Panangiparang ti Naimbag a Damag—Panangitukon iti Ti Panangbiruk ti Sangatauan iti Dios
1 Bayat a mangasabatayo iti balaybalay, iti lansangan, ken iti impormal, no dadduma makasabettayo kadagiti tattao a saan a Kristiano ti relihionda. No sangkabassit laeng ti ammotayo iti relihionda, mabalin a marigatantayo a mangted kadakuada iti epektibo a pammaneknek maipapan iti Pagarian. Itan, babaen daytoy baro a publikasion a Ti Panangbiruk ti Sangatauan iti Dios, nalaklakatayo a maawatan dagiti dadakkel a relihion ditoy lubong ken iti patpatien dagitoy a tattao. Mabalin a makabalantayo a tumulong iti adu a tattao agingga iti mabalin a mawayawayaan “manipud iti silo ti Diablo.”—2 Tim. 2:24-26; Tito 3:2.
2 No masabettayo dagiti Muslim, Judio, Hindu, Sikh, Budista, wenno dadduma pay, mabalin a siaanus a padayawan iti pammatida ken nalabit a makunatayo: “Makapainteres a masabet dagiti tattao a nagduduma ti relihionda. Ti panangsapul ti sangatauan iti Dios ket nagbanag iti panagturongda iti nagduduma a direksion. Ngem saankayo kadi nga umanamong a masansan a dagiti tattao ket tinawidda iti relihion dagiti nagannakda, imbes a sinapulda iti Dios a bukbukodda? Iti sabali a panao, naipasngayda iti dayta a relihion. Isu dayta ti punto a nadakamat iti umuna a kapitulo daytoy libro a Ti Panangbiruk ti Sangatauan iti Dios. [Ipakita ti panid 8, iti parapo 12.] Ti panangadal kadagiti nagduduma a relihion ket makaay-ayo. Daytoy a libro ti mangilawlawag iti punganay, ar-aramid, ken sursuro dagiti dadakkel a relihion ditoy lubong.” Kalpasanna maukag dagiti pinanid a mangipakita kadagiti ilustrasion iti relihion a nakuna daydiay bumalay. Ilawlawagyo a maysakayo a boluntario a trabahador a paset iti maysa a sangalubongan a gannuat a tumulong kadagiti tattao nga agsapsapul iti Dios. Paregtaen daydiay tao a basaenna daytoy a libro.
3 Ti sabali nga idudupag isut’ panagturong a diretso idiay kapitulo a nangsaklaw iti relihion daydiay bumalay. Sigurado a ti maysa nga Hindu ket maatrakar iti daydiay mapa ti India iti panid 123 ken kadagiti ladawan idiay pinanid 96 ken 117. Mabalin a makasaraktayo iti maysa a Sikh a nakaturbante. Idiay pinanid 100-101 idatagna iti ababa a sumaria dayta a pammati.
4 Ti maysa a Muslim ti mabalin a masdaaw a makakita kadagiti ladawan ti Mecca ken Kaʽbah iti panid 289 ken dagiti kotasion manipud ti Qurʼan idiay panid 288 ken dadduma pay a pinanid. Mabalin nga aginteres ti maysa a Budista iti kapitulo 6 ken dagiti ilustrasion idiay pinanid 141 ken 157. Dagiti tattao a namunganay kadagiti Intsik ti mangipateg iti kapitulo 7, maipapan iti Taoismo ken Confucianismo, ken dagiti ilustrasion idiay pinanid 171 ken 173. Kaaduan kadagiti Hapon ti mangipateg iti ilustrasion idiay pinanid 190 ken 195 iti kapitulo a “Shinto—Panangbiruk ti Japan iti Dios.”
5 No makasabettayo kadagiti ateista ken agnostiko, ti kapitulo 14, a napauluan iti “Moderno a Panagpangadua—Itultuloy Kadit’ Panagbiruk?,” isut’ makaguyogoy kadagiti napudno kadakuada. Dagiti argumento a pabor iti panamati iti Dios ti masarakan manipud panid 334 nga agtultuloy.
6 Kadagidiay agkuna a ti relihionda ket Kakristianuan, ti kapitulo 10 isut’ mabalin a makapainteres. Iti panid 236 namataud iti saludsod, “Ni Jesus—Ania Dagiti Kredensialna?” Idiay pinanid 243 ken 251 inyilustrarna dagiti dua a milagro nga inaramid ni Jesus. Kasano nga ammotayo a ni Jesus ket addaan iti anamong ti Dios? Ti ilustrasion iti panid 253 isut’ sumungbat iti dayta a saludsod.
7 Sibabatad, tapno maitunos dagiti panangiparangtayo iti tunggal maysa, masapul nga ammotayo ti linaon daytoy a libro ken kabisadotayo iti panagsasagadsad dagiti kapitulo ken dagiti ilustrasion. (Maipaay iti kanayonan a singasing mapankayo iti Panakirinnason Manipud Kadagiti Kasuratan, pinanid 21-4.) Iti kasta mabalintayo nga imula iti bukel ti kinapundo babaen iti nainsiriban a panangiparang iti daytoy baro a libro. (1 Cor. 9:19-23; Col. 4:5, 6) Idinto ta ti Biblia ket masansan a makotar a maipaay iti panamagdilig iti intero a libro, adda nasayaat a basaran kadagiti mairugi a panagadal ti Biblia. Maysa nga artikulo iti sumaruno a bulan a Ti Ministeriotayo iti Pagarian ti mangisingasing no kasano a maaramid iti sarungkar tapno mairugi dagiti panagadal ti Biblia kadagiti tattao a nagduduma iti pammatida.