Agtalinaedkayo a Naganetget!
1 Ammo idi ni Jesus a limitado ti panawenna ditoy daga a mangitungpal iti trabaho ni Amana. (Juan 9:4) Gapuna, sigaganetget nga intungpalna ti ministeriona, ken sinanayna dagiti adalanna a mangaramid met iti kasta. (Luc. 4:42-44; 8:1; 10:2-4) Saanna nga impangpangruna dagiti material a bambanag. (Mat. 8:20) Iti kasta, nairingpasna ti trabaho nga inted kenkuana ni Jehova.—Juan 17:4.
2 Limitado a Panawen: Limitado met ti panawen a pannakaikasaba ti naimbag a damag iti “intero a mapagnaedan a daga.” (Mat. 24:14) Ipalgak ti padto ti Biblia nga agbibiagtayon iti arinunos ti tiempo ti panungpalan. Din agbayag, ‘dagidiay saan a makaammo iti Dios ken dagidiay saan nga agtulnog iti naimbag a damag maipapan ken Apotayo a Jesus . . . agpasardanto iti pannakaukom a dusa nga agnanayon a pannakadadael.’ (2 Tes. 1:6-9) Kellaatto a dumteng dayta a panangukom. (Luc. 21:34, 35; 1 Tes. 5:2, 3) Masapul a maammuan dagiti tattao ti napeggad a kasasaadda. Responsabilidadtayo ti tumulong kadakuada a manggun-od iti anamong ni Jehova bayat nga adda pay tiempo.—Sof. 2:2, 3.
3 Panangaramid iti Amin a Kabaelantayo: Dagiti adipen ti Dios ipangpangrunada ti trabaho a panangasaba gapu ta mabigbigda a “ti tiempo a nabati ket ababan.” (1 Cor. 7:29-31; Mat. 6:33) Adda dagidiay nangtallikud kadagiti gundawayda a bumaknang wenno kadagiti dadduma pay a personal a gannuat tapno ad-adu ti panawenda a makiraman iti ministerio. (Mar. 10:29, 30) Intultuloy dagiti dadduma ti maaddaan iti ‘adu nga aramid iti trabaho ti Apo’ nupay adda latta dagiti pakasuotan. (1 Cor. 15:58) Adu ti pinullo a tawenen a saan a nagpangadua a mangipakpakaammo iti naimbag a damag iti publiko. (Heb. 10:23) Apresiaren unay ni Jehova amin dagita a panagsakripisio a mangsuporta kadagiti interes ti Pagarian.—Heb. 6:10.
4 No ipamaysatayo ti biagtayo iti panagdayaw ken ni Jehova, a pakairamanan ti trabaho a panangasaba, matulongantayo nga agbalin a sipapanunot iti aldaw ni Jehova. Daytoy ti mangsalaknib kadatayo tapno saannatayo a masinga ti lubong ni Satanas ken mangpabileg iti determinasiontayo a mangtaginayon iti nasantuan a kababalin. (2 Ped. 3:11-14) Pudno a ti naganetget a panangitungpal iti ministeriotayo maispalna ti biagtayo ken ti biag dagidiay dumngeg kadatayo.—1 Tim. 4:16.