Makatukay-Interes nga Introduksion

TI INTRODUKSION ket nakapatpateg a paset ti aniaman a palawag. No talaga a matukaymo ti interes dagiti agdengdengngeg kenka, ad-adda nga imdenganda a sipapasnek dagiti sumaruno nga ibagam. Iti tay-ak ti ministerio, no ti introduksionmo ket saan a makatukay iti interes, mabalin a saanmo a maituloy ti ibagam. No agpalawagka iti Kingdom Hall, saan a pumanaw dagiti timmabuno, ngem mabalin nga agtawataw ti panunot dagiti dadduma no dimo naala ti interesda.

Laglagipem dagitoy a panggep bayat nga isagsaganam ti introduksionmo: (1) alaem ti atension dagiti agdengngeg, (2) ibatadmo ti topikom, ken (3) ipakitam no apay a napateg ti topikom kadagiti agdengngeg. Adda dagiti gundaway a gistay aggigiddan a maibanagmo dagitoy a tallo a panggep. Ngem no dadduma, mabalin a saggaysaem a tamingen dagita, ken agsasabali ti panagsasagadsadda.

No Kasano a Maalam ti Atension Dagiti Agdengdengngeg. Nupay immay dumngeg dagiti tattao iti diskurso, dina kaipapanan a sidadaanda a mangipaay iti naipamaysa nga atension. Apay a saan? Adu a banag ti pampanunotenda. Mabalin a maseknanda iti problema idiay balayda wenno iti sabali a pakadukotan iti biag. Kas agpalawag, maysa a karit kenka ti panangala ken panangtengngel iti atension dagiti agdengdengngeg. Saan la a maymaysa ti pamay-an tapno maaramidmo daytoy.

Ti maysa kadagiti kalatakan pay laeng a diskurso isu ti Sermon iti Bantay. Kasano ti pannakairugina? Sigun iti salaysay ni Lucas, kinuna ni Jesus: “Naragsakkayo a napanglaw, . . . naragsakkayo a mabisbisin ita, . . . naragsakkayo nga agsangsangit ita, . . . naragsakkayo inton guraendakayo dagiti tattao.” (Luc. 6:20-22) Apay a nangtukay dayta iti interes? Iti sumagmamano la a sasao, binigbig ni Jesus ti dadduma kadagiti nadagsen a problema dagiti dumdumngeg kenkuana. Sa imbes a naan-anay a sinalaysayna dagita a problema, impakitana a dagiti tattao nga addaan iti kakasta a problema mabalinda latta ti agragsak, ket inaramidna dayta iti wagas a nanggutugot kadakuada a dumngeg iti ad-adu pay.

Mabalin nga usaren a sieepektibo dagiti saludsod a mangtukay iti interes, ngem masapul a maitutop dagita. No ipasimudaag dagiti saludsodmo a ti ipalawagmo ket nangngegda idin, mabalin a nalaka a maawan ti interesda. Saanka nga agsalsaludsod iti mangpabain kadagiti agdengdengngeg wenno mangpadakes kadakuada. Imbes ketdi, ikagumaam ti agsaludsod iti wagas a mamagpanunot kadakuada. Agsarimadengka iti apagbiit kalpasan ti tunggal saludsod tapno adda gundaway dagiti agim-imdeng a mangpanunot iti sungbat. No mariknada a kasla makisarsarita ti panunotda kenka, naalam ti atensionda.

Ti maysa pay a nasayaat a pamay-an tapno maala ti atension isu ti panangusar iti pudpudno a kapadasan. Ngem mabalin a saan a maibanag ti panggepmo no basta agestoriaka iti kapadasan a makapainsulto kadagiti agdengdengngeg. No matandaananda ti estoriam ngem malipatanda ti leksion a nainaig iti dayta, saanmo a naibanag ti panggepmo. No maaramat ti maysa a kapadasan iti introduksion, dayta koma ti pamuon ti napateg nga aspeto ti palawagmo. Nupay mabalin a kasapulan ti dadduma a detalye tapno nabiag ti estoriam, agannadka di la ket ta nakaat-atiddog dagiti kapadasan.

Adda dagiti agpalawag a rugianda ti diskursoda babaen ti panangdakamatda iti kabbaro a damag, sasao a naadaw iti lokal a pagiwarnak, wenno ti imbaga ti maysa a mabigbigbig nga autoridad. Epektibo met dagitoy no la ket talaga a maikanatad iti topiko ken maitutop kadagiti agdengdengngeg.

