Mapagtalkan ken Makapabileg a Damdamag

Ipatpateg unay dagiti Saksi ni Jehova dagiti kapammatianda. (1 Pedro 2:17) Adu kadatayo ti makarikna iti marikrikna ti sister nga agnagan Tannis a taga-Kenya. Kunana, “Kaykayatko a maammuan ti mapaspasamak kadagiti patpatgek a kakabsat iti intero a lubong.” Kasano nga ammo da Tannis ken ti minilion a dadduma pay a Saksi ti mapaspasamak kadagiti kakabsatda? Manipud idi 2013, maam-ammuantayon dagita nga impormasion manipud iti seksion a Newsroom iti website-tayo a jw.org.

Mabasa iti Newsroom dagiti mapagtalkan a report maipapan kadagiti Saksi ni Jehova kadagiti topiko a kas iti pannakairuar ti baro a Biblia, panangsaranay kadagiti nadidigra, proyekto a panagibangon, ken dadduma pay a napapateg a pasamak. Maammuantayo met ti maipapan kadagiti naibalud a kakabsattayo gapu iti pammatida. Naglaon pay ti Newsroom kadagiti makaparegta a kapadasan a konektado kadagiti kampania a panangasaba ken panangselebrar iti Memorial. Siasino dagiti mangres-research kadagitoy baro nga artikulo, ken kasanoda nga isagsagana dagita?

Panangpili ken Pangireport Kadagiti Baro a Damag

Ti Newsroom ket iwanwanwan ti Office of Public Information (OPI). Daytoy a departamento ket masarakan iti sangalubongan a hedkuarter ken adda iti babaen ti Coordinators’ Committee ti Bagi a Manarawidwid. Ti OPI ket buklen ti nasurok a 100 a kakabsat—adu kadakuada ti remote volunteer—a pakairamanan dagiti writer, researcher, visual artist, ken translator. Dadduma kadakuada ti mangkontak kadagiti opisial ti gobierno, propesor ken titser, ken ti media. Ti OPI ket supsuportaran ti nasurok a 80 a Public Information Desks (PID) kadagiti sangay iti intero a lubong.

Tapno maisagana dagiti news item, makitintinnulong ti OPI kadagiti PID. No nakapilin dagiti kakabsattayo iti maysa a topiko, ag-research-da maipapan iti dayta sa agkolektada kadagiti mapagtalkan nga impormasion. Mabalin a ramanen daytoy ti pananginterbiu ken pannakisarita kadagiti eksperto. No naurnongdan dagiti impormasion, maisuraten ti news article, ma-edit, ma-proofread, sa maikkan kadagiti piktiur kas ilustrasion. Kalpasanna, maipatulod dayta iti Coordinators’ Committee tapno maaprobaran.

Dagiti Ebkas ti Panagyaman

Ania ti panagrikna dagiti kakabsattayo maipapan iti Newsroom? Imbaga ti sister a ni Cheryl a taga-Pilipinas, “Talaga a magusgustuak a rugian ti aldawko babaen ti panagbasa kadagiti damag maipapan iti organisasion ni Jehova ken iti ilina.”

Adu nga agbasbasa ti nangibaga a naiduma ti jw.org Newsroom no ikompara iti dadduma a news media. Kinuna ni Tatiana a taga-Kazakhstan: “Agyamyamanak ta makapagtalekak kadagiti damag iti jw.org. Mapangnamnamaan ken umiso dagita.” Imbaga ti sister nga agnagan Alma a taga-Mexico: “No ikompara kadagiti makapadanag a damag manipud iti media, makaparegta unay ti Newsroom.”

Saan laeng a mapagtalkan ti Newsroom, no di ket makapabileg pay. Imbaga ni Bernard a taga-Kenya: “Natulongannak ti Newsroom a mangibilang kadagiti kakabsat iti intero a lubong kas kapamiliak, sadinoman ti ayanda. Mairamanko pay kadagiti kararagko ti naganda ken dagiti espesipiko a situasionda.” Kuna met ti sister nga agnagan Bybron a taga-Kenya: “Maragragsakanak no adda makitak nga artikulo maipapan iti pannakairuar ti Biblia iti sabali a lengguahe! Ipalagip kaniak dagitoy nga artikulo a saan a mangidumduma ni Jehova.”

Makaparegta uray dagiti damag maipapan kadagiti maidaddadanes a kakabsat. “No pampanunotek ti kinaturedda, talaga a mapabpabileg ti pammatik,” kuna ni Jackline a taga-Kenya. “Kanayonko a pampanunoten no ania ti nakatulong kadakuada nga agibtur. Naammuak a ti ‘simple’ a bambanag kas iti panagkararag, panagbasa iti Biblia, ken uray panagkanta ket dakkel ti naitulongna iti panagtultuloy a nabileg dagiti kakabsat.”

Ap-apresiaren ti sister nga agnagan Beatriz a taga-Costa Rica dagiti damag maipapan kadagiti natural a didigra. Kunana: “Gapu iti Newsroom, naammuak no kasano nga ipapaay ti organisasiontayo dagiti kasapulan ti kakabsattayo iti napartak, epektibo, ken naayat a pamay-an. Kombinsidoak a daytoy ti organisasion ni Jehova.”

Maragragsakantayo ta maammuantayo dagiti kabaruan a damag maipapan kadagiti kakabsattayo iti intero a lubong! Saan a posible daytoy no awan dagiti donasionyo para iti sangalubongan a trabaho, nga adu kadagita ket maar-aramid babaen ti donate.jw.org. Pagyamanan iti nabuslon a donasionyo.