Itantantanyo Kadi?
Ti ania? Ti panangsurat iti DPA (durable power of attorney) card nga agpaay kadagiti bautisado a Saksi. Yantangay “saanyo nga ammo no anianto ti biagyo inton bigat,” nakapatpateg nga ikeddengyo a nasaksakbay ken isuratyo no ania a panangagas ken pamay-an ti panangagas ti awatenyo no adda mapagteng nga emerhensia. (Sant. 4:14; Ara. 15:28, 29) Naaramid ti video a Transfusion-Alternative Health Care—Meeting Patient Needs and Rights tapno matulongankayo nga agdesision. Buyaen sa repasuenyo buyogen ti kararag dagiti nasursuroyo babaen ti tulong dagiti saludsod iti baba.—Palagip: Gapu ta naglaon ti video kadagiti ababa nga eksena ti panagopera, nasken a tingitingen dagiti nagannak no ipabuyada daytoy a video kadagiti ubbing.
(1) Apay a tingtingitingen manen dagiti dadduma a mangngagas ti panangyalison iti dara? (2) Mangted iti tallo a pagarigan ti narikut nga operasion a mabalin a maaramid nga awan ti panangyalison iti dara? (3) Iti intero a lubong, kasano kaadu dagiti doktor ken siruhano a sidadaan a mangagas kadagiti pasiente nga awan ti panangyalison iti dara? Apay a situtulokda a mangaramid iti dayta? (4) Ania ti impalgak dagiti nabiit pay a surbey kadagiti ospital maipapan iti panagusar iti dara? (5) Ania dagiti peggad iti salun-at a nainaig iti panangyalison iti dara? (6) Ania ti konklusion ti adu nga eksperto maipapan iti pagimbagan dagiti alternatibo iti panangyalison iti dara? (7) Ania dagiti pakaigapuan ti anemia? Agingga iti ania a madaeran dayta dagiti tattao? Ania ti mabalin nga aramiden maipapan iti dayta? (8) Kasano a mapaadu ti nalabaga a selula iti bagi ti pasiente? (9) Ania dagiti pamay-an a maus-usar tapno awan unay ti agsayasay a dara bayat ti operasion? (10) Epektibo kadi kadagiti ubbing wenno kadagiti tattao nga agpegpeggad unayen ti biagda dagiti alternatibo iti panangyalison iti dara? (11) Ania ti maysa kadagiti kangrunaan a moral a prinsipio ti nasayaat a panangaywan iti salun-at? (12) Apay a napateg kadagiti Kristiano nga ikeddengda a nasaksakbay no ania a panangagas a di agusar iti dara ti awatenda? Kasano a maaramidtayo daytoy?
Ti panangawat iti dadduma a wagas ti panangagas a naipabuya iti video ket desision ti indibidual a maibatay iti diktar ti konsiensiana a sinanay ti Biblia. Naikeddengyo kadin no ania dagiti alternatibo iti panangyalison a situtulok nga awatenyo a para kadakayo ken kadagiti annakyo? Para iti kanayonan a kompleto a pannakailawlawag dagitoy a banag, kitaenyo ti “Salsaludsod Dagiti Agbasbasa” iti Hunio 15, 2004, ken Oktubre 15, 2000 a ruar Ti Pagwanawanan ken ti suplemento a “Kasano ti Panangmatmatko Kadagiti Babbabassit a Kapaset ti Dara ken iti Panangagas a Pakausaran ti Mismo a Darak?” iti Enero 2007 a ruar Ti Ministeriotayo iti Pagarian. Amin a pangngeddengyo ket masapul nga ibagayo kadagiti napiliyo a pannakabagi iti panagpaagas ken iti siasinoman a saan a Saksi a kameng ti pamiliayo.