Kasano ti Panangtrato Dagiti Saksi ni Jehova Kadagidiay Dati a Karelihionanda?

Ikagkagumaanmi ti agbalin a naayat, nasingpet, ken nadayaw iti amin. No ti maysa a Saksi ni Jehova ket saanen nga aktibo wenno insardengnan ti agdayaw ken Jehova, kasaritami, ipanamnamami nga ay-ayatenmi isuna, ken tulonganmi tapno maisublina manen ti nadekket a relasionna iti Dios.—Lucas 15:4-7.

No dadduma, mabalin a maikkat ti maysa iti kongregasion gapu kadagiti ar-aramidenna. (1 Corinto 5:13) Ngem sakbay pay a mapasamak dayta, ikagumaanmi a tulongan tapno saan a maikkat gapu ta ay-ayatenmi dagiti padami a Saksi. Ken uray no naikkat, nadayaw ken naayat latta ti panangtratomi kenkuana, kas iti ibagbaga ti Biblia nga aramidenmi.—Marcos 12:31; 1 Pedro 2:17.

Apay a maikkat iti kongregasion ti maysa?

Nalawag nga ibaga ti Biblia a masapul a maikkat iti kongregasion ti maysa a Kristiano nga agar-aramid iti nadagsen a basol ken saanna a kayat ti agbalbaliw.a (1 Corinto 5:11-13) Ibaga ti Biblia no ania dagiti nadagsen a basol a mabalin a pakaikkatan ti maysa iti kongregasion. Karaman kadagita ti pannakikamalala, panagbartek, panangpatay, panangabuso kadagiti kapamilia, ken panagtakaw.—1 Corinto 6:9, 10; Galacia 5:19-21; 1 Timoteo 1:9, 10.

Ngem saan a maikkat a dagus iti kongregasion ti maysa a nakaaramid iti nadagsen a basol. Ikagumaan dagiti panglakayenb iti kongregasion a tulongan nga umuna tapno makapagbalbaliw. (Roma 2:4) Naalumamay, naannad, ken nasingpet ti pannakisaritada kenkuana tapno matignayda nga agbalbaliw. (Galacia 6:1) Makatulong dayta tapno mabigbig ti nakabasol a nagkamali isuna ken masapul nga agbabawi. (2 Timoteo 2:24-26) Ngem no itultuloyna a sukiren dagiti bilin ti Biblia ken saan nga agbabawi, uray no maulit-ulit a matulongan, masapul a maikkat iti kongregasion. Ipakaammo dagiti panglakayen iti kongregasion a dayta a tao ket saanen a maysa kadagiti Saksi ni Jehova.

Dua a panglakayen iti kongregasion a nasingpet a mangilawlawag kadagiti bersikulo iti Biblia iti maysa a barito. Nakaparabaw ti ima ti maysa a panglakayen iti abaga ti barito bayat a makisarsarita kenkuana. — Naalumamay, naannad, ken nasingpet ti pannakisarita dagiti panglakayen iti nakabasol tapno matignayda nga agbalbaliw

Ania ti pagsayaatanna no maikkat iti kongregasion ti maysa nga agtultuloy nga agar-aramid iti basol? Umuna, masurot ti kongregasion dagiti bilin ti Dios maipapan iti kinadalus iti moral ken saan a maimpluensiaan ti kongregasion iti dakes nga aramid dayta a tao. (1 Corinto 5:6; 15:33; 1 Pedro 1:16) Maikadua, matulongan ti nakabasol a mangisardeng iti dakes nga ar-aramidenna ken mangaramid kadagiti kasapulan a panagbalbaliw.—Hebreo 12:11.

Kasano ti panangtrato dagiti Saksi ni Jehova kadagidiay naikkat iti kongregasion?

Ibaga ti Biblia a masapul nga ‘isardeng dagiti Kristiano ti makikadkadua’ iti asinoman a naikkat iti kongregasion, “uray makipangan man la koma iti kasta a tao.” (1 Corinto 5:11) Isu a saanmi a kalangen ti maysa a naikkat iti kongregasion. Ngem dina kayat a sawen a dimin pulos pampansinen. Respetuenmi latta isuna. Mabalinna latta ti umatender kadagiti gimongmi, ken mabalin a kablaawan isuna dagiti Saksi ni Jehova.c Mabalinna pay ti agpatulong kadagiti panglakayen tapno makasubli iti kongregasion.

Agassawa a Saksi iti Kingdom Hall a naragsak a mangkomkomusta iti babai a naikkat iti kongregasion. — Mabalin latta nga umay iti gimongmi dagidiay naikkat iti kongregasion

No ngay Saksi latta ti asawa ken annak ti maysa a naikkat iti kongregasion? Uray no saanen nga agdaydayaw ken Jehova a kadua ti pamiliana, agkakapamiliada latta. Gapu ta agkakabbalayda, agtultuloy latta ti relasionna iti asawana ken kadagiti annakna, ken agiinnayatda latta.

