“Makirupakka iti Nasayaat a Dangadang iti Pammati”
1 Binagbagaan ni apostol Pablo ni Timoteo a ‘makirupak iti nasayaat a dangadang iti pammati.’ (1 Tim. 6:12) Kasta a mismo ti inaramid ni Pablo. Iti arinunos ti panagbiagna, mismo a pinatalgedanna a nakirupak iti nasayaat a dangadang. (2 Tim. 4:6-8) Iti amin a pamay-an, intungpalna ti ministerio a buyogen ti tured, bileg, ken panagibtur. Babaen ti panangtuladtayo iti ulidanna, mabalintay ti maaddaan iti umasping a panagtalek nga ar-aramidentay ti amin a kabaelantayo a makidangadang a maipaay iti Nakristianuan a pammati.
2 Pagreggetanyo: Napinget idi ni Pablo iti ministerio. (1 Cor. 15:10) Kastatay met koma bayat a birokentayo dagiti amin a maikari iti teritoriatayo. (Mat. 10:11) Tapno madanontayo ti dadduma kadakuada, mabalin a kaipapananna ti panagriing a masapa tapno makasabaan dagidiay masabattayo iti lansangan. Wenno mabalin a kaipapananna ti panangasaba iti mumalmalemen wenno iti sardam tapno madanontayo dagiti tattao a nakaawiden kadagiti pagtaenganda.
3 Kasapulan ti disiplina ken nasayaat nga eskediul tapno ditay maladaw a makitaripnong iti grupotayo ti panagadal iti libro para iti panagserbi idiay tay-ak. Kas pagarigan, dadduma kadagiti miembro ti pamilia ti Bethel ti agbiahe iti maysa nga oras wenno nasursurok pay tapno makidanggayda kadagiti nakaitudinganda a kongregasion a makiraman iti ministerio kadagiti ngudo ti lawas. Kasta met, mabalin nga apresiarentayo ti sumagmamano nga agibumbunannag ken pamilia iti kongregasiontayo a medio adayo ti paggapuanda ngem dida maladaw. Maikari a tuladen ti kakasta nga ehemplo ti kinaanep ken personal nga urnos.
4 Matignaytay koma a mangsarungkar kadagiti amin a mabirokantayo nga interesado. Uray no makaipaimatayo kadagiti literatura iti lansangan wenno iti impormal a pannakisarita, masapul nga ikagumaantayo nga alaen ti address wenno numero ti telepono ti tao a nakasaritatayo. Kalpasanna surnadantayo tapno maparayray ti interes sa ikagumaantay nga irugi nga iyadalan iti Biblia.
5 Regularkayo Koma iti Serbisio: Regular ken naganetget idi a mangasaba ni Pablo. (Roma 15:19) Dakayo ngay? Makiramramankayo aya a regular iti ministerio? Adda kadin naaramidanyo iti tay-ak ti serbisio iti daytoy a bulan? Interesado dagiti konduktor ti Panagadal iti Libro ti Kongregasion a mangkita nga amin a kagrupoda ket makiraman iti ministerio kabayatan ti Agosto. Matulongandakayo a mangaramid iti kasta.
6 Babaen ti panangtulad iti ulidan ni Pablo a naan-anay a nangsuporta iti naimbag a damag, maitultuloytayo ti ‘makirupak iti nasayaat a dangadang iti pammati.’