Simmardengda Tapno Tumulong

Agmanmaneho ni Bob iti agarup 100 a kilometro kada oras bayat ti makapaketter ken naangin nga aldaw iti Alberta, Canada, idi pagammuan ta bimtak ti makinlikud a kannigid a pilid ti luganna. Idi damo, saan nga ammo ni Bob ti napasamak, isu nga intultuloyna ti nagmaneho iti lima pay a kilometro (3 mi) nga agturong iti balayna.

Iti surat nga inyadresna iti Kingdom Hall dagiti Saksi ni Jehova iti lugarda, inlawlawag ni Bob ti simmaruno a napasamak. Insuratna: “Adda lima nga agtutubo a nakalugan iti kotse nga immabay iti agtartaray a luganko. Imbabada ti tawada sa imbagada a bimtak ti pilid ti luganko. Simmardengkami iti igid ti haywey ken imbagada a sukatanda dayta. Diak idi ammo no adda reserba a pilid wenno jack ti luganko. Bayat a nakatugawak iti wheelchair iti igid ti haywey, kinitada ti sirok ti luganko ket nakitada ti reserba a pilid ken ti jack, isu a sinukatanda ti pilid. Makapaketter ti paniempo ken napigsa ti panagtinnag ti niebe. Desente ti badoda ngem tinulongandak latta nga agsukat iti pilid isu a naituloyko ti panagmanehok nga agawid. Diak naaramid dayta no sisiak.

“Pagyamanan unay iti lima nga agtutubo a Saksi a timmulong kaniak. Addada idi iti dayta a lugar tapno mapanda mangasaba iti binalaybalay. Talaga nga ar-aramidenda ti ikaskasabada. No saandak a tinulongan, narigatanak koma isu nga agyamanak unay iti inaramidda. Asino koma ti mangipagarup nga adda dagiti kasla anghel nga agtutubo iti dayta a haywey iti daydi nga aldaw?”