Sagrado a Serbisio ti Insukatko iti Naulimek a Serbisio

Kas insalaysay ni Andrew Hogg

“No bilang ta nasken nga usarentayon dagiti nuklear nga armastayo,” kuna ti komandante ti submarinomi, “kaipapananna a napaaytayon iti misiontayo.” Gapu iti dayta, nagbalin a topiko dagiti saritaan no maiparbeng wenno saan ti nuklear a pannakigubat. Ngem kasano a nakastrekak nga agtrabaho iti submarino, a naawagan met iti naulimek a serbisio gapu iti panangikagumaanmi nga awan makaduktal kadakami?

NAYANAKAK idiay Philadelphia, Pennsylvania, U.S.A. idi 1944. Bayat a dumakdakkelak, naimpluensiaanak kada tatang, lelong, ken ulitegko, nga agpapada a soldado ken mangibilbilang iti dayta a trabaho kas katan-okan a serbisio. Idi ubingak pay, napasiarko ti asideg a pagaramidan ken pagtarimaanan kadagiti barko a pakigubat ket sadiay ti damo a nakakitaak iti submarino. Sipud idi, arapaapkon ti agtrabaho iti submarino. Iti maudi a tawenko iti haiskul, nakualipikarak nga agadal iti U.S. Naval Academy. Kalpasan ti uppat a tawen, nagturposak idi Hunio 1966.

Nagadalak iti Naval Nuclear Propulsion Program a nakasursuruak iti nuclear engineering ken submarine operation. Kalpasanna, inkallaysak ni Mary Lee Carter idi Abril 1967. Ket idi Marso 1968, pimmayso met laengen ti arapaapko idi ubingak ta iti damo a gundaway, natudinganak nga agtrabaho iti submarino a USS Jack. Agarup makatawen kalpasanna, impasngay ni Mary Lee ni Allison, ti inauna iti dua nga annakmi.

Idi 1971, nagbalinak nga Engineer Officer ti USS Andrew Jackson. Ti kapitan dayta a submarino ti nangibaga kadagiti panglukat a sasao iti daytoy nga artikulo. Bayat ti kaaddami iti baybay iti daytoy a submarino nga addaan kadagiti Polaris missile, nakapasarkami iti uram a pagbutbutngan ti amin a nakasakay iti submarino. Apaglabes ti tengngat’ rabii, bayat nga agal-aliwaksaykami kadagiti padak nga opisial, nadlawmi a kasla adda nanabtuog. Idi kuan, nagwanengweng ti alarma ket nayanunsion nga adda uram iti umuna a siled dagiti makina.

Gapu ta siak ti mangas-asikaso iti dandani amin a sistema mekanikal ken elektrikal, nagdardarasak a napan iti kutit ti submarino. Kellaat a simged ti maysa kadagiti oxygen generator a tumultulong nga agpataud iti angin a mabalin nga angsen. Uppat kadakami ti dagus a nangisuot iti aparato a panglapped iti pannakalang-ab kadagiti makadangran a gas. Inikkatmi ti aniaman nga adda sadiay a gas nga alisto a sumged. Naimbag laengen ta awan naan-ano kadakami. Iti laksid ti aksidente, nakapagtalinaedkami iti nakaidestinuanmi a pagpatroliaan—a pammaneknek ti nasayaat a pannakasanay dagiti tripulante.

Pinilik a Basaen ti Maipapan iti Manangitandudo iti Talna

Tapno mabang-arankami iti narigat a trabahomi, naiparegta a linawas a mangilatangkami iti sumagmamano nga oras tapno agbasakami iti aniaman a mainaig iti kultura. Masansan a basaek ti pakasaritaan iti biag dagiti nalatak a soldado. Ngem iti daytoy a gundaway, inkeddengko a basaen ti maipapan ken Jesu-Kristo—ti nalatak a manangitandudo iti talna. Dagiti Ebanghelio ti inrugik a binasa iti Biblia a naawatko idi nagraduarak idiay U.S. Naval Academy. Ngem gapu iti panagbasbasak, ad-adu ti saludsodko a rimsua ngem ti nasungbatan. Agkasapulanak iti tulong.

Idi dandanin malpas ti panagpatroliami, ti komandantemi inummongna ti amin nga opisial iti kuarto a pagtataripnongan sana impakaammo: “Ti inhenierotayo ket kadutdutok iti kasayaatan a trabaho iti United States Navy. Isunto ti Engineer Officer iti umuna a kabaruan a kita ti pangraut a submarino ti Navy.” Naklaatak!

Gapu iti baro a trabahok, immakarkami a sangapamiliaan idiay Newport News, Virginia, a pakaar-aramidan ti USS Los Angeles. Karaman iti trabahok ti panangtarawidwid iti pannakasubok dagiti sistema ti inhenieria ken panagaramid kadagiti teknikal a manual ken programa ti panagsanay. Nakarikrikut ti trabaho ngem makapnek. Kabayatanna, impasngay ni Mary Lee ti maikadua nga anakmi a ni Drew. Ita ta duan ti annakko, napanunotko manen ti maipapan iti Dios: ‘Ania ngata ti panangmatmatna iti gubat? Ania ti mapasamak no matayka? Adda kadi impierno?’

Nasungbatan Met Laengen Dagiti Saludsodko!

Agarup iti dayta met la a tiempo, addan dua a Saksi ni Jehova a nakasarsarita ni baketko. Naminsan, bayat nga addaak iti pagaramidan iti submarino, immawagak iti balaymi ket kinuna ni Mary Lee, “Adda ita ditoy ti dua a babbai a mangisursuro iti Biblia.”

“Ania ti relihionda?” dinamagko.

“Saksi ni Jehova,” insungbatna.

Awan ti ammok maipapan kadagiti Saksi ngem kayatko a matarusan ti Biblia. “Awisem ida nga umay iti maysa a rabii,” kinunak. Di nagbayag, maysa kadakuada ti nagsubli a kaduana ni lakayna. Rinugianmi ken baketko ti nakipagadal iti Biblia.

Nasungbatan met laengen dagiti saludsod a mangrirriribuk iti panunotko iti adun a tawen. Kas pagarigan, naammuak a dagiti natay “saanda a pulos sipapanunot iti aniaman,” a mayaspingda kadagiti matmaturog iti nargaan, kas iti ilustrasion ni Jesus. (Eclesiastes 9:5; Juan 11:11-14) Saan ngarud nga agragragsak wenno agrigrigat dagiti natay no di ket “matmaturogda” ken patay, agingga a mapagungarda.

Rinugianmi metten ken Mary Lee a tabunuan dagiti Nakristianuan a gimong iti Kingdom Hall iti lugarmi. Sadiay a nakitami dagiti Saksi a sangsangkamaysa ken sitatalna nga agserserbi iti Dios nupay nagduduma ti kultura, puli, ken adalda. “Talaga a mapasayaat ti Biblia ti kabibiag dagiti tattao,” kinunami ken baketko.—Salmo 19:7-10.

Tiempo ti Panagdesision

Idi 1973, bimtak ti gubat iti nagbaetan ti Arabia ken Israel. Naipatulod dagiti submarino ti U.S. Atlantic Fleet. Nagbiit la koma a kimmaro ti kasasaad, isu a naamirisko a ti laeng Pagarian ti Dios, saan ket a ti natauan a politika, ti mangyeg iti pudno ken manayon a talna. Kinaagpaysuanna, masansan nga inkarkararagko, “Umay koma ti pagariam; Matungpal koma ti pagayatam ditoy daga.” Ngem diak ammo ti kaipapanan dayta. (Mateo 6:9, 10, Ti Baro a Naimbag a Damag Biblia) Ngem ita, maawatakon a ti Pagarian ti Dios ket nailangitan a gobierno a mangiturayto iti intero a daga, ken mangikkat iti amin a kinadakes ken managdakdakes.—Daniel 2:44; 7:13, 14.

Ti maysa a teksto iti Biblia a namagpanunot unay kaniak ket ti 2 Corinto 10:3, 4, a nagkuna maipapan kadagiti pudno a Kristiano: “Saankami a makigubat a maitunos iti kinasiasinomi iti lasag. Ta dagiti igam ti pannakigubatmi saan a nainlasagan, ngem mannakabalin babaen iti Dios.” Naammuak a dagidiay nga “igam” ket naespirituan, ken ramanenda “ti kampilan ti espiritu”—ti Nasantuan a Biblia.—Efeso 6:17.

Nasken itan nga agdesisionak. Itultuloyko kadi ti makakarit ken makaparagsak a trabahok, wenno itunoskon ti biagko iti kinapudno nga isursuro ti Biblia? Kalpasan a namin-aduk nga inkararag dayta, napanunotko a no pudno a napasnekak nga agbalin a manangitandudo iti talna, aramidek dayta iti wagas ti Dios.

Ti Baro a “Kangatuan a Komandantek”

Pinagsaritaan ken inkarkararagmi ken ni Mary Lee ti masanguananmi ken inkeddengmi a pagserbian ni Jehova a Dios—ti kakaisuna a “Kangatuan a Komandante.” Nagdedikar ti tunggal maysa kadakami nga usarenmin ti biagmi para ken Jehova, isu nga insumitek ti panaglusulosko iti Navy. Nayakarak idiay Norfolk, Virginia bayat nga ur-urayek a mapatgan ti panagikkatko. Kaaduan kadagiti padak nga opisial dida naawatan ti desisionko, ken adda dagiti nangumsi kaniak. Ngem dadduma kadakuada ti pudno nga interesado iti naibasar-Biblia a takderko ken rinaemda ti desisionko.

Napatgan ti kiddawko nga aglusulos idi 1974. Iti dayta met la a tawen, insimbolomi ken baketko ti panagdedikarmi iti Dios babaen ti panagpabautisarmi iti danum iti “Nadiosan a Panggep” nga Asamblea Distrito dagiti Saksi ni Jehova idiay Hampton, Virginia. (Mateo 28:19, 20) Nangrugin ti baro a biagmi.

Panangsango Kadagiti Baro a Karit

Adda dua nga annakmi ken Mary Lee, awan ti pamastrekanmi, ken makaanay laengen iti dua a bulan ti kuartami. Nagaplayak iti nadumaduma a kompania sa impabiangkon ti bambanag iti Dios. Di nagbayag, adda kompania a nangitukon kaniak iti trabaho. Ti sueldok ket agarup kagudua laeng iti sueldok idi iti Navy, ngem nakapagtalinaedkami iti dayta a lugar gapu iti trabahok.

Bayat a sumingsinged ti relasionmi ken Jehova, kayatmin nga ad-adda pay a makapagserbikami kenkuana. Adda am-ammomi a sangapamiliaan a Saksi nga immakar idiay makintengnga a Virginia tapno agserbida sadiay ta agkasapulan dayta a lugar iti ad-adu a mannursuro iti Biblia. Inawisdakami a bumisita kadakuada. Imdasen dayta a naminsan nga isasarungkarmi tapno iplanomi ti umakar. Kiniddawko iti kompania a pagtartrabahuak nga idestinodak iti dayta a lugar ket anian a yamanko ta pinatgandak. Kinapudnona, naingato pay ti saadko ken ginastosan ti kompania ti iyaakarmi! Nakunami a ‘talaga nga ay-aywanan ti Dios dagidiay mangikagkagumaan nga agaramid iti pagayatanna.’—Mateo 6:33.

Gapu ta pinagtalinaedmi a simple ti panagbiagmi a sangapamiliaan, nakapagserbikami ken Mary Lee kas amin-tiempo a ministro. Gapuna, adu a tiempo ti panagkakaduami kadagiti dua a nasisingpet nga annakmi bayat a dumakdakkelda. Wen, di matukod a kinaragsak ti inyeg dayta kadakami agsipud ta da Allison ken Drew ket agtultuloy a ‘magmagna iti kinapudno.’—3 Juan 4; Proverbio 23:24.

Adda met dagiti tiempo a maringgorankami maipapan iti kuarta, balay, salun-at, panaglakay, ken panagbaket. Ngem dinakam binaybay-an ni Jehova. Diak pulos pagbabawyan ti panaglusulosko iti “naulimek a serbisio.” No lagipenmi ken Mary Lee ti kabibiagmi, dimi pulos pagduaduaan a ti panagserbi ken Jehova ti talaga a katan-okan ken kasayaatan a serbisio.—Eclesiastes 12:13.

[Blurb iti panid 14]

Inkeddengmi a pagserbian ti kakaisuna a “Kangatuan a Komandante”

[Ladawan iti panid 12, 13]

Ti USS “Los Angeles”

[Credit Line]

U.S. Navy photo

[Ladawan iti panid 13]

Dakami ken Mary Lee ita