“Ikawesyo Koma ti Baro a Personalidad”
1 Apresiaren dagiti Kristiano ti pannakaammoda iti kinapudno! Nasursurotayo no kasano ti agbiag a saantay a maipada kadagiti nailubongan a tattao. Yantangay “naisina[da] manipud iti biag a kukua ti Dios,” “nasipngetan ti isipda.” (Efe. 4:18) Naisuro kadatayo a pabaruen ti panunottayo manipud iti nailubongan a panagpampanunot babaen ti pananguksob iti daan a personalidad ken panangikawes iti baro.—Efe. 4:22-24.
2 Ti daan a personalidad mangituggod iti agtultuloy a panagrakaya iti moral, nga agresulta iti pannakamulit ken ipapatay. Gapuna, pagreggetantayo a pakaammuan dagidiay dumngeg iti mensahe ti Pagarian nga iwaksida amin a pungtot, unget, kinadakes, nabassawang a panagsasao, ken naalas a sasao. Dagidiay agtarigagay iti anamong ti Dios masapul a determinado ken naan-anay nga ikkatenda ti daan a personalidad—a kas ti pananguksobda iti narugit a kawes.—Col. 3:8, 9.
3 Baro a Puersa a Mangtigtignay iti Panunot: Ti panangikawes iti baro a personalidad ramanenna ti pannakapabaro ti puersa a mangtigtignay kadagiti panunottayo. (Efe. 4:23) Kasano a pabaruen ti maysa a tao dayta a puersa, wenno panagpampanunot, tapno maiturong iti umiso a direksion? Maaramidan daytoy babaen ti regular ken naanep a panagadal iti Sao ti Dios ken panangmennamenna iti kaipapananna. Iti kasta, tumaud ti baro a padron ti panagpampanunot, ket makita ti tao dagiti bambanag maitunos iti panangmatmat ti Dios ken ni Kristo. Mapabaro ti biag ti maysa bayat a kawesanna ti bagina iti adu a galad a kas iti inyulidan ni Kristo, a pakairamanan ti pannakipagrikna, kinamanangngaasi, kinapakumbaba iti panagpampanunot, kinaalumamay, mabayag a panagitured, ken ayat.—Col. 3:10, 12-14.
4 No ikawestayo ti baro a personalidad, isinatay ti bagbagitayo iti lubong. Maidumatayo gapu iti wagas ti panagbiagtayo. Agsaotay iti kinapudno ken agusartayo iti nasayaat a sasao a mangpabileg kadagiti sabsabali. Kontrolentay ti pungtottayo. Ti kinapait, panagririaw, kinaabusado, ken isuamin a kinadakes, suktantayo kadagiti nalinteg ken nadiosan a galad. Saantay laeng a basta mamakawan, a kas iti gagangay a makalikaguman kadatayo. Maar-aramid amin daytoy a naimpusuan.—Efe. 4:25-32.
5 Nikaanoman ditay ikkaten ti baro a personalidad. Saan a makaay-ayo ti panagserbitay ken Jehova no awan dayta. Bay-antayo a tumulong koma dayta a mangguyugoy kadagiti tattao iti kinapudno, ken bay-antayo a dayta ti mangitan-ok ken Jehova, ti Namarsua iti nakaskasdaaw a baro a personalidadtayo.—Efe. 4:24.