Ti Determinasiontayo—Magna iti Dalan ni Jehova nga Agturong iti Biag
1 Ti tampok kadagiti “Dalan ti Dios iti Biag” a Kombension isu ti naanamongan a resolusion iti pangserra a palawag. Nangrugi iti kastoy a deklarasion: “Dakami . . . naimpusuan nga umannugotkami a ti dalan ti Dios ti kasayaatan a dalan a maipaay iti biag.” Lagipenyo ti sumagmamano a napapateg a punto iti dayta a resolusion a sinungbatantayo iti “Wen!”
2 Determinadotayo nga agtalinaed a nadalus iti imatang ni Jehova, nga awan mulitna iti lubong. Itultuloytayo nga iyun-una ti pagayatan ti Dios iti biagtayo. Babaen ti panangusar iti Saona, ti Biblia, a kas giyatayo, ditay sumiasi iti kannawan wenno kannigid, iti kasta pasingkedantayo a natantan-ok nga amang ti dalan ti Dios ngem ti dalan ti lubong.
3 Ti lubong nga en heneral dina ikabkabilangan ti dalan ti Dios iti biag ket apitenda dagiti ibungana. (Jer. 10:23) Masapul ngarud nga itultuloytayo ti agpaisuro iti Naindaklan nga Instruktortayo, ni Jehova, a nangikuna: “Isu daytoy ti dalan, magnakayo kenkuana.” (Isa. 30:21) Ti dalan ni Jehova iti biag, kas naipakita iti Kasuratan, ket superior iti amin a banag. Tapno masurottayo dayta a dalan, nasken a gundawayantay a naan-anay amin nga isursuro ni Jehova kadatayo.
4 Ti Superior a Programa ni Jehova iti Panangisuro: Isursuro ni Jehova kadatayo ti napaypayso a panggep ti biag ken no kasano ti kasayaatan a panangusartay iti biagtayo. Isursurona kadatayo no kasano a pasayaaten ti kalidad ti biagtayo iti mental, moral, ken naespirituan a wagas. Sursuruannatayo a makikappia kadagiti kakabsat, kapamilia, ken kaarrubatayo. Ar-aramidenna daytoy babaen ti libro nga us-usarenna iti panangisuro, ti Biblia, ken babaen ti organisasionna.
5 Napateg unay iti daytoy dagiti gimong ti kongregasiontayo. Bayat a tumabtabuno ken makipaspasettayo a regular kadagiti amin a lima a gimong, masanaytayo a naimbag kas ministro ti naimbag a damag ken makagun-odtay iti nagsayaat nga edukasion iti Nakristianuan a panagbiag. (2 Tim. 3:16, 17) Mangipapaay met ti Naindaklan nga Instruktortayo iti teokratiko nga edukasion babaen kadagiti asamblea ken kombension. Ti kalattayo ket pulos a ditay koma malanganan ti maysa a gimong wenno sesion no ipalubos ti salun-at ken kasasaadtayo.
6 Sapay koma ta sipipinget nga itultuloytay a suroten ti dalan ti Dios iti biag kadagiti masanguanan nga al-aldaw, para iti pakaidayawan ni Jehova ken iti agnanayon a pagimbagantayo!—Isa. 48:17.