Aramidem a Kalat ti Mangikondukta iti Panangyadal iti Biblia
1 “Itannawagyo dagiti matayo ket matmatanyo dagiti talon, ta purawdan a maipaay iti pannakaani.” (Juan 4:35) Dagita a sasao ni Jesu-Kristo ket sigurado nga agaplikar iti kasasaad a pakaipaspasanguan ita dagiti Kristiano a ministro.
2 Makasarsaraktayo pay laeng kadagiti napudno ti panagpuspusoda a tattao a mayat nga agsursuro kadagiti dana ni Jehova. Nabatad daytoy iti bilang dagiti kabbaro nga adalan a mababautisaran iti tunggal tawen. No naimpusuan a tarigagayam ti maaddaan iti iyad-adalan iti Biblia, ania ti mabalinmo nga aramiden?
3 Mangipasdekka iti Kalat: Mangipasdekka nga umuna iti kalat a mangirugi ken mangikondukta iti regular a panangyadal iti Biblia. Laglagipem ti kalatmo bayat a mangaskasabaka. Yantangay ti annongentayo kas Kristiano ket saan laeng a mangasaba no di pay ket mangisuro, rumbeng nga ikagumaantayo amin ti mangbirok iti ad-adu nga oportunidad a mangyadal iti Biblia.—Mat. 24:14; 28:19, 20.
4 Dadduma Pay a Punto a Laglagipen: Nasken nga agkararag a naimpusuan dagiti agibumbunannag iti Pagarian. No dadduma, adda masarakantayo a tattao a nangikararag iti tulong tapno maam-ammoda ti Dios. Anian a bendision ti panangusar ni Jehova kadatayo a mangbirok ken mangisuro kadagiti kasta a tattao!—Hag. 2:7; Ara. 10:1, 2.
5 Adda kabsat a babai a nangikararag a maaddaan koma iti iyadalan iti Biblia. Kalpasanna, nangikabil kadagiti kopia ti tract a Kayatyo Kadi a Maammuan ti Ad-adu Pay Maipapan iti Biblia? iti lugar a pagtartrabahuanna. Adda babai a pimmidut iti maysa kadagita a tract, inungpotna a binasa, sa sinuratanna ti kupon nga adda iti panid 5. Ti kabsat kinasaritana ti babai ket nakairugi iti panangyadal iti Biblia.
6 Dagiti padam nga agibumbunannag nga epektibo iti panangirugi ken panangikondukta kadagiti panangyadal iti Biblia matulongandaka a mangragpat iti kalatmo a mangikondukta iti panangyadal iti Biblia. Ikararagmo a makabirokka koma iti iyadalam, ken gundawayam amin nga oportunidad a makatulong kenka a mangragpat iti dayta a kalat. Mabalin nga iti di agbayag, mapadasamton no kasano karagsak ti mangikondukta iti panangyadal iti Biblia.