No ti palawagmo ket paset ti maysa a simposium wenno iti Gimong ti Serbisio, nasaysayaat no ababa ken direkta ti introduksionmo. No palawag publiko ti pasetmo, saanka a lumbes iti oras a nairanta iti introduksion. Ti bagi ti palawagmo a mangyallatiw iti impormasion ti kapatgan kadagiti agdengdengngeg.

Mabalin nga adda dagiti gundaway nga agpalawagka iti sanguanan dagiti tattao a managduadua wenno bumusbusor pay ketdi. Kasano a maalam ti atensionda? Ni Esteban, maysa kadagiti nagkauna a Kristiano ken nadeskribir a “napno iti espiritu ken sirib,” ket naisaklang iti Sanhedrin dagiti Judio. Nagsayaat ti panangidepensana iti Kristianidad. Kasano ti panangirugina? Babaen ti nadayaw a wagas ken panangtukoyna iti banag nga akseptaren dagiti amin nga adda sadiay. “Lallaki, kakabsat ken amma, denggenyo. Ti Dios ti dayag nagparang ken amatayo nga Abraham.” (Ara. 6:3; 7:2) Iti Areopago sadi Atenas, imbagay ni apostol Pablo ti introduksionna iti naiduma unay a grupo, a kunkunana: “Lallaki a taga Atenas, makitak nga iti amin a bambanag kasla ad-adda a managbutengkayo kadagiti didiosen ngem ti dadduma.” (Ara. 17:22) Gapu kadagiti epektibo nga introduksion, dagita a dua a grupo kayatda pay idi ti dumngeg.

No mangaskasabaka, nasken met nga alaem ti atension dagiti tattao. No di naitulag ti ibibisitam, mabalin nga adda dagiti sabali a pakakumikoman ti bumalay. Iti dadduma a paset ti lubong, manamnama a dagiti di naawis a bisita ibagada a dagus ti gagarada. Adda met dagiti lugar a nakayugalian ti panangannurot iti sumagmamano a pormalidad sakbay nga ibagam ti gagaram.​—Luc. 10:5.

Iti aniaman kadagita a kasasaad, makatulong ti pudpudno a pannakigayyem tapno nalaklaka a mairugi ti saritaan. Masansan a nasaysayaat nga irugi iti banag a direkta a mainaig iti pampanunoten ti bumalay. Kasano a maikeddengmo no ania ti usarem? Bueno, iti iyaasidegmo iti bumalay, adda kadi ar-aramidenna? Nalabit agmulmula, as-asikasuenna ti arubayan ti balayna, agtartarimaan iti lugan, aglutluto, aglablaba, wenno agay-aywan kadagiti ubbing. Adda kadi matmatmatanna​—pagiwarnak wenno ti mapaspasamak iti kalsada? Mailasin kadi iti aglawlawna nga adda naisangsangayan a panaginteresna iti panagkalap, ay-ayam, musika, panagbiahe, kompiuter, wenno dadduma pay a bambanag? Masansan a maseknan dagiti tattao iti nabiit pay a nangngegda iti radio wenno nabuyada iti telebision. Ti panangdamag wenno ababa a komento maipapan iti aniaman kadagita a banag ket mabalin a mangiturong iti nainggayyeman a panagsarita.

Daydi pannakisarita ni Jesus iti maysa a Samaritana iti abay ti bubon iti asideg ti Sicar ket nagsayaat nga ehemplo no kasano nga irugi ti panagsarita nga addaan panggep a mangasaba.​—Juan 4:5-26.

Masapul nga isaganam a nalaing ti introduksionmo, nangruna no masansan a wanasen ti kongregasionyo ti teritoriayo. Ta no saan, mabalin nga awan makasabaam.

Ibatadmo ti Topikom. Iti kongregasion Kristiano, adda tserman wenno kabsat nga umun-una ngem sika a mangyanunsio iti paulo ti palawagmo ken mangyam-ammo kenka. Nupay kasta, iti introduksionmo, nasayaat no ipalagipmo kadagiti agdengdengngeg no ania ti temam. Mabalin a daytoy, nupay saan nga inkapilitan, ket sao-por-sao a panangdakamat iti temam. Aniaman ti kasasaad, agin-inut koma a maibuksilan ti tema bayat ti panagpalawagmo. Iti introduksionmo, iturongmo ti atension iti topikom.

