2. Basoltayo Kadi ti Panagsagabatayo?

No Apay a Napateg a Maammuam ti Sungbat

No wen, kabaelantayo ngarud koma a kissayan ti panagrigrigattayo.

Panunotem

Kasano kadakkel ti sungsungbatan ti tao kadagiti sumaganad a pakaigapuan ti panagrigrigat?

Panangabuso.

Tinantia ti World Health Organization (WHO) a 1 iti kada 4 nga adulto ti nakapadas a mamaltrato idi ubingda ken 1 iti kada 3 a babbai ti nakapadas iti pisikal wenno seksual a pannakaabuso (wenno agpada).
Panangpapatay.

Sigun iti World Health Statistics 2018, nga impablaak ti WHO, “natantia nga adda 477,000 a napapatay iti intero a lubong idi 2016.” Saan pay a karaman dita ti 180,000 a naipagarup a napapatay kadagiti gubat iti dayta a tawen.
Sakit.

Imbaga ti mannurat a ni Fran Smith iti maysa nga artikulo a naipablaak iti magasin a National Geographic: “Nasurok a maysa a bilion ti agsigsigarilio, ken maysa ti tabako kadagiti makagapu iti lima a kangrunaan a pakaigapuan ti ipapatay: sakit iti puso, istrok, respiratory infection, chronic obstructive pulmonary disease, ken kanser iti bara.”
Panangidumduma.

Kuna ti sikologo a ni Jay Watts nga “umad-adu dagiti madepdepres gapu iti kinapanglaw, pannakaipababa gapu iti kasasaad ti biag, puli, sekso, kasta met ti pannakapapanawda iti lugarda, ken kompetision.”

AMMUEM TI AD-ADU PAY

Buyaem ti video nga Apay a Pinarsua ti Dios ti Daga? iti jw.org/ilo.

Ti Kuna ti Biblia

Ti lalaki a nailadawan itay nga addan iti ospital. Timmallikud ti baketna bayat nga ibagbaga ti doktor ti di nasayaat a damag maipapan iti salun-atna.

Basol ti tao ti kaaduan a panagsagaba iti lubong ita.

Kaaduan kadagitoy ket gapu iti abusado a gobierno a mangparparigat kadagiti tattao nga ibagbagada a pagserserbianda.

“Iturturayan ti tao ti padana a tao iti pakadangranna.”—ECLESIASTES 8:9.

Mabalin a kissayan ti panagsagaba.

Makatulong dagiti prinsipio ti Biblia tapno maaddaantayo iti nasaysayaat a salun-at ken nataltalna a relasion kadagiti sabsabali.

“Ti kalmado a puso mangted iti biag iti bagi, ngem ti imon ti mangrunot iti tulang.”—PROVERBIO 14:30.

“Ikkatenyo kadakayo ti amin a kita ti sakit ti nakem, panagunget, panagpungtot, panagbugkaw, nasakit a panagsasao, ken amin a banag a makapainsulto.”—EFESO 4:31.