SALUDSOD DAGITI AGTUTUBO
Kasano no Diak Kayaten ti Ageskuela?
Mabalin nga adda rasonmo no apay a saanmon a kayat ti ageskuela.a Istrikto kadi dagiti titsermo? Adda kadi kaeskuelaam a mangpilpilit kenka nga agaramid iti saan a nasayaat? Wenno mais-stress-ka kadi kadagiti eksam ken nakaad-adu nga asaynment? Kuna ti tin-edyer a ni Rachel:b
“Imbes nga ageskuelaak, kaykayatko laengen ti mapan idiay beach, makikadua kadagiti gagayyemko wenno tumulongak laengen kadagiti nagannakko nga agluto wenno agdalus!”
No kasla ken Rachel ti marikriknam, ibilbilangmo ngarud ti panageskuela a kasla pannakaibalud a masapul nga ibturam, ket mawayawayaanka laeng inton aggraduarkan. Adda kadi nasaysayaat a pangibilangam iti panageskuela?
Ammom kadi? No nasaysayaat ti pangibilangam iti panageskuela, makatulong dayta tapno mapanka ageskuela saan la a gapu ta kasapulam ti mapan no di ket gapu ta kayatmo. Pampanunotem pay ketdi no kuan a makatulong ti panageskuelam tapno mapasayaatmo dagiti paglaingam ken abilidadmo ket agbalinkanto a responsable nga adulto.
Tapno nasaysayaat ti pangibilangam iti panageskuela, panunotem dagitoy:
Dagiti masursurom. No ad-adu ti masursurom, mas kayamto a solbaren dagiti problemam, iti man pagtrabahuan wenno iti dadduma pay nga aspeto ti biag. Saankanto met a kanayon lattan nga agpatulong iti sabali. Isaludsodmo iti bagim, ‘Uray no adda dagiti saanko a kayat iti eskuelaan, ania dagiti masursurok sadiay a makatulong kaniak?’
Prinsipio ti Biblia: “Salaknibam ti praktikal a sirib ken abilidad nga agpanunot.”—Proverbio 3:21.
Para iti ad-adu pay nga impormasion, kitaem ti artikulo a “Kasano no Kanayon a Nababa ti Grades-ko?”
Dagiti mayugalim. Gapu kadagiti rutinam iti eskuelaan, masursurom nga usaren a naimbag ti tiempom, agbalinka a disiplinado, ken nagaget. Dagita a kualidad ti kasapulam inton adultokan. Isaludsodmo iti bagim: ‘Kasano a makatulong dagiti rutinak iti eskuelaan tapno maaddaanak iti disiplina iti bagi ken agbalinak a nagaget? Ania dagiti mabalinko nga aramiden tapno mapasayaatko dagita?’
Prinsipio ti Biblia: “Makagunggona ti tunggal kita ti napinget a panagtrabaho.”—Proverbio 14:23.
Para iti ad-adu pay nga impormasion, kitaem ti artikulo a “Kasanok nga Usaren a Naimbag ti Tiempok?”
Ti pannakilangenmo iti dadduma. No makilanglangenka kadagiti kaklasem, masursurom ti makipagrikna ken agbalin a narespeto. “Nagpateg ti panagsursuro a makikomunikar ta kasla dayta iti panagsursuro iti history ken science. Tungpal-biagmo a mausar dayta,” kuna ti baro a ni Joshua. Isaludsodmo iti bagim, ‘Ania dagiti nasursurok iti eskuelaan maipapan iti pannakilangen, uray kadagidiay saanko a kapada ti kultura, kapadasan, naggapuan, wenno patpatien?’
Prinsipio ti Biblia: “Ikagumaanyo ti makikappia iti amin a tattao.”—Hebreo 12:14.
Para iti ad-adu pay nga impormasion, kitaem ti artikulo a “Kasano a Lumaingak a Makisarita?”
Ti masakbayam. Makatulong ti panageskuela tapno makitam dagiti paglaingam ken mapilim ti kayatmo a pagbalinan. Kuna ti balasang a ni Brooke: “Kas kaniak, posible a ma-train-ka pay ketdi iti maysa a paglaingan, ket inton aggraduarka, mabalinmon ti agtrabaho.” Isaludsodmo iti bagim: ‘Kasanok a suportaran ti bagik no makagraduarakon? Kasanok a masigurado a maibagay ti adalek iti kayatko a trabaho?’
Prinsipio ti Biblia: “Ammuem no sadino ti pagturongam.”—Proverbio 4:26, Contemporary English Version.
a Adu kadagiti prinsipio a nailawlawag iti daytoy nga artikulo ket makatulong met kadagiti agtutubo nga ages-eskuela iti balayda.
b Nabaliwan ti dadduma a nagan.