Dagiti Kanta a Mangpaasideg iti Riknatayo iti Dios

Ti musika ket nagsayaat a regalo ni Jehova. Apektaranna ti panunottayo, ti riknatayo, ken pabilgennatayo. Kasta ti epekto dagiti orihinal a kanta. Kinapudnona, saan la a dayta ti maaramidan dagitoy a kanta: paasidegenda pay ti riknatayo ken Jehova.

Nanipud 2014, addan naaramid a nasurok a 70 nga orihinal a kanta, ken ti maysa kadagita ket available-n iti nasurok a 500 a lengguahe! Ngem baka mapampanunotmo, ‘Sino ti mangar-aramid kadagitoy a kanta, ken kasano a maar-aramid dagita?’

No Kasano a Maar-aramid Dagiti Kanta

Dagiti orihinal a kanta ket ar-aramiden ti music team iti Audio/Video Services, nga iwanwanwan ti Teaching Committee ti Bagi a Manarawidwid. Adda 13 a kakabsat iti dayta a team a tumultulong iti panag-compose ken panagyeskediul. Agserbida met kas music engineer, ken production support. Inaprobaran met ti Teaching Committee nga adda dagiti remote volunteer manipud iti agduduma a paset ti lubong a tumulong iti trabaho, a pakairamanan dagiti composer, musician, ken singer. Sipapakumbaba nga us-usaren dagitoy a kakabsat dagiti talentoda ken saanda a kayat nga isuda ti mapadayawan.

Kasano a maar-aramid ti orihinal a kanta? Umuna, desisionan ti Teaching Committee no ania a teksto ti pakaibatayan ti kanta ken no ania ti epektona iti dumdumngeg. Kalpasanna, i-assign ti music team no asino ti ag-compose ken agsurat iti lyrics. Maisagana ti sampol a rekording. Irebiu dayta ti Teaching Committee ken mangipaayda kadagiti suhestion. Sa i-adjust dayta ti music team ken irekordda ti final a bersion. Nagduduma ti nakairekordan dagitoy a kanta, a pakairamanan dagiti pasilidad ti Bethel ken dagiti mismo a balay dagiti boluntario.

Tapno ma-compose ken mairekord dagiti orihinal a kanta, kasapulan dagiti kakabsat dagiti digital audio workstation, music notation program, audio library, ken dadduma pay. Kasapulanda met dagiti equipment kas iti musical instrument, mixing console, amplifier, speaker, ken microphone. Ti presio ti maysa a microphone ket $100 (wenno ₱5,000) agingga iti nasurok a $1,000 (wenno nasurok a ₱50,000). Idi 2020, nakagastotayo iti $116,000 (wenno nasurok a ₱5 milion) para iti music-recording equipment.

Ania ti maar-aramid tapno makainuttayo iti pondo? Imbes a mangbukel iti dakkel a music team iti Bethel, maus-usar ti adu a remote volunteer. Maysa pay, imbes a live nga agirekordda kas maysa nga orkestra, agus-usar dagiti kakabsat iti computer program nga ag-compose ken agpataud iti musika.

“Dagitoy ti Mangmangted iti Naespirituan a Pigsa”

Maen-enjoy dagiti kakabsat a denggen dagiti orihinal a kanta. Kuna ni Tara, a taga-Germany: “No madandanaganak, makaparelaks dagiti kanta. No dengdenggek dagita iti lengguahek, kasla ar-arakupennak ni Jehova.” Kuna met ni Dmitry a taga-Kazakhstan: “Kaykayatko a denggen dagitoy a kanta gapu ta saankon a pagdanagan no adda linaonda a maikontra kadagiti prinsipio ti Biblia. Makatulong met dagitoy a kanta tapno makapokusak kadagiti naespirituan a bambanag.”

Kastoy met ti komento ni Delia, a taga-South Africa, maipapan kadagiti orihinal a kanta: “Dagitoy ti mangmangted kaniak iti naespirituan a pigsa. No madepdepresak wenno adda problemak, kanayon nga adda maysa a kanta nga eksakto iti situasionko. Masansan a dagiti laengen tono ti kanta ket umanayen a mangbaliw iti mood-ko!”

Dadduma nga orihinal a kanta ket nagbalin a paborito ti kakabsat. Imbaga ni Lerato, a taga-South Africa met laeng: “Dagiti kanta a ‘Dayta ket Asidegen’ ken ‘Idiay Paraiso’ tultulongannak a mangimadyin iti bagik inton sabatekon ti nagungaren nga ay-ayatek nga ina. Tunggal denggek dagitoy a kanta, kasla makitkitak isuna nga agtartaray nga umay umarakup kaniak.”

Natulongan met ti maysa nga orihinal a kanta ti tin-edyer a taga-Sri Lanka. Kunana: “Pinabainannak ti science teacher-ko iti sango dagiti kaklasek gapu ta maysaak a Saksi ni Jehova. Nagbutengak ken diak ammo ti ibagak. Idi nagawidak, imbaga ni Nanang a denggek ti kanta nga ‘Study Makes You Strong.’ Natulongannak daytoy a kanta a mang-realize a kasapulak ti ag-research ken agsagana iti sungbatko. Iti sumaruno nga aldaw, nakisaritaak iti teacher-ko. Dimngeg ken inapresiarna dagiti patpatien dagiti Saksi ni Jehova. Agyamanak iti organisasion ni Jehova gapu iti panangitedna kadagita a makapabileg a kanta.”

Paggapgapuan dagiti pondo iti pannakaaramid dagitoy a kanta? Babaen kadagiti donasion para iti sangalubongan a trabaho, a kaaduanna kadagita ket mait-ited iti pamay-an a makita iti donate.jw.org. Pagyamanan iti nabuslon a donasionyo.