Makagunggona a Kalat Para iti Baro a Tawen Serbisio
1. Ania a kalat ti mabalintay nga aramiden para iti baro a tawen serbisio?
1 Masapul a mangaramidtayo kadagiti kalat no kayattayo ti rumang-ay iti naespirituan. Ania dagiti kalatmo para iti baro a tawen serbisio? Maysa a nagsayaat a kalat ti panag-auxiliary pioneer iti maysa a bulan wenno nasursurok pay. Yantangay daytoy a naragsak nga aktibidad ket agkasapulan iti nasakbay a panagplano, itan ti nasayaat a tiempo nga irugim ti agplano. Apay a nasayaat nga aramidem a kalat ti panag-auxiliary pioneer?
2. Apay a nasayaat nga aramidem a kalat ti panag-auxiliary pioneer?
2 Dagiti Rason iti Panag-auxiliary Pioneer: Gapu ta ad-adu nga oras ti mabusbostayo iti ministerio no agserbitayo kas auxiliary pioneer, ‘ad-adda a naan-anay’ a maay-ayotayo ti nailangitan nga Amatayo. (1 Tes. 4:1) Bayat nga ut-utobentayo ti amin nga inaramid ni Jehova agpaay kadatayo, gutugotennatayo ti pusotayo a mangisarsarita kadagiti sabsabali iti maipapan kenkuana. (Sal. 34:1, 2) Ammo ken apresiaren ni Jehova dagiti ar-aramidentayo a sakripisio tapno ad-adu ti magapuanantayo iti ministerio. (Heb. 6:10) Ammotayo a maay-ayo ni Jehova iti napinget a panagserbitayo ket mangyeg daytoy iti dakkel a rag-o kadatayo.—1 Cron. 29:9.
3, 4. Ania ti pagsayaatan ti panag-auxiliary pioneer?
3 Kaaduanna, ad-adda a makaparagsak ken nalaklaka nga aramiden ti maysa a banag no kanayonmo nga ar-aramiden. Dakdakkel ti kompiansam a mangasaba iti binalaybalay no ad-adu nga oras ti busbosem iti ministerio. Lumaingka a mangirugi iti saritaan ken mangusar iti Biblia. Ad-adda a bumileg ti pammatim no masansan a mangaskasabaka. Adu idi ti awanan iti iyad-adalan iti Biblia ngem nakasarakda iti iyadalan idi nag-auxiliary pioneer-da.
4 Mabalin a ti panag-auxiliary pioneer ti kasapulan tapno mapabaro ti regta ti maysa a Kristiano. Maysa a dati a regular pioneer ti nangikeddeng nga ag-auxiliary pioneer iti maysa a bulan idi naamirisna a ti sekular a trabaho ti ad-addan nga ipangpangrunana. Kinunana: “Talaga a napabilegak iti dayta a bulan! Inkeddengko ti agtultuloy nga ag-auxiliary pioneer agingga a nagbalinak manen a regular pioneer.”
5. Ania ti mabalintayo nga aramiden tapno maaddaantayo iti kompiansa nga agpayunir?
5 Panangparmek Kadagiti Tubeng: Mabalin a bumdeng dagiti dadduma nga ag-auxiliary pioneer gapu ta iti panagriknada saanda a nasigo a mangasaba. No daytoy ti manglaplapped kenka, matulongannaka ni Jehova kas iti inaramidna kenni Jeremias. (Jer. 1:6-10) Nupay ‘naullayat ti ngiwat ken dila’ ni Moises, isu ket inusar ni Jehova a mangibanag iti pagayatanna. (Ex. 4:10-12) No kurang ti talekmo iti bagim, idawatmo ken Jehova nga ikkannaka iti tured.
6. Kasano a makapagserbika latta kas auxiliary pioneer uray no nakapuy ti salun-atmo wenno okupadoka?
6 Bumdengka kadi nga ag-auxiliary pioneer gapu ta nakapuy ti salun-atmo wenno okupadoka? No adda an-annayem, mabalin a makapagpayunirka latta no mangaramidka iti eskediul a saan a makabannog kenka. No okupadoka, mabalin nga iti sabali a bulan ti panangaramidmo kadagiti saan unay a napateg nga aktibidad. Dagiti dadduma nga addaan iti amin-tiempo a trabaho maiwayaanda ti ag-auxiliary pioneer babaen ti panagbakasionda iti maysa wenno dua nga aldaw.—Col. 4:5.
