Sawen ti Maipapan ken Jehova iti Inaldaw
1 Pagragsakan dagiti tattao a pagsasaritaan ti aniaman a napateg iti pusoda ta ti naruay iti puso sawen ti ngiwat. (Luc. 6:45b) Aniat’ napateg iti pusotayo? Insurat ti salmista: “Ti dilak sarsaritaennanto ti kinalintegmo ken ti pannakaidayawmo iti bayat ti aldaw.” (Sal. 35:28) Nauneg ti apresasionna ken Jehova ket imbilangna a nagpateg a pribilehio ti agsao maipapan iti Dios ken mangidayaw Kenkuana iti amin a gundaway. Yantangay nasinged ken Jehova, adu ti naimbag a bambanag a nakaragsakan ti salmista. (Sal. 35:9) Kasanotayo a matulad ti nagsayaat nga ulidanna?
2 Sawen ti Maipapan ken Jehova iti Pagtaenganyo: Ni Jehova ti rumbeng a pagsasaritaan ti pamilia iti inaldaw. Dagiti nagannak a nabileg ti ayatda ken Jehova natural nga agsaoda maipapan kenkuana iti amin nga aramidda. (Deut. 6:5-7) Bayat nga aramidenda ti kasta, mapaliiw dagiti annak nga agbibiag dagiti dadakkelda maitunos iti pammati ken ipatpategda ti linteg ti Dios. Iti kasta matmatan dagiti annak ti panagadal ti pamilia iti Biblia a kas napaypayso nga ebkas ti nadiosan a debosion dagiti dadakkelda.—2 Ped. 3:11.
3 Sawen ti Maipapan ken Jehova Kadagiti Kakabsatyo: Kabayatan ti linawas a teokratiko a rutinatayo, adu ti gundawaytayo a mangtaraon iti panunot ken pusotayo iti naespirituan a taraon. Saantay a pulos a maibusan iti isao a naimbag a bambanag. (Luc. 6:45a) Adda kadi naagsawyo a punto iti personal a panagadalyo wenno iti linawas a panagbasayo iti Biblia a tinagiragsakyo unay? Iburayyo dayta kadagiti kakabsatyo, iti kasta matulonganyo ida a mangparang-ay iti ayatda ken Jehova.—Sal. 35:18; Heb. 10:24.
4 Sawen ti Maipapan ken Jehova Kadagiti Sabsabali: Iti inaldaw a pannakilangentayo kadagiti tattao—iti pagtrabahuan, iti eskuelaan, ken kadagiti di manamati a kameng ti pamilia—nabatad koma a ti nakaipamaysaan ti biagtayo ket ti panangsaksi maipapan ken Jehova. (Idiligyo ti Juan 18:37.) Imbes a malaokan kadagiti naalas ken nasabrak a sasao ti lubong, ti panagsasaotayo rumbeng nga itan-okna ti Dios. Inaldaw, iti amin a gundaway, isarita kadagiti sabsabali ti naimbag a damag nga imbilinna nga ikasabatayo.—Ara. 5:42; Col. 4:6.
5 Kas pudno a managdaydayaw ken Jehova, inaldaw koma a gundawayantayo ti agsao maipapan iti awan kaaspingna a Diostayo, ni Jehova.—Sal. 106:47.