Mamati Kadi Dagiti Saksi ni Jehova iti Siensia?

Dakkel ti respeto ken panangipategmi kadagiti naaramidanen ti siensia ken mamatikami kadagiti nadiskobre ti siensia a naibasar kadagiti ebidensia.

“Ti siensia ket ti panangadal iti pakabuklan ken kababalin dagiti bambanag ken dagiti impormasion a maammuantayo maipapan kadagita.” (Collins Cobuild Advanced Learner’s English Dictionary) Ti Biblia ket saan a libro maipapan iti siensia, ngem ibagbagana kadagiti tattao nga adalenda ti nakaparsuaan ken no kasano a makatulong kadakuada dagiti naammuanen ti tao nga adda koneksionna iti siensia. Kitaentayo ti dadduma a pagarigan:

• Astronomy: “Itangadyo dagiti matayo sadi ngato ket kitaenyo. Siasino ti namarsua kadagitoy a banag? Isu Daydiay mangiruruar iti buyotda sigun a mismo iti bilang, isuda amin awaganna sigun a mismo iti nagan.”​—Isaias 40:26.

• Biology: Imbaga ni Solomon ti “maipapan kadagiti kayo, manipud iti sedro nga adda idiay Libano agingga iti hisopo a tumpuar iti pader; ket isu agsao maipapan kadagiti animal ken maipapan kadagiti agtaytayab a parsua ken maipapan iti aggargaraw a bambanag ken maipapan kadagiti ikan.”—1 Ar-ari 4:33.

• Medicine: “Dagidiay nasalun-at saanda a kasapulan ti mangngagas, no di ket dagidiay masaksakit.”—Lucas 5:31.

• Meteorology: “Nastrekmo kadin ti pagiduldulinak kadagiti niebe ken yelo? . . . Paggapuan ti angin iti daya?”—Job 38:22-​24, Ti Baro a Naimbag a Damag Biblia.

Iparparegta dagiti publikasionmi ti panangrespeto iti siensia. Mabasa kadagita dagiti artikulo maipapan iti nakaparsuaan ken dagiti nadiskobren ti siensia. Ibagbaga met dagiti Saksi a nagannak kadagiti annakda nga agadalda tapno mas maawatanda ti mapaspasamak iti aglawlawda. Adda met dagiti Saksi ni Jehova a ti trabahoda ket adda koneksionna iti siensia, kas iti biochemistry, mathematics, ken physics.

Ti saan a maaramidan ti siensia

Saankami a mamati a masungbatan ti siensia ti amin a saludsod dagiti tattao.a Kas pagarigan, ad-adalen dagiti geologist no ania ti nakaaramidan ti planeta a daga, ken ad-adalen met dagiti biologist no kasano ti panagandar ti bagi. Ngem apay a nakasaysayaat a pagyanan ti daga, ken apay a nagmayat la unay ti panagtutunos dagiti parte ti bagitayo nga agtrabaho?

Nakitami a ti laeng Biblia ti makaited iti kasayaatan a sungbat kadagita a saludsod. (Salmo 139:13-16; Isaias 45:18) Isu a mamatikami a ti nasayaat nga edukasion ket ti panagsursuro manipud iti siensia ken iti Biblia.

No dadduma, agparang a kasla agkontra ti siensia ken ti Biblia. Ngem gapu laeng iti kamali a pannakaawat iti isursuro ti Biblia ti rason iti dadduma kadagita. Kas pagarigan, saan nga isursuro ti Biblia a naparsua ti lubong iti 6 nga aldaw a sag-24 nga oras.—Genesis 1:1; 2:4.

Adda dagiti teoria, nga ibagbagada a naibatay iti siensia, a kurang ti ebidensiana ken saan nga awaten ti dadduma a mararaem a sientista. Kas pagarigan, gapu ta makita iti lubong nga adda a talaga ti nangdisenio kadagiti bambanag, patienmi met ti patpatien ti adu a biologist, chemist, ken dadduma pay a saan a timmaud dagiti sibibiag a bambanag babaen ti ebolusion.