Gundawayanyo Daytoy Nagpaiduma nga Oportunidad!

ADAYON ti nadanon ni Peter iti panagadalna iti medisina idi naginteresanna ti pannakaisalakan a mensahe ti Biblia. Idi nagraduar ken nangrugi kas doktor iti maysa nga ospital, naynay a pinaregta dagiti superiorna nga agespesialista kas neurosurgeon. Daytoy ti oportunidad nga awan kedked a gundawayan dagiti adu a kabbaro a doktor.

Ngem, inkeddeng ni Petera a palabsen daytoy nga oportunidad. Apay? Gapu la kadi ta awan ambision ken gagarna? Saan, ta siaannad nga inus-usig ni Peter dayta. Idi nagbalinen a dedikado, bautisado a Saksi ni Jehova, tinarigagayanna a busbosen ti nawadwad a panawen a kabaelanna iti nagduduma nga aspeto ti Nakristianuan a ministerio. Apaman a kualipikadon a neurosurgeon, sigun kenkuana, ad-adunton a tiempo ken pigsana ti agin-inut a guyoden ti propesionna. Maag kadi gapu ta tinallikudanna daytoy naisalsalumina a tsansa, wenno masirib?

Kadagiti dadduma, agparang a kasla maag ti desision ni Peter. Nupay kasta, linaglagipna dagiti teksto ti Biblia kas iti Efeso 5:15, 16. Indagadag dita ni apostol Pablo kadagiti padana a Kristiano: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw nadangkesda.”

Pangngaasiyo ta utobenyo ti ebkas a “nainggundawayan a tiempo.” Naipatarus dayta iti Griego a sao nga ad-adda a nausar iti Biblia a tukoyenna ti tiempo wenno periodo nga addaan naisangsangayan a paset wenno maikanatad para iti espesipiko nga aktibidad. Ditoy nga indagadag ni Pablo a dagiti Kristiano iwayaanda koma dagiti napateg a bambanag. Kinapudnona, masapul a “siguraduen[da] dagiti napatpateg a bambanag.” (Filipos 1:10) Kuestion dayta no aniat’ banag a rumbeng nga iyun-una.

Gapuna, ngarud, ania ti nadibinuan a panggep itoy tiempotayo? Aniat’ pagayatan ti Dios kadagidiay nga agayat kenkuana? Dagiti padto ti Biblia silalawag a tukoyenda ti tiempotayo kas “panawen ti panungpalan,” wenno “maudi nga al-aldaw.” (Daniel 12:4; 2 Timoteo 3:1) Ni Kristo-Jesus imbatadna no aniat’ kapapatgan unay iti kaaldawantayo. Espesipiko a kinunana a sakbay ti panungpalan daytoy dakes a sistema ti bambanag, ‘daytoy naimbag a damag ti Pagarian maikasabanto iti intero a napagnaedan a daga a pangsaksi kadagiti amin a nasnasion.’ Santo la umay ti panungpalan kalpasan dayta.​—Mateo 24:3, 14.

Gapuna, masapul a gundawayantayo ti amin nga oportunidad a mangikasaba iti naimbag a damag ti Pagarian ken agaramid kadagiti adalan. (Mateo 28:19, 20) Tangay dinto pulos mauliten dagitoy nga aktibidad, daytoyen ti maudi nga oportunidad nga itedtay amin a kabaelantayo iti daytoy makaispal-biag a trabaho. “Itan ti nangnangruna a makaay-ayo a tiempo.” Talaga, “itan ti aldaw ti pannakaisalakan.”​—2 Corinto 6:2.

Panagaramid iti Masirib a Pangngeddeng

Ni Peter​—ti agtutubo a nadakawat itay damo​—siaannad nga inutobna ti desisionna ket tiningitingna dagiti pagpilianna. Nabigbigna a saan a dakes no ageskuela tapno agbalin a neurosurgeon. Ngem ania ti kapatgan kenkuana? Daydiay aktibidadna iti Nakristianuan a ministerio, gapu iti kinaganetget daytoy a trabaho. Maigiddato, adda dagiti obligasion a tungpalenna. Addaan asawa ket masapul a suportaranna ni baketna, a mangaskasaba iti amin a tiempo. (1 Timoteo 5:8) Masapul pay a bayadan ni Peter dagiti nautangna idi nageskuela. Ania, ngarud, ti desisionna?

Inkeddeng ni Peter nga agespesialista iti radiology agraman ultrasound scans. Trabaho daytoy a gagangay nga asikasuen iti agmalem. Masanay pay bayat dagiti regular nga oras ti panagtrabaho. Wen, ibilang dagiti dadduma daytoy kas nanumnumo a saad, isuna laeng ta ad-adunto ti tiempona a mangasikaso kadagiti naespirituan a raragpaten.

Adda pay sabali a banag a nakaigapuan ti desision ni Peter. Idinto ta dina ukomen dagidiay naiduma ti desisionda, ammona a ti napalalo a pannakainaig kadagiti panggedan mamataud iti peggad para iti Kristiano. Mangitagadto dayta iti panangliwayna kadagiti naespirituan a responsabilidad. Iladawan daytoy ti sabali pay nga ehemplo a panggedan met laeng ti nakainaiganna.

Adda maysa a mangaskasaba iti Pagarian iti amin a tiempo a nalaing a pintor. Nasuportaran ti pinansial a kasapulanna babaen iti panangilako kadagiti impintana. Bayat nga impamaysana ti tiempona iti kapapatgan a Nakristianuan a ministerio, masuportaranna ngarud a sinanam-ay ti bagina. Nupay kasta, rimmusing ti tarigagayna a mangparang-ay iti artistiko a karerana. Ad-adda a naigamer iti panagpinta ken iti lubong ti arte, pinanawanna ti amin-tiempo a ministerio, ket idi agangay namimpinsan a naginaktibo no iti trabaho a panangikasaba iti Pagarian. Idi agangay, nairaman kadagiti di-nainkasuratan a kondukta, a nagresulta iti isisinana iti kongregasion Kristiano.​—1 Corinto 5:11-13.

Naisangsangayan ti Kaaldawantayo

Bilang agserserbi ken Jehova, sigurado a kayattayo ti agtalinaed a matalek kenkuana. Pagaammotayo nga agbibiagtayo iti nagpaiduma unay a tiempo ti natauan a historia. Tapno makapagtalinaedtay nga agserbi iti Dios ken madaerantayo a sibaballigi dagiti agdama a sirkumstansia, kasapulantayo ti nadumaduma a pannakibagay. Maidiligtay daytoy iti tiempot’ panagani ti mannalon. Tiempo dayta ti naisangayan a panagtrabaho, a dagidiay adda kadagiti talon namnamaen nga agbannogda nga ad-adda ngem ti gagangay ken napapaut ti panagtrabahoda iti agmalem. Apay? Ngamin masapul a mairingpas ti panagapit iti las-ud ti limitado a tiempo.

Limitado unayen ti nabati a tiempo daytoy agdama a dakes a sistema ti bambanag. Nakarkaro ita ngem idi, a ti pudno a Kristiano igaedna koma a suroten ti ehemplo ni Jesus ket makipagna kadagiti addangna. Ti kabibiagna idi ditoy daga nabatad nga impakitana no ania ti kapapatgan kenkuana. Kinunana: “Masapul nga aramidentayo dagiti trabaho daydiay nangibaon kaniak bayat nga aldaw pay; um-umayen ti rabii inton awanen ti tao a makapagaramid.” (Juan 9:4) Idi kinunana nga um-umayen ti rabii, tuktukoyen ni Jesus ti tiempo a pannakabista, pannakaibitin, ken ipapatayna, nga agsardengton ti naindagaan a ministeriona ket dinan mabalin ti makiraman kadagiti aramid ti nailangitan nga Amana.

Pudno, bayat ti tallo ket kagudua a tawen a ministeriona, binusbos ni Jesus ti dadduma a tiempona a nagmilagro ken nangagas kadagiti masakit. Kaskasdi, inusarna ti kaaduan a tiempona a nangikasaba iti mensahe ti Pagarian ken tapno “ikasaba ti pannakaluk-at kadagiti nakayawan” ti ulbod a relihion. (Lucas 4:18; Mateo 4:17) Sireregget ti panangikagumaan ni Jesus iti ministeriona ken binusbosna met ti tiempona a nangsanay kadagiti adalanna tapno mabaelanda ti agbangon iti dayta a pundasion nga impasdekna ket sieepektiboda nga itultuloy ti trabaho a panangasaba. Ginundawayan ni Jesus amin nga oportunidad a mangparang-ay kadagiti interes ti Pagarian ket kayatna a kasta met ti aramiden dagiti adalanna.​—Mateo 5:14-16; Juan 8:12.

Kas ken Jesus, datayo a pasurotna itatta masapul a matmatantay ti situasion ti sangatauan a kas iti panangmatmat ni Jehova a Dios. Ababan ti tiempo daytoy sistema ti bambanag, ket ti Dios siaasi a kayatna nga isuamin magundawayanda a ragpaten ti pannakaisalakan. (2 Pedro 3:9) Gapuna, saan kadi a nainsiriban a pagbalinentayo a segundario amin a sabali nga as-asikasuentayo ket ipangrunatayo ti pagayatan ni Jehova? (Mateo 6:25-33) Nangruna no iti kastoy a naisangsangayan a tiempo, daydiay gagangay nga ibilangtayo a nasken pagbalinentay koma a di unay importante iti biagtayo kas Kristiano.

Addanto ngata asinoman kadatayo nga agbabawi gapu ta inyun-unatayo ti pagayatan ti Dios iti biagtayo? Awan a pulos, tangay ti Nakristianuan a kinamanagsakripisio nakaskasdaaw ti gunggonana. Kas pagarigan, imbaga ni Jesus kadagiti adalanna: “Pudno kunak kadakayo, Awan asinoman a nangpanaw iti balay wenno kakabsat a lallaki wenno kakabsat a babbai wenno ina wenno ama wenno annak wenno dagiti talon a maigapu kaniak ken maigapu iti naimbag a damag a dinto umawat iti maminsangagasut ita iti daytoy a periodo ti tiempo, kadagiti balay ken kakabsat a lallaki ken kakabsat a babbai ken inna ken annak ken dagiti talon, agraman dagiti pannakaidadanes, ket iti um-umay a sistema ti bambanag agnanayon a biag.”​—Marcos 10:29, 30.

Di mabalin a gatadan iti kuarta dagiti gunggona a sagrapen dagidiay mangusar iti tiempoda a mangidayaw ken Jehova ken mangiwaragawag iti mensahe ti Pagarian. Nagadu a bendision ti sagrapenda! Dagitoy ramanenna dagiti pudno a gagayyem, ti pannakapnek iti panagaramid iti nadibinuan a pagayatan, ti isem ti iyaanamong ti Dios, ken ti namnama a biag nga agnanayon. (Apocalipsis 21:3, 4) Ket anian a bendision ti panangtulong kadagiti tattao iti naespirituan ken mangted dayaw iti nasantuan a nagan ni Jehova bilang Saksina! Awan duadua, ti ‘pananggatang iti nainggundawayan a tiempo’ talaga a nainsiriban ken makagunggona. Ad-adda itan ngem idi a tiemponan tapno makiramantayo a mangideklara iti naimbag a damag ti Pagarian ti Dios. Gundawayanyonto kadi ken petpetanyo daytoy nagpaiduma nga oportunidad?

[Footnote]