TULONG PARA ITI PAMILIA
Panangtulong Kadagiti Annak No Mapaayda
Addanto tiempo a mapaay wenno saan nga agballigi dagiti annakyo. Kasanoyo a tulongan ida a makabangon?
Ti masapul a maammuanyo
Paset ti biag ti pannakapaay. Ibaga ti Biblia a “maitibkoltayo amin.” (Santiago 3:2) Maitibkol, wenno agkamali, met dagiti ubbing. Ngem adda pagsayaatan ti pannakapaay—mangted dayta iti gundaway tapno makasursuro dagiti ubbing no maipasangoda iti narigat a kasasaad. Saan a nayanak dagiti annak nga addaan iti dayta nga abilidad, ngem masursuroda dayta. Kuna ti ina a ni Laura: “Nakitami ken lakayko a nasaysayaat no masursuro dagiti annakmi a sanguen ti pannakapaay imbes nga agpammarangkami a saan a napasamak dayta. Masursuroda no kasano ti aganus no saan a mapasamak ti ninamnamada.”
Saan nga ammo ti adu nga ubbing no kasano a sanguen ti pannakapaay. Dadduma nga ubbing ti saan a nakasursuro a mangsango iti pannakapaay gapu ta iparparikna dagiti nagannakda nga awan ti basolda. Kas pagarigan, no nababa ti grado ti anakda, ti maestro wenno maestra ti dagus a pabasolen ti dadduma a nagannak. No nagapa ti anakda ken ti gayyemna, dagus a pabasolen dagiti nagannak ti gayyemna.
Ngem kasano a masursuro dagiti annak nga admitiren dagiti kamalida ken ilintegda dagita no protektaran ida dagiti nagannakda iti epekto dagiti kamalida?
Ti mabalinyo nga aramiden
Isuroyo kadagiti annakyo nga adda epekto ti amin nga aramidenda.
Kuna ti Biblia: “Aniaman nga imulmula ti maysa a tao, daytanto met ti apitenna.”—Galacia 6:7.
Adda resulta dagiti aramidtayo. No adda madadaelmo, bayadam. No adda kamalim, adda saan a nasayaat nga epektona. Masapul nga ammo dagiti annak nga adda epekto ti aniaman nga aramidenda ken adda sungsungbatanda iti napasamak. Isu a saankayo nga agpabasol iti sabali wenno ikalinteganyo ti inaramid ti anakyo. Imbes ketdi, bay-anyo a mapadasanna ti epekto ti inaramidna a maitutop iti edadna. Masapul a maawatan met ti anak a ti di umiso nga inaramidna ti makagapu iti problema.
Tulonganyo dagiti annakyo a mangbirok iti solusion.
Prinsipio ti Biblia: “Uray mamimpito a matuang ti nalinteg, tumakderto manen.”—Proverbio 24:16.
Nasakit ti mapaay, ngem saan a dayta ti pagpatinggaan ti amin. Tulonganyo ti anakyo a mangbirok kadagiti solusion imbes a panunotenna a kasla saan nga umiso ti napasamak. Kas pagarigan, no saan a nakapasa ti baroyo iti eksaminasion, tulonganyo nga agballigi babaen ti panangipasnekna nga agadal ken saysayaatenna inton maminsan. (Proverbio 20:4) No nakaapa ti balasangyo ti gayyemna, tulonganyo no kasano a makikappia uray saan nga isu ti nakabasol.—Roma 12:18; 2 Timoteo 2:24.
Isuroyo ti annakyo nga agbalin a napakumbaba.
Prinsipio ti Biblia: “Ibagak kadakayo amin dita a saankayo nga agpanunot iti nalablabes maipapan iti bagiyo ngem iti maiparbeng a panunotenyo.”—Roma 12:3.
Saan a realistiko wenno makatulong no ibagayo iti anakyo nga isu ti “kalaingan.” Ngamin, uray ti nalaing nga ubing iti eskuelaan ket saan a kanayon a makaala iti nangato a grado. Ken saan a kanayon a mangabak ti ubing a nalaing iti maysa a kita ti isports. Nalaklaka a makarekober manipud iti pannakapaay ken saan a panagballigi ti ubing a saan a nangato ti panangmatmatna iti bagina.
Kuna ti Biblia nga agbalintayo a natibtibker ken naan-anus no maipasangotayo iti rigat. (Santiago 1:2-4) Isu nga uray no makapadismaya ti pannakapaay wenno saan a panagballigi, matulonganyo ti anakyo a maaddaan iti umiso a panangmatmat kadagita.
Kas iti panagsursuro iti maysa a paglaingan, kasapulan ti panawen ken panagregget iti panangisuro iti ubing a mangsango iti narigat a kasasaad. Ngem adda pagsayaatanna dayta inton tin-edyerdan. Kuna ti libro a Letting Go With Love and Confidence: “Dagiti tin-edyer a nalaing a mangsango iti narigat a kasasaad ket dakdakkel ti posibilidadna a saan a nadarasudos nga agdesdesision. Ammoda ti ar-aramidenda iti baro ken di ninamnama a situasion.” Siempre, ti panangsangoda kadagiti narigat a kasasaad ket makatulong uray inton adultodan.
Tip: Mangipasdekkayo iti ulidan. Laglagipenyo a ti panangsangoyo iti pakadismayaanyo ket makatulong tapno masanay dagiti annakyo a mangsango met kadagiti bukodda a pakadismayaan.