7. Apay a makatulong no ikararagmo ti maipapan iti panag-auxiliary pioneer?
7 No Kasano a Maaramidmo: Ikararagmo ti tarigagaymo nga agpayunir. Idawatmo ken Jehova a bendisionanna ti panagreggetmo a mangpalawa iti ministeriom. (Roma 12:11, 12) Matulongannaka a mangaramid kadagiti nainsiriban a desision no kasanom nga urnosen ti eskediulmo. (Sant. 1:5) No awan ti tarigagaymo nga agpayunir, ikararagmo a tulongannaka ni Jehova a mangtagiragsak iti trabaho a panangasaba.—Luc. 10:1, 17.
8. Kasano a matulongannaka nga ag-auxiliary pioneer ti panangyaplikar iti Proverbio 15:22?
8 Pagsasaritaanyo a sangapamiliaan ti kalat a panag-auxiliary pioneer. (Prov. 15:22) Nalabit makapagpayunir ti maysa a kameng ti pamilia no suportaran dagiti kapamiliana. Mabalin a rumayray ti tarigagaymo nga ag-auxiliary pioneer no dakamatem dayta kadagiti dadduma iti kongregasion, nangruna kadagiti kapadam iti kasasaad.
9. Kadagiti ania a bulan a mabalinmo ti ag-auxiliary pioneer?
9 Bayat nga adalem ti eskediulmo para iti ministerio iti baro a tawen serbisio, kaano a mabalinka nga ag-auxiliary pioneer? No agtartrabahoka iti amin-tiempo wenno ages-eskuelaka, baka mabalinmo ti agpayunir kadagiti bulan nga addaan iti piesta opisial, lima a Sabado wenno lima a Domingo. Kas pagarigan, lima ti Sabado ken Domingo ti Setiembre, Disiembre, Marso, ken Agosto. Lima ti Sabado iti bulan ti Mayo, ken lima ti Domingo iti Hunio. No nakapuy ti salun-atmo, mabalinmo ti agpayunir kadagiti bulan a nasayaat ti paniempo. Nalabit kayatmo met ti agpayunir iti bulan nga ibibisita ti manangaywan iti sirkito iti kongregasionyo. Bayat ti ibibisitana, addaanka met iti gundaway a tumabuno iti umuna a kagudua ti miting para kadagiti regular pioneer. Yantangay inton Marso 22 a maangay ti Memorial iti umay a tawen, nasayaat met ti agpayunir iti bulan ti Marso, Abril, ken Mayo. Apaman a naikeddengmon no ania a bulan ti kayatmo a panag-auxiliary pioneer, mangaramidkan iti eskediul a makatulong kenka a mangragpat iti 50 nga oras.
10. Ania ti mabalinmo nga aramiden no saanka a makapag-auxiliary pioneer?
10 Uray no iti panagkunam ket saanka a makapag-auxiliary pioneer iti umay a tawen serbisio, mabalinmo latta ti maaddaan iti espiritu ti kinapayunir. Itultuloymo nga aramiden ti amin a kabaelam a makiraman iti ministerio, ket manamnamam a maay-ayo ni Jehova iti naimpusuan a panagreggetmo nga agserbi kenkuana. (Gal. 6:4) Suportaram ken paregtaem dagidiay makapag-auxiliary pioneer. Nalabit mabalinmo a baliwan ti eskediulmo tapno makaruarka iti maysa pay nga aldaw iti lawas, a kaduam dagiti agpaypayunir.
11. Apay a nasken a sipapanunottayo a naganat ti tiempo a pagbibiagantayo?
11 Ammo dagiti adipen ni Jehova a naganat ti tiempo a pagbibiagantayo. Adda trabaho a masapul nga iringpastayo—ti panangikasaba iti naimbag a damag. Agpegpeggad ti biag dagiti tattao ken bassiten ti nabatbati a tiempo. (1 Cor. 7:29-31) Ti ayattayo iti Dios ken iti padatayo a tao tignayennatayo a mangaramid iti amin a kabaelantayo iti ministerio. Mabalin a makapag-auxiliary pioneer-tayo iti uray maysa la a bulan iti baro a tawen serbisio no ikagumaantayo ken agplanotayo a naimbag. Pudno a makagunggona a kalat dayta!