Ti Panangasaba Tulongannatayo nga Agibtur
1 Ibalakad kadatayo ti Sao ti Dios a “buyogen ti panagibtur tarayentayo ti lumba a naikabil iti sanguanantayo.” (Heb. 12:1) Kas iti tumataray a masapul nga agibtur tapno mangabak iti lumba, masapul nga agibturtayo met tapno magun-odtayo ti gunggona a biag nga agnanayon. (Heb. 10:36) Kasano a matulongannatayo ti Nakristianuan a ministerio nga agibtur a simamatalek agingga iti panungpalan?—Mat. 24:13.
2 Bumileg iti Naespirituan: Ti panangiwaragawagtayo iti nakaskasdaaw a kari ti Biblia maipapan iti nalinteg a baro a lubong pagtalinaedenna a naraniag ti namnamatayo. (1 Tes. 5:8) No regular a makiramantayo iti ministerio iti tay-ak, addaantayo iti gundaway a mangipakaammo kadagiti kinapudno a nasursurotayo iti Biblia. Addaantayo iti gundaway a mangidepensa iti pammatitayo, ket tumulong daytoy a mangpabileg kadatayo iti naespirituan.
3 Tapno epektibo ti panangisurotayo kadagiti sabsabali, masapul a matarusantayo a mismo dagiti kinapudno a linaon ti Biblia. Nasken nga agsukisok ken utobentayo ti ad-adalentayo. Ti napasnek a panangikagumaantayo paunegenna ti pannakaammotayo, pabilgenna ti pammatitayo, ken bang-arannatayo iti naespirituan. (Prov. 2:3-5) No kasta, bumilegtayo no tulongantayo dagiti sabsabali.—1 Tim. 4:15, 16.
4 Ti naregta a pannakipaset iti ministerio ket napateg a paset “ti naan-anay a kabal manipud iti Dios,” a kasapulantayo tapno masarangettayo ti Diablo ken dagiti demonio. (Efe. 6:10-13, 15) Ti panagbalin a naagawa iti ministerio tulongannatayo a mangipamaysa iti panunottayo kadagiti makapabileg a banag ken ilikliknatayo iti dakes nga impluensia ti lubong ni Satanas. (Col. 3:2) Bayat nga isursurotayo kadagiti sabsabali dagiti dalan ni Jehova, kanayon a mapalagipantayo maipapan iti kinapateg ti panangtaginayon iti nasantuan a kababalin.—1 Ped. 2:12.
5 Pabilgennatayo ti Dios: Kamaudiananna, masursurotayo ti agpannuray ken ni Jehova no makiramantayo iti trabaho a panangasaba. (2 Cor. 4:1, 7) Pudno a bendision dayta! Ti kasta a panagtalek tulongannatayo a mangitungpal iti ministeriotayo ken mangtaming iti aniaman a kasasaad a pakaipasanguantayo. (Fil. 4:11-13) Kinapudnona, ti panagsursuro nga agpannuray a naan-anay ken ni Jehova ti tulbek ti panagibtur. (Sal. 55:22) Iti adu a pamay-an, ti panangasaba tulongannatayo nga agibtur.