Mabalin a kiddawen ti maysa a naikkat kadagiti panglakayen a bisitaenda isuna. No bisitaenda, mangtedda iti naayat a balakad a naggapu iti Biblia ken sidudungngo a kiddawenda nga agbabawi ken agsubli iti Dios. (Zacarias 1:3) No insardengnan dagiti dakes nga ar-aramidenna ken ipakpakitana a talaga a kayatnan a suroten dagiti bilin ti Biblia, mabalinna ti makasubli iti kongregasion. ‘Siaasi a pakawanen ken liwliwaen’ isuna ti kongregasion, kas iti inaramid idi dagiti Kristiano idiay Corinto idi nagbabawi ti maysa a nakabasol.—2 Corinto 2:6-8.

Ania ti rikna dagidiay dati a naikkat?

Kitaem ti imbaga ti dadduma a Saksi ni Jehova a dati a naikkat iti kongregasion ngem nagsubli iti Dios.

“Idi kayatkon ti agsubli iti kongregasion, kunak no damagen dagiti panglakayen ti amin nga inaramidko iti adu a tawen sipud naikkatak. Ngem imbagada lang, ‘Kayatmi nga agpokuska iti maaramidam ita,’ isu a nabang-aranak.”—Maria, United States.

“Maragragsakan ti kongregasion a nakasubliak. Nariknak a napategak latta. Imparikna dagiti kakabsat a napakawannakon ni Jehova, ken uray isuda. Kanayon met a nakasagana dagiti panglakayen a tumulong kaniak tapno mapatibkerko manen ti relasionko ken Jehova. Pinapigsada ti pakinakemko ken impakitada nga ay-ayatennak ni Jehova ken napategak latta kenkuana.”—Malcom, Sierra Leone.

“Maragsakanak ta ay-ayaten ni Jehova ti ilina, isu a sigsiguraduenna a kanayon a nadalus ti organisasionna. Mabalin nga ibilang ti dadduma a naulpit ti panangikkat. Ngem ti agpayso, kasapulan dayta ken panangipakita iti ayat. Agyamyamanak unay ta naayat ken manangpakawan ti Dios nga Amatayo idiay langit.”—Sandi, United States.

Komento dagiti eksperto iti linteg a saan a Saksi ni Jehova

Ania ti maibaga dagiti korte ken eksperto iti linteg maipapan iti panangikkat dagiti Saksi ni Jehova kadagiti saan nga agbabbabawi a nakabasol kadagiti kongregasionda? Kitaem dagiti komentoda.

“Rasonable laeng nga adda kalintegan ti maysa a narelihiosuan a grupo a mangikagkagumaan a mangsurot kadagiti prinsipio ti Biblia a mangikkat iti maysa a saan a mangsursurot kadagita a prinsipio no kasapulan. Saan laeng a rasonable dayta no di ket kasapulan. Ngamin, no saan a kayat ti maysa a suroten wenno saanna a masurot dagiti prinsipio ti Biblia, saanen a kualipikado nga agbalin a paset dayta a grupo. Ket no saan a maikkat, mabalin a maimpluensiaanna dagidiay mayat a mangsurot kadagita a prinsipio.”—The High Court of Justice, England and Wales, Hunio 7, 2019.
“Nakita dagiti korte iti Europe ken iti dadduma pay a lugar nga adda legal a kalintegan dagiti Saksi ni Jehova a mangikkat kadagiti saan nga agbabbabawi a nakabasol maibatay iti kalintegan nga inted ti konstitusion para iti wayawaya iti relihion. Awan pay ketdi ti kalintegan dagiti korte a makibiang kadagita a bambanag.”—Professor Paulo Pinto de Albuquerque, dati a hues ti European Court of Human Rights.

a Dati, aw-awaganmi iti nailaksid dagidiay saan nga agbabbabawi a nakabasol. Ngem ita, us-usarenmi ti sao a nausar iti Biblia a naikkat iti kongregasion.

b Dagiti panglakayen ket nataengan iti naespirituan a Kristiano a lallaki a mangisursuro iti Biblia. Kas papastor, tultulongan ken pabpabilgenda met ti ili ni Jehova. Awan ti sueldoda.—1 Pedro 5:1-3.

c Iti dadduma a nakaro a situasion, mabalin a pilien ti maysa ti pumanaw iti kongregasion ket padpadaksenna dayta ken upayenna wenno isungsongna dagiti adda iti kongregasion nga agaramid iti dakes. No kasta ti aramiden ti maysa a tao, sursurotenmi ti bilin ti Biblia a saanmi a “kablaawan.”—2 Juan 9-11.