Isuamin Masapul nga ‘Abrasaenda a Naimpusuan ti Sao’!
1 Minilion ti makipagad-adal iti Biblia kadagiti Saksi ni Jehova. Tapno makualipikarda iti biag nga agnanayon, masapul nga ‘abrasaenda a naimpusuan ti sao,’ a kas kadagiti 3,000 a nagbabawi ken nabautisaran idi aldaw ti Pentecostes 33 K.P. (Ara. 2:41) Ania a responsabilidad ti ipabaklay daytoy kadatayo itatta?
2 Masapul a tulongantayo dagiti iyad-adalantay iti Biblia a mangpatanor iti debosionda ken Jehova. (1 Tim. 4:7-10) Maigapu iti dayta, kastoy ti isingasing ti suplemento ti Hunio 1996 a Ministeriotayo iti Pagarian, parapo 20: “Kabayatan ti kurso a panagadal, sumapulkayo kadagiti oportunidad tapno mapabileg ti panangipategna kadagiti kalidad ni Jehova. Iyebkasyo dagiti napasnek a riknayo a maipaay iti Dios. Tulonganyo ti estudiante nga agpanunot no kasano a mapatanorna ti nabara, personal a relasionna ken Jehova.”
3 Ti Karit a Sanguentayo: Yantangay naimpluensiaan iti palso a relihion ti kaaduan a tattao, mapnekdan iti wagas ti panagdayaw a di agkasapulan iti adu unay a tiempo ken bannog, a saanen a kasapulan ti napaypayso a panagbalbaliw iti wagas ti panagbiagda. (2 Tim. 3:5) Ti karit a naipasango kadatayo isu ti panangtulong kadagiti iyad-adalantayo iti Biblia a mangtarus a ti pudno a panagdayaw ket saan laeng a basta panagdengngeg iti sao ti Dios. Masapul nga iyaplikarda ti maadalda. (Sant. 1:22-25) No adda banag iti personal a konduktada a di makaay-ayo iti Dios, masapul a bigbigenda ti obligasionda nga ‘agbaw-ing’ ken aramidenda no ania ti nalinteg a makaay-ayo kenkuana. (Ara. 3:19) Tapno magun-odda ti biag nga agnanayon, masapul nga ‘umagawada a sipipinget’ ken dumasigda a sititibker iti kinapudno.—Luc. 13:24, 25.
4 No mapagsaritaanyo ti nadumaduma nga aspeto ti moralidad, imtuodenyo iti iyad-adalanyo iti Biblia no kasano a talaga ti panangmatmatna kadagitoy a banag ken no ania ti rumbeng nga aramidenna no adda makitana a nasken a balbaliwan iti biagna. Iturongyo ti atensionna iti organisasion a pangad-adalanna iti kinapudno, ket paregtaenyo a tumabuno a regular kadagiti gimong ti kongregasion.—Heb. 10:25.
5 Pagbalinentay a kalat nga ipaagseptay ti isursurotayo iti puso ti estudiante. Maragragsakantayo bayat a tignayentay dagiti kabbaro a mangabrasa a naimpusuan iti sao ti Dios ket mabautisaranda!—1 Tes. 2:13.