Jesus ket Anak ti Dios, saan a paset ti Trinidad. (Marcos 12:29) Saankami a mamati a ti kararua ket imortal, ken awan ti mabasa iti Biblia a ti Dios agnanayon a tutuokenna dagiti tattao iti impierno. Saankami met a mamati a dagidiay mangidadaulo kadagiti aktibidad ti relihion ket rumbeng a maipaayan iti titulo a mamagbalin kadakuada a nangatngato ngem kadagiti dadduma.—Eclesiastes 9:5; Ezequiel 18:4; Mateo 23:8-10.