Ania ti Kuna ti Biblia Maipapan iti Panagassawa ti Agduma ti Pulina?
Sungbat ti Biblia
Anamongan ti Dios ti panagassawa ti lalaki ken babai nga agduma ti pulina ta amin a puli ket padapada iti imatang ti Dios. Kuna ti Biblia: “Awan tao nga idumduma ti Dios . . . , uray ania a puli ti nagtaudanna.”—Aramid 10:34, 35, Ti Baro a Naimbag a Damag Biblia.
Usigem ti sumagmamano kadagiti dadduma pay a prinsipio iti Biblia maipapan iti panagpapada dagiti puli ken panagassawa.
Maymaysa ti nagtaudan dagiti amin a puli
Amin a puli ket nagtaud iti immuna a tao a ni Adan, ken iti asawana a ni Eva, nga inawagan ti Biblia kas “ina ti isuamin a sibibiag.” (Genesis 3:20) Gapu iti daytoy, kuna ti Biblia maipapan iti Dios: “Manipud iti maysa a tao inaramidna ti tunggal nasion dagiti tattao.” (Aramid 17:26) Amin a tattao, aniaman ti pulida, ket paset ti maymaysa a pamilia. Ngem kasano no nakaro ti panangidumduma iti puli iti lugaryo?
Dagiti masirib a tattao “agiinnuman a sangsangkamaysa”
Nupay anamongan ti Dios ti panagassawa dagiti agduma ti pulina, saan a kasta ti panangmatmat ti amin a tattao. (Isaias 55:8, 9) No kayatmo ti makiasawa iti sabali ti pulina, masapul a pagsaritaanyo ken ti pakiasawaam dagiti sumaganad:
Kasano no laisendakayto dagiti kalugaranyo wenno ti pamiliayo?
Kasanonto a matulonganyo dagiti annakyo a mangsango iti panangidumduma?
Ti ‘panagiinnuman a sangsangkamaysa’ ket makatulong tapno agballigi ti panagassawayo.—Proverbio 13:10; 21:5.