Panangapresiar Kadagiti Lugar a Pagdaydayawantayo
1-3. Ania ti mangtigtignay kadagiti agdaydayaw ken Jehova a mangted iti kontribusion para kadagiti lugar a pagdaydayawanda? Mangtedkayo kadagiti pagarigan.
1 Isu ket aktibo nga agserserbi kas Kristiano iti agarup 50 a tawen. Nupay nakapuyen gapu iti kinabaketna, determinado latta a sumarungkar iti kaibangbangon a Kingdom Hall. Isu ket uk-ukoden ti maysa a kabsat a lalaki bayat a magmagna a siiinayad nga agturong iti kahon a pagitinnagan iti kontribusion iti uneg ti Kingdom Hall. Nangipisok sadiay iti bassit a kantidad nga inurnongna agpaay iti dayta a panggep. Nupay saan a nakatulong ti baket iti aktual a pannakaibangon ti Kingdom Hall, kayatna ti tumulong babaen ti pinansial a kontribusion.
2 Ipalagip daytoy kadatayo ti “napanglaw a balo a babai” a nakita ni Jesus a nangipisok iti dua a babassit a sinsilio iti baul ti gameng iti templo. Kinuna ni Jesus a ti bassit ti pategna a donasion ti balo a baket kaipapananna nga intedna “ti isuamin nga adda kenkuana, ti intero a pagbiagna.”—Mar. 12:41-44.
3 Ania ti nangtignay kadagiti dua a babbaket a mangted iti donasion? Isu ti panangapresiarda iti lugar a pagdaydayawan nga impaay ni Jehova. Bassit laeng a kantidad ti intedda, ngem para ken Jehova pakakitaan dayta a napalaus ti panagyamanda iti lugar a pangdaydayawan kenkuana. Impakita met ni David nga isu ket manangapresiar. Kinunana iti Salmo 27:4: “Maysa a banag ti kiniddawko ken Jehova—isu dayta ti sapulekto, nga agnaedak koma iti balay ni Jehova iti amin nga al-aldaw ti panagbiagko, . . . ken tapno imatangak ti templona buyogen ti panangtagipateg.” Impakitana dayta nga apresasion idi nangted iti dakkel a kontribusion para iti pannakaibangon ti templo.
4. Ania dagiti pamay-an a maipakitatayo nga ap-apresiarentayo ti Kingdom Hall-tayo?
4 Panangipakita iti Apresasion Ita: Adu ti pamay-an a maipakitatayo ti panangapresiartayo kadagiti Kingdom Hall-tayo. Maipakitatayo dayta iti estilo ti panagkawkawestayo no tumabunotayo kadagiti gimong, iti nadayaw a kababalintayo kabayatan dagiti gimong, ken iti itutulongtayo a mangtaginayon iti Kingdom Hall-tayo a nadalus ken nasayaat ti pannakamantenerna. Nupay kasta, ti panangted iti pinansial a kontribusion ket kanayon a napateg a paset ti pudno a panagdaydayaw ken ipakitana nga ap-apresiarentayo unay dagiti sagut ni Jehova kadatayo. Ti panangted iti kastoy a wagas ket kanayon a mangipaay iti dakkel a rag-o.—1 Cron. 29:9.
5. Ania dagiti urnos nga inaramid ti Bagi a Manarawidwid tapno maaddaantayo kadagiti maitutop a lugar a pagdaydayawan?
5 Kas panangsurot iti Nainkasuratan a prinsipio mainaig iti boluntario a panangted, idi dekada 1980 dagiti kongregasion iti Pilipinas ket mabalinen nga ag-loan iti awan patubona tapno makaibangonda kadagiti baro a Kingdom Hall. Ginasut a baro a Kingdom Hall ti naibangon gapu iti daytoy nga urnos. Idi 1999, nangipasdek ti Bagi a Manarawidwid iti programa a mausar dagiti pondo manipud kadagiti nababaknang a pagilian a pangpunno iti pondo nga indonar dagiti lokal a kakabsat para iti pannakaibangon dagiti Kingdom Hall kadagiti napanglaw a pagilian. Manipud idi 2001, mabembenepisiaranen ti sanga nga opisina iti Pilipinas iti daytoy a programa ta nakaibangontayo iti 656 a Kingdom Hall nga us-usaren ti 885 a kongregasion. Kayatmi nga usaren daytoy a gundaway a mangipakaammo kadakayo iti kabaruan nga impormasion maipapan kadagitoy dua nga urnos.
6. Ania dagiti addang a nasken nga aramiden no saan nga ipatpatulod ti kongregasion ti kompleto a kantidad nga inkarida a bayadan para iti Kingdom Hall loan-da? No ngay sumagmamano a kongregasion ti mangbaybayad iti loan?
6 Dagidiay Addaan Pay Laeng iti Dakkel a Kingdom Hall Loan: Kabayatan ti dekada 1980 ken 1990, nasurok a 1,000 a loan ti naaprobaran para iti pannakaibangon dagiti Kingdom Hall. Adu kadagitoy ti nabayadanen. Ngem adda pay laeng 538 a loan, a mangirepresentar iti 699 a kongregasion, ti saan pay a naan-anay a nabayadan. Ti tunggal maysa kadagitoy a kongregasion ket nangaramid iti naisurat a resolusion, nga inkarida a binulan a mangtedda iti masinunuo a kantidad. Sigun iti rekordmi, agarup 40% laeng iti dagup ti kantidad a naikari ti maaw-awat ti sanga nga opisina iti tunggal bulan. No ti kongregasionyo ket maysa kadagitoy, awan duadua a kayat dagiti panglakayen nga iturong daytoy iti atension dagiti agibumbunannag tapno maammuanda daytoy a panagkasapulan ket maaddaanda iti ‘pribilehio iti siaasi a panangted.’ (2 Cor. 8:4) No sumagmamano a kongregasion ti mangbaybayad iti loan, nasayaat no agmimiting dagiti amin a panglakayen tapno makitada no ania ti maaramidan ti tunggal kongregasion tapno ad-adu ti maitedda, iti kasta, maipatulod iti sanga nga opisina ti kompleto a kantidad nga inkarida. Mausar dagitoy a pondo iti pannakaibangon ti ad-adu pay a Kingdom Hall kadagiti lugar nga agkasapulan iti dayta.
7, 8. (a) Kasano nga impakita dagiti kongregasion ti apresasionda kabayatan ti pannakaibangon ti Kingdom Hall-da? (b) Ania ti dua a pamay-an a maitultuloyda nga ipakita ti kasta nga apresasion no nalpasen ti pannakaibangon ti Kingdom Hall-da?
7 Dagidiay Mangus-usar iti Kingdom Hall a Kukua ti Sanga nga Opisina: Makomendaran ti rinibu a nagboluntario a mangusar iti tiempo ken abilidadda, a masansan a maibaon kadagiti adayo a lugar tapno mangibangonda kadagiti Kingdom Hall. Kabayatan ti panagibangon, impakita dagiti lokal a kongregasion ti apresasionda babaen ti panangpakanda kadagiti trabahador ken boluntario, a nakatulong tapno maksayan ti gastos ti sanga nga opisina para iti panagibangon. Apaman a malpas ti pannakaibangon ti Kingdom Hall, kasano a maitultuloy dagiti kongregasion nga ipakita ti panangapresiarda iti daytoy a nagsayaat a sagut ni Jehova?
8 Maipakitada dayta iti dua a pamay-an: Umuna, babaen ti regular a panangtedda iti kontribusion para iti pannakamantener ti Kingdom Hall tapno kanayon a nadalus ken pakaidayawan ni Jehova. Adda nailatang a pondo nga usaren ti operating committee para iti pannakamantener ti Kingdom Hall ken adda met ti naaramid nga eskediul para iti panagdalus. Maikadua, boluntario a mangaramidda iti resolusion, a binulan a mangtedda iti masinunuo a kantidad iti sanga nga opisina. Ania ti pakausaran dagitoy a pondo? Mainayon dagitoy iti Kingdom Hall Fund sa mausar iti pannakaibangon ti ad-adu pay a Kingdom Hall. Anian a nagsayaat nga urnos! Dagidiay addaanen iti baro a Kingdom Hall maipakitada met ti apresasionda babaen ti panangtedda iti tulong tapno makaibangon met dagiti dadduma iti paggigimonganda.
9. Ania a balakad ni Jesus ti nasken a tungpalen dagiti kongregasion a saan a makaipatpatulod iti eksakto a kantidad nga inkarida para iti Kingdom Hall-da? Apay a napateg daytoy?
9 Sigun iti rekordmi, adu kadagitoy a kongregasion ti mangipatpatulod iti eksakto a kantidad nga inkarida iti binulan. Ngem no gupgopen, 70% laeng iti kantidad nga inkari dagiti 885 a kongregasion ti maipatpatulod iti sanga nga opisina iti tunggal bulan. No dagiti amin a kongregasion ket ipatulodda ti eksakto a kantidad nga inkarida, dakdakkel met ti pondo a mausar para kadagiti maibangon pay a Kingdom Hall. Yantangay inkari ti tunggal kongregasion a mangtedda iti masinunuo a kantidad, obligadoda a mangtungpal iti imbalakad ni Jesus: “Ti koma latta saoyo a Wen kaipapananna ti Wen.”—Mat. 5:37.
10. Apay a masapul nga ad-adu ti kontribusion bayat a dumakdakkel ti kongregasion?
10 Adu a kongregasion ti nangipadamag a kalpasan a naibangon ti baro a Kingdom Hall-da, immadu dagiti tumabtabuno iti gimong ken dimmakkel ti bilang ti kongregasion. Gapu iti daytoy, awan duadua a kayat dagiti dadduma a nayonan ti kantidad nga ipatpatulodda iti sanga nga opisina iti binulan. No posible, mabalin a mangaramid ti kongregasion iti baro a resolusion tapno maikeddengda a mangitedda iti dakdakkel a kontribusion iti binulan.
11. Apay a ti tunggal agibumbunannag ket nasken a mangted iti kontribusion agpaay iti Kingdom Hall?
11 Ti Akem ti Tunggal Agibumbunannag: Idi indