Kasapulan ti Panagibtur iti Trabaho a Panangasaba
1. Apay a ni apostol Pablo ket nagsayaat nga ulidan no iti panagibtur iti ministerio?
1 Nasurok a 30 a tawen a tinagiragsak ni apostol Pablo ti makapnek a karerana kas maysa nga ebanghelisador. Adda dagiti karit a nakaipasanguanna iti trabahona a panangasaba. (2 Cor. 11:23-29) Ngem saan a simmuko ni Pablo. (2 Cor. 4:1) Ammona nga isu ket ikkan ni Jehova iti bileg nga agibtur. (Fil. 4:13) Gapu ta simamatalek a nakapagibtur, naikuna ni Pablo: “Agbalinkayo a tumutulad kaniak, kas met iti panangtuladko ken Kristo.”—1 Cor. 11:1.
2. Ania dagiti pakasuotan nga inaldaw a pakaipaspasanguan ti adu ita, ken kasanoda a matulongan nga agibtur?
2 Panangibtur Kadagiti Pakasuotan Ita: Inaldaw nga adu kadagiti kakabsattayo ti um-umsien, busbusoren, wenno iyaleng-aleng dagiti kapamilia, katrabahuan, wenno kaeskuelaanda. (Mat. 10:35; Juan 15:20) Nalabit kasta met ti mapaspasaram. Iti sabali a bangir, mabalin nga adda parikutmo iti salun-at, wenno inaldaw a makidangdangadangka a mangiwaksi kadagiti pakasingaan ken sulisog. Mapabilegtayo babaen ti panangusigtayo kadagiti ulidan dagiti padatayo a Kristiano ita a nasuot ngem nagballigida.—1 Ped. 5:9.
3. Ania dagiti probision nga impaay ni Jehova a makatulong kadatayo nga agtalinaed a natibker?
3 Maaddaantayo iti bileg nga agtalinaed a natibker no siguraduentayo a ‘naikapettayo a naan-anay ti kabal manipud iti Dios.’ (Efe. 6:10-13, 15) Napateg met ti panagkararag tapno makapagibturtayo. (2 Cor. 6:4-7) Tapno agballigitayo iti naespirituan a dangadang, nasken nga ipangagtayo dagiti pammalagip ti Dios a pabaruentayo ti espiritutayo. (Sal. 119:24, 85-88) No kasano nga ulit-uliten a basaen ti nadungngo nga anak ti surat ti nadungngo nga amana, ti inaldaw a panangbasatayo iti Biblia patibkerenna met ti relasiontayo ken Jehova. Maaddaantayo iti sirib a mangsaranget kadagiti pakasuotan babaen ti regular a personal a panagadal, ta iti kasta a pamay-an ipalpalubostayo a ti sao ti Dios ti mangimpluensia kadagiti desisiontayo ken mangpabileg iti determinasiontayo nga agmatalek ken Jehova.—Prov. 2:10, 11.
4. Ania dagiti bendision a tagiragsakentayo no simamatalek nga agibturtayo iti ministeriotayo?
4 Ti Panagibtur ket Mangyeg Kadagiti Bendision: Kas ken Pablo, maparagsaktayo ti puso ni Jehova ken magunggonaantayo agraman dagiti sabsabali no simamatalek nga agibturtayo bayat nga itungtungpaltayo ti ministeriotayo. (Prov. 27:11) Determinadotayo ngarud koma nga agtultuloy a mangitungpal iti ministeriotayo, a paneknekantayo a natibker ti pammatitayo ken “dakdakkel unay ti pategna ngem ti balitok a madadael agpapan pay pannakasubokna babaen iti apuy.”—1 Ped. 1:6, 7.