Idi imbaonna dagiti adalanna a mangasaba, imbatad ni Jesus kadakuada no ania ti mensahe nga idanonda. “Bayat a mapankayo, mangasabakayo, a kunkunayo, ‘Ti pagarian ti langlangit asidegen.’” (Mat. 10:7) Maipapan iti kaaldawantayo, kinuna ni Jesus: “Daytoy naimbag a damag ti pagarian maikaskasabanto.” (Mat. 24:14) Naidagadag nga ‘ikasabatayo ti sao,’ kayatna a sawen, ti Biblia ti pakaibatayan ti ikasabatayo. (2 Tim. 4:2) Ngem sakbay a luktam ti Biblia wenno iturongmo ti atension iti Pagarian, masansan a nasken a dakamatem dagiti banag a pakaseknan dagiti tattao. Mabalin nga agkomentoka maipapan iti krimen, kaawan ti panggedan, kinaawan hustisia, gubat, no kasano a tulongan dagiti agtutubo, sakit, wenno ipapatay. Ngem dimo kaaduen ti komentom maipapan kadagiti negatibo a banag; positibo ngamin ti mensahem. Ikagumaam nga iturong ti saritaan iti Sao ti Dios ken iti namnama nga ipaay ti Pagarian.

Ipakitam No Apay a Napateg ti Topikom Kadagiti Agdengdengngeg. No agpalawagka iti kongregasion, masiguradom nga interesado iti palawagmo ti kaaduan kadagiti timmabuno. Ngem umimdengda ngata a kas iti iyiimdeng ti maysa a tao nga adda piho a masursurona a mainaig iti biagna? Dumngegda ngata gapu ta mabigbigda a ti mangmangngegda ket mayanatup iti kasasaadda iti biag ken gapu ta tignayenna ida a mangtaming iti kasasaadda? Sa la mapasamak ti kasta no inkonsiderarmo a naimbag dagiti agdengdengngeg​—dagiti kasasaad, pakaseknan, ken panangmatmatda​—idi isagsaganam ti palawagmo. No kasta ti inaramidmo, iramanmo ngarud iti introduksionmo ti banag a mangipasimudaag iti dayta.

Agpalpalawagka man iti plataporma wenno adda kaskasabaam, ti maysa kadagiti kasayaatan a pamay-an tapno aginteresda iti topikom isu ti panangiramanmo kadagiti agdengdengngeg. Ipakitam no kasano a nainaig iti topiko nga ipalpalawagmo dagiti parikut, kasapulan, wenno dagiti saludsod nga adda iti panunotda. No ibatadmo a saanmo a basta dakamaten dagiti topiko a nalawa ti saklawenda no di ket salaysayem dagiti espesipiko nga aspeto ti maysa a banag, napaspasnek ti iyiimdengda. Tapno maaramidmo dayta, masapul nga agsaganaka a nalaing.

Ti Wagas a Panangidatagmo. Napateg unay no ania ti ibagam iti introduksionmo, ngem no kasano ti panangibagam iti dayta ket mabalin met a mangtukay iti interes. Gapuna, saan laeng a ti ibagam ti isaganam no di pay ket no kasano nga ibagam dayta.

Napateg ti panangusarmo iti umiso a sasao tapno maibanag ti panggepmo, isu a nasayaat no isaganam a nalaing ti umuna a dua wenno tallo a sentensia. Masansan a kasayaatan dagiti ababa ken simple a sentensia. No agpalawagka iti kongregasion, mabalin a kayatmo nga isurat wenno ikabesa dagita tapno husto ti pannakayablat ti panglukat a sasaom. Ti epektibo nga introduksion a saan a maap-apura matulongannaka nga agtalinaed a kalmado agingga a malpasmo ti palawagmo.

No Kaano nga Isagana. Nagduduma dagiti opinion iti daytoy a banag. Patien dagiti dadduma a nasanay a pumapalawag a ti panangisagana iti palawag ket mangrugi iti introduksion. Kuna met dagiti dadduma a nangadal iti panagpalawag iti publiko a buklem ti introduksion no nalpasen ti bagi ti palawag.

Masapul a siertuem no ania ti topikom ken no ania dagiti kangrunaan a punto a panggepmo a buklen sakbay nga iserrekmo dagiti detalye ti maikanatad nga introduksion. Ngem no ngay nayimprenta a balabala ti pangalaam iti ipalawagmo? Kalpasan a nabasam ti balabala, no adda mapanunotmo nga introduksion, awan pagdaksanna no isuratmo dayta. Laglagipem met a tapno epektibo ti introduksionmo, masapul nga ikonsiderarmo dagiti agdengngeg agraman ti material a linaon ti balabala.