“Ti Panagsaoyo Kankanayon Koma a . . . Natemplaan iti Asin”
1. Ania ti kayat a sawen ti ‘panagsao a natemplaan iti asin’?
1 “Ti panagsaoyo kankanayon koma a mabuyogan iti kinaparabur, natemplaan iti asin, tapno ammoyo no kasano ti rebbengyo nga isusungbat iti tunggal maysa.” (Col. 4:6) Ti panagsasao a natemplaan iti asin kaipapananna ti panangpili iti umiso a sasao ken panangisawang iti dayta iti wagas a makaay-ayo iti kasarsaritatayo. Nakapatpateg ti panangaramid iti daytoy iti trabahotayo a panangasaba.
2. Kasano a nakasabaan ni Jesus ti babai a Samaritana?
2 Ulidan ni Jesus: Bayat nga agin-inana ni Jesus iti abay ti bubon, kinasaritana ti maysa a Samaritana a napan simmakdo. Kabayatan ti panagsaritada, sumagmamano a gundaway a nangdakamat ti babai kadagiti punto a mangiparangarang iti nabayagen a panagginnura dagiti Judio ken Samaritano. Inyebkasna pay ti pammatina a dagiti Samaritano ket kaputotan ni Jacob, nupay ipapilit dagiti Judio a nagtaud dagiti Samaritano kadagiti ganggannaet. Imbes a kontraenna dagiti imbaga ti babai, pinagtalinaedna a positibo ti saritaan. Kas resultana, isu ket nakaipaay iti pammaneknek a nakagunggona iti babai ken kadagiti lallaki iti siudad.—Juan 4:7-15, 39.
3. Iti ministeriotayo, kasanotay a matulad ti ulidan ni Jesus?
3 Iti panangasabatayo, masapul a kanayon a sipapanunottayo iti panggeptayo—ti ‘panangideklara iti naimbag a damag ti naimbag a bambanag.’ (Roma 10:15) Kayattayo nga iranud iti bumalay ti makaay-ayo ken makapabileg a mensahe manipud iti Biblia, saan ket a tapno kondenarentayo dagiti patpatienna. No adda maibagana a di umiso a kapanunotan, saan a kasapulan a suppiatentayo. Adda kadi punto iti komentona a mabalintay nga anamongan wenno pangibatayan iti napaypayso a komendasion? Nalabit mabalintay ti mangibasa iti maysa a teksto babaen ti panangikunatayo, “Napampanunotmo kadin daytoy?”
4. Ania ti aramidentayo no nagubsang ti panagsasao ti bumalay?
4 No ngay nagubsang ti panagsasao ti bumalay wenno nabatad a kayatna laeng ti makidinniskutir? Masapul nga itultuloytayo nga ipakita ti kinaemma ken kinaalumamay iti sao ken kababalintayo. (2 Tim. 2:24, 25) No saan nga interesado ti bumalay iti mensahe maipapan iti Pagarian, nasaysayaat no agpakadatayon iti nataktika a pamay-an.—Mat. 7:6; 10:11-14.
5. Ania ti nasayaat a resulta ti naalumamay nga isusungbat ti maysa a kabsat?
5 Dagiti Nasayaat a Resulta: Pinadas ti maysa a kabsat a babai a kasabaan ti kaarrubana ngem isu ket napagsasawan. “Dispensarennak ta diak ammo a kasta gayam ti riknam. Sige, agpakadaakon,” siaalumamay nga insungbat ti kabsat. Kalpasan ti dua a lawas, napan ti babai iti balay ti kabsat tapno agpadispensar iti inaramidna sa imbagana a sidadaanen a dumngeg iti ibaga ti kabsat. Masansan a nasayaat ti resulta ti naalumamay a sungbat!—Prov. 15:1; 25:15.
6. Iti ministeriotayo, apay a napateg nga agusartayo iti sasao a natemplaan iti asin?
6 No ikaskasabatayo ti naimbag a damag, agusartayo koma iti sasao a natemplaan iti asin. Uray no saan nga interesado ti bumalay, mabalin a sidadaanton a dumngeg inton adda manen Saksi ni Jehova a sumarungkar kenkuana.