Dagiti Kararagsakan a Tattao Ditoy Daga
1 “Naragsak ti ili a ti Diosna isu ni Jehova!” (Sal. 144:15) Ipakita dagita a sasao a dagiti Saksi ni Jehova ti kararagsakan a tattao ditoy daga. Awan ti mangyeg iti dakdakkel a rag-o ngem ti panagserbi iti maymaysa a pudno ken sibibiag a Dios, ni Jehova. Yantangay “naragsak a Dios,” naragsak met dagiti agdaydayaw kenkuana. (1 Tim. 1:11) Ania ti sumagmamano nga aspeto ti panagdayawtayo a mangparagsak unay kadatayo?
2 No Apay a Naragsaktayo: Impatalged kadatayo ni Jesus a ti kinaragsak ket bunga ti panagbalin a “sipapanunot iti naespirituan a kasapulan[tayo].” (Mat. 5:3) Mapennek dayta a kasapulan babaen ti agtultuloy a panagadal iti Biblia ken itatabuno iti amin a Nakristianuan a gimongtayo. Ti panangammo iti kinapudno a masarakan iti Sao ti Dios rinuk-atannatayo kadagiti narelihiosuan a kinaulbod ken kamali. (Juan 8:32) Insuro met kadatayo ti Kasuratan ti kasayaatan a wagas ti panagbiag. (Isa. 48:17) Gapu iti dayta, tagtagiragsakentayo ti nagsayaat a Nakristianuan a panagkakadua iti sidong ti naragsak a timpuyogtayo nga agkakabsat.—1 Tes. 2:19, 20; 1 Ped. 2:17.
3 Dakkel a pannakapnek ti itden kadatayo ti panagtulnog kadagiti nangato a moral a pagalagadan ti Dios, agsipud ta ammotayo a daytoy ti mangsaluad kadatayo ken mangparagsak ken ni Jehova. (Prov. 27:11) Kinuna ti maysa a reporter ti pagiwarnak: “Iti laksid dagiti amin a nainget a pagalagadanda, saan nga agparang a naliday dagiti Saksi ni Jehova. Saan. Makita ti naidumduma a rag-o ken kinatimbeng dagiti agtutubo uray dagiti natataengan [kadakuada].” Kasanotayo a mairanud kadagiti sabsabali ti kinaragsaktayo?
4 Tulongan Dagiti Sabsabali a Makasarak iti Ragsak: Napno ti lubong iti ladingit, ken nalidem a masanguanan ti namnamaen ti kaaduan a tattao. Ngem naraniag a masakbayan ti ur-urayentayo, nga ammotayo a dumteng ti aldaw nga awanton ti kinaliday. (Apoc. 21:3, 4) Gapuna, sireregta a makiramantayo iti ministerio, nga agsapultayo kadagiti napasnek a tattao a pangiranudantayo iti namnamatayo ken patpatientayo maipapan ken ni Jehova.—Ezeq. 9:4.
5 Kinuna ti maysa a payunir: “Awan ti ad-adda a makapnek ngem ti panangtulong kadagiti tattao a mangammo ken ni Jehova ken iti kinapudno maipapan kenkuana.” Aramidentayo ti amin a kabaelantayo a mangparegta iti ad-adu pay a makipagadal iti Biblia iti pagtaenganda. Mangyeg iti dakkel a kinaragsak ti panagserbi ken ni Jehova ken ti panangtulongtayo kadagiti sabsabali nga agserbi kenkuana.—Ara. 20:35.