Situtulok a Panangidatag iti Bagbagitayo
1 Impadto ni salmista David a ti ili ni Jehova “itulnogna ti bagina a siaayat.” (Sal. 110:3) Kas kaitungpalan daytoy, iti napalabas nga uppat a tawen serbisio, tinawen a nangbusbos ti ili ni Jehova iti nasurok a maysa a bilion nga oras a nangisaknap iti naimbag a damag ti Pagarian. Ket mainayon pay iti trabaho a panangasaba ken panagaramid iti adalan, adu ti wagas a mabalintay a pangidatagan a situtulok iti bagbagitayo a tumulong kadagiti sabsabali.
2 Dagiti Wagas a Pangipakitaan iti Kinatuloktayo: Dagiti dadduma iti kongregasion nalabit kasapulanda ti tulong tapno makatabunoda kadagiti gimong. Apay a dikay agboluntario a mangikuyog kadakuada? Nalabit masakit, naidalit, wenno nayospital ti dadduma. Masarungkaranyo kadi ida wenno adda kadi maitulongyo? Pinampanunotyo kadin ti panangawisyo kadagidiay agkasapulan iti pammaregta tapno makatabunoda sagpaminsan iti panagadal ti pamiliayo? Ti payunir wenno agibumbunannag nalabit kasapulanna ti kadua iti ministerio. Apay a dikay idiaya a makikaduakayo iti serbisio? Dagitoy ti sumagmamano a wagas a makapagboluntariotayo nga agaramid iti naimbag kadagidiay kapammatiantayo.—Gal. 6:10.
3 Maipakita dagiti kakabsat ti kinatulokda babaen ti panangikagumaanda a mangragpat kadagiti kualipikasion iti panagbalin a panglakayen ken ministerial nga adipen. (1 Tim. 3:2-10, 12, 13; Tito 1:5-9) Bayat nga agtultuloy ti iyaadutayo, kasapulan ti ad-adu pay a kualipikado a kakabsat a lallaki a situtulok a mangidaulo iti panangasaba ken panangisuro ken iti panangaywan kadagiti kongregasion.—1 Tim. 3:1.
4 Nalabit dadduma kadatayo maiwayaantay ti nalawlawa a panagserbi ken Jehova babaen ti sagpaminsan a panag-auxiliary pioneer. Kasta met, buyogen ti sumagmamano a panagbalbaliw iti eskediultayo, nalabit makapagtultuloytayo nga auxiliary pioneer wenno makapag-regular pioneer-tayo. Mabalintay kadi ti umakar iti lugar nga ad-adda nga agkasapulan iti tulong? Maapresiar unay dagidiay nangidatag iti bagbagida kadagitoy a nasayaat nga aramid, ket naparaburanda a sibabaknang!—Luc. 6:38.
5 Iti aniaman a kanito nga iyawis ni Jehova, babaen iti organisasionna, ti pannakiraman iti ad-adu a trabaho ti Pagarian, nasayaat no iyimtuodtayo, ‘Situtulokak kadi pay laeng a mangidatag iti bagik?’ Tignayennatay ti nadiosan a debosiontayo a mangaramid iti amin a kabaelantayo iti sagrado a serbisio, iti kasta maparagsaktay unay ti puso ni Jehova!—Sof. 3:17.