Dakayo nga Agtutubo—Basaenyo ti Sao ti Dios!
1 Iti panawen ti kinaagtutubo, adu dagiti parikut ken napateg a banag a desisionan. Adu kadakayo nga agtutubo a Kristiano ti inaldaw a maipasango iti kasasaad a mangsulisog kadakayo a mangsalungasing kadagiti nadiosan a pagalagadan iti kondukta. Sakbay a mangaramidkayo iti personal a desision maipapan iti edukasion, panggedan, ken panagasawa, rumbeng nga ikeddengyo nga umuna no ania dagiti naespirituan a kalatyo. Iti kasta laeng a pamay-an a makaaramidkayo kadagiti dadduma pay a desision a pagimbaganyo iti unos ti panagbiagyo. Dagiti masnup a naespirituan a kalat tulongannakayo nga agtignay a nainsiriban ken pagbalinenda a naballigi ti biagyo. No regular a basaen ken utobenyo ti Sao ti Dios, matignaykayo nga agbiag a mayannurot iti naipaltiing a balakadna, ket agballiginto dagiti umiso nga aramidenyo.—Jos. 1:8; Sal. 1:2, 3.
2 Kasano a Makagunggona Kadakayo? Napno ti lubong ni Satanas kadagiti pakasulisogan nga agaramid iti di umiso. (1 Juan 2:15, 16) Mabalin nga adda dagiti ammoyo a kaklaseyo wenno dadduma a padayo nga agtutubo a nasaem ti nagbanaganda gapu ta nagpaimpluensiada kadagiti kapatadanda. No ipangagyo ti balakad ti Biblia, maaddaankayo iti moral ken naespirituan a bileg a lumiklik iti dakes nga aramid. Maysa pay, ti balakad ti Sao ti Dios mailisinakayo kadagiti makaallilaw a silo ni Satanas. (2 Cor. 2:11; Heb. 5:14) Pudno a ragsak—pannakapnek iti biag—ti itden kadakayo ti pannagna kadagiti dalan ti Dios.—Sal. 119:1, 9, 11.
3 Dagiti di agbalbaliw a prinsipio ti Sao ti Dios artapanda ti natauan a sirib. (Sal. 119:98-100) No nalawag iti panunotyo dagiti prinsipio ti Biblia, utobenyo dagiti naipalgak a panggep ni Jehova, ken naimpusuan nga agkararagkayo, mapatanoryo ti nasinged a relasion iti kasisiriban nga Autor ti Biblia, ni Jehova a Dios. Inkarina: “Pagbalinenkanto nga addaan iti pannakatarus ket isuroka iti dalan a rebbeng a papanam. Mangipaayakto iti balakad a ti matak situturong kenka.”—Sal. 32:8.
4 Iwayaanyo a Basaen: Inkeddeng ti maysa a Kristiano nga agtutubo a basaenna ti intero a Biblia, ket naaramidna dayta iti makatawen. Kasano a nagunggonaan? Kinunana: “Nagadu ti nasursurok maipapan ken ni Jehova—bambanag a nangpasinged iti relasionko kenkuana ken nangtignay kaniak nga agbuteng kenkuana bayat ti panagbiagko.” (Sant. 4:8) Nabasayo kadin ti intero a Biblia? No saan pay, apay a diyo aramiden a kalat dayta? Sigurado a bendisionan ni Jehova ti panagreggetyo, ket agapitkayto iti adu a gunggona.