Naturedkay Kadi a Mangasaba?

¹ Nupay inarestar ken pinangtaan dagiti bumusbusor, intultuloy da Pedro ken Juan nga indeklara a situtured ti mensahe ti Pagarian. (Ara. 4:17, 21, 31) Ania ti kaipapanan kadatayo ita ti natured a panangasaba?

² Natured a Panangasaba: Kaibatogan ti sao a “natured” ti “maingel,” kayatna a sawen, “awanan a pulos iti buteng, natibker, ken naandur.” Kadagiti pudno a Kristiano, ti natured a panangasaba kaipapananna ti di panagamak nga agsao no adda maitutop a gundaway a mangiranud iti naimbag a damag kadagiti sabsabali. (Ara. 4:20; 1 Ped. 3:15) Kaipapananna a ditay mabain a mangipakaammo iti naimbag a damag. (Sal. 119:46; Rom. 1:16; 2 Tim. 1:8) Gapuna, ti kinatured ket maysa a galad a kasapulan tapno maikasaba ti naimbag a damag ti Pagarian iti daytoy panawen ti panungpalan. Dayta ti mangtignay kadatayo a mangiranud iti naimbag a damag iti sadinoman a pakasarakan kadagiti tattao.—Ara. 4:29; 1 Cor. 9:23.

³ Kinatured Idiay Eskuelaan: Marigatanka kadi a mangasaba kadagiti kaeskuelaam gapu ta mabuteng wenno mabainka? Saan a kaskarina dayta no dadduma; kinapudnona, mabalin a maysa a karit dayta. Nupay kasta, pabilgennaka ni Jehova no agkararagka a dumawat iti tured a mangasaba kadagiti sabsabali. (Sal. 138:3) Makatulong ti kinatured tapno mayam-ammom a maysaka kadagiti Saksi ni Jehova ken madaeram ti pannakauyaw. Kas resultana, mabalin a maisalakan dagidiay dumngeg iti ikaskasabam idiay eskuelaan.—1 Tim. 4:16.

⁴ Kinatured Idiay Pagtrabahuan: Pagaammo kadi dagiti katrabahuam a maysaka kadagiti Saksi ni Jehova? Nalabit a ti kakaisuna a pamay-an tapno mangngegan dagiti katrabahuam ti naimbag a damag ket babaen ti panangasabam kadakuada. Makatulong met ti kinaturedmo iti panagkiddaw nga aglanganka iti trabahom tapno makatabunoka kadagiti Nakristianuan a gimong ken kombension.

⁵ Natured iti Sidong ti Pannakasuot: Nasken nga agbalintay a natured no busorendatayo. (1 Tes. 2:1, 2) Tulongannatay dayta a mangsalimetmet iti pammatitayo no pangtaan, uyawen, wenno direkta nga idadanesdatayo. (Fil. 1:27, 28) Pabilgennatay a mangtaginayon iti natibker a takdertayo no masuottayo a mangikompromiso iti panangsurottayo kadagiti pagalagadan ni Jehova a Diostayo. Pakirdennatayo nga agtalinaed a natalna no adda manggargari kadatayo nga agpungtot.—Rom. 12:18.

⁶ Aniaman a pakarigatan ti mapasarantayo a mismo, sapay koma ta agtultuloy nga ikasabatayo a situtured ti naimbag a damag.—Efe. 6:18-20.