Babai a mangibagbaga iti nasakit a sasao iti sabali a babai

SALUDSOD DAGITI AGTUTUBO

Ania ti Aramidek no Sinaktannak ti Gayyemko?

Ti masapul a maammuam

Awan ti perpekto a relasion ti tao. Gapu iti kinaimperpekto, mabalin a makaaramid wenno makaibaga ti nasingpet a gayyemmo—uray ti ibilbilangmo a kadekketan a gayyem—iti pakasaktam. Siempre, imperpektoka met. Isu a mabalin nga adda met dagiti tiempo a napasaktam ti dadduma.—Santiago 3:2.
Mabalin a nalaklakaka a masaktan gapu iti internet. Kas pagarigan, kuna ti tin-edyer a ni David: “No naka-online-ka ket makitam dagiti picture ti gayyemmo iti maysa a gathering, mabalin a mapanunotmo no apay a dika naimbitaran. Isu a mariknam a kasla saandaka a kayat ket malidayanka.
Masursurom a sanguen ti problema.

Ti mabalinmo nga aramiden

Sukimatem ti bagim. Kuna ti Biblia: “Dika agdarasudos iti espiritum nga agrurod, ta ti panagrurod isu ti agsaad iti saklot dagidiay maag.”—Eclesiastes 7:9.

“No dadduma, mabigbigmonto kalpasanna a ti nakasaktam ket bassit met laeng a banag.”—Alyssa.

Panunotem: Masansan kadi nga arsagidka unay? Mabalinmo kadi a sursuruen ti agbalin a naan-anus kadagiti pagkapuyan ti sabsabali?—Eclesiastes 7:21, 22.

Panunotem dagiti pagimbagan ti panangpakawan. Kuna ti Biblia: “Kinapintas . . . ti panangpalabas iti salungasing [wenno, kamali].”—Proverbio 19:11.

“Uray no adda kalintegam nga agreklamo, nasayaat no situtulokka a mangpakawan. Kaipapananna a saanmon a kanayon nga ipalpalagip ti kamali ti gayyemmo tapno agpadispensar tunggal ibagam dayta. No pinakawanmon, lipatemon dayta.”—Mallory.

Panunotem: Kasdiay kadi kagrabe ti napasamak? Mabalin kadi a mangpakawanka lattan tapno adda talna?—Colosas 3:13.

Panangpastrek iti nalamiis nga angin iti nabara a kuarto — No kanayonmo nga ipalagip ti amin a problemayo nga aggayyem, arigna nga ulit-ulitem a luktan ti ridaw ti napabara a kuarto tapno sumrek ti nalamiis nga angin

Panunotem ti nakasakit kenka. Kuna ti Biblia: “Itultuloyyo a kitaen, saan a ti personal a panaginteres iti laeng bukodyo a bambanag, no di ket kasta met ti personal a panaginteres iti bambanag ti sabsabali.”—Filipos 2:4.

“No aginnayat ken agrinnespetokayo nga aggayyem, adda nabileg a rason tapno solbarenyo a dagus dagiti problemayo ta nagrigrigatanyo ti panaggayyemyo ket saanyo a kayat a madadael dayta.”—Nicole.

Panunotem: Adda kadi makitam a pagimbagan ti kapanunotanna?—Filipos 2:3.

Laglagipem: Maysa a paglaingan no ammom a sanguen ti nasaktan a riknam ket makatulong dayta inton adultokan. Apay a dimo sursuruen dayta itan?