SALUDSOD DAGITI AGTUTUBO
Kasanok nga Usaren a Naimbag ti Tiempok?
Apay a masapul nga usarem a naimbag ti tiempom?
Ti tiempo ket kas iti kuarta. No ibusem, awanton ti usarem no kasapulam dayta. Ngem no ibadyetmo ti tiempom, adda pay mabati nga usarem kadagiti banag a paggugustom!
Prinsipio ti Biblia: “Adda dagiti tarigagay ti sadut, kaskasdi nga awan ti magun-odna, ngem naan-anayto a mapnek ti nagaget.”—Proverbio 13:4.
Ti punto: No usarem a naimbag ti tiempom, ad-adu ti wayawayam, saan a basbassit.
Ti panangusar a naimbag iti tiempo ket maysa a napateg a paglaingan a mausarmo inton adultokan. Dakkel met ti papel dayta iti panagtalinaed wenno pannakaikkatmo iti trabaho. Ta ti agpayso, no adda negosiom, kayatmo kadi nga agtalinaed ti empleado a kanayon a maladaw a sumrek?
Prinsipio ti Biblia: “Ti mapagtalkan iti bassit, mapagtalkan met iti dakkel.”—Lucas 16:10.
Ti punto: Ti abilidadmo a mangusar a naimbag iti tiempom ipakitana no aniaka a klase ti tao.
Ngem iti kinapudnona, saan a nalaka ti panangusar a naimbag iti tiempo. Kitaem ti sumagmamano a lapped.
Lapped #1: Gagayyem
“No awisendak dagiti gagayyemko a mapan agpasiar, dandani kanayon a pagustuak ida uray no awan met a talaga ti tiempok. Pampanunotek no kua, ‘alistuakto lattan nga ileppas dayta inton makaawidak.’ Ngem kanayon a saan a mapasamak dayta ket saan a nasayaat ti resultana.”—Cynthia.
Lapped #2: Makaistorbo a banag
“Ti TV ket kasla vacuum cleaner. Susopennaka babaen kadagiti pabuya ken pelikula a narigat a liklikan.”—Ivy.
“Nagadu nga oras ti maibusko iti tablet-ko. Makonkonsiensiaak no agsardengak laeng inton malobat daytan.”—Marie.
Lapped #3: Panangitungtungkua
“Itungtungkuak dagiti asaynmentko iti eskuelaan ken dagiti banag a masapul nga ileppasko. Ib-ibusek ti tiempok kadagiti saan a napateg a banag agingga nga idardaraskonton nga ileppas ti asaynmentko. Nakamadmadi daytoy a pamay-an ti panangusar iti tiempo.”—Beth.
No usarem a naimbag ti tiempom, ad-adu ti wayawayam, saan a basbassit
Ti mabalinmo nga aramiden
Ilistam dagiti masapul nga aramidem. Karaman kadagita dagiti trabahom iti balay ken dagiti asaynmentmo. Isuratmo no kasano kapaut ti kasapulam a tiempo tapno maileppasmo ti tunggal aramidem iti gagangay a lawas.
Prinsipio ti Biblia: ‘Siguraduenyo ti napatpateg a bambanag.’—Filipos 1:10.
Ilistam dagiti aktibidad a kayatmo nga aramiden iti nawaya a tiempom. Karaman kadagitoy dagiti aktibidad a kas iti panaglukat iti social network ken panagbuya iti TV. Isuratmo met no mano nga oras ti busbosem iti tunggal aktibidad iti gagangay a lawas.
Prinsipio ti Biblia: “Itultuloyyo ti agbalin a masirib . . . , nga usarenyo ti tiempoyo iti kasayaatan a pamay-an.”—Colosas 4:5.
Agplanoka. Repasuem ti inaramidmo a dua a listaan. Adda kadi umdas a tiempo a nailatang para kadagiti importante nga aktibidad? Masapul kadi a gumatangka iti tiempom manipud kadagiti tiempo ti panaglinglingaymo?
Tip: Mangaramidka iti listaan dagiti aramidem iti inaldaw, sa itsekmo ti tunggal aktibidad a nalpasmo.
Prinsipio ti Biblia: “Sigurado nga agballigi dagiti plano ti nagaget.”—Proverbio 21:5.
Surotem ti implanom. Agpayso a mabalin a pagkedkedam dagiti awis tapno maileppasmo dagiti napapateg a banag. Ngem pagangayanna, makitamto nga ad-adunton ti nawaya a tiempom ket ad-adda a ma-enjoy-mo dayta.
Prinsipio ti Biblia: “Agbalinkayo a nagaget, dikay agpataypatay iti aramidyo.”—Roma 12:11, footnote.
Ikkam iti premio ti bagim—ngem saan a dagus. Kuna ti agtutubo a ni Tara: “No dadduma, aramidek ti dua a banag iti listaan dagiti aramidek sa panunotek, ‘OK, mabalinakon nga agbuya iti TV iti 15 a minuto sa agtrabahoakto manen.’ Ngem ti 15 a minuto ket nagbalin a 30, ken ti 30 a minuto ket nagbalin a maysa nga oras, ket diak napupuotan a dua nga oras gayamen ti naibusko nga agbuya iti TV!”
Ti solusion? Ibilangmo ti panaglinglingay kas premio iti panangileppasmo kadagiti trabahom—saan a kas automatiko a paset ti aldawmo.
Prinsipio ti Biblia: “Awanen ti nasaysayaat iti maysa a tao no di ti . . . mangtagiragsak iti bunga ti napasnek a panagtrabahona.”—Eclesiastes 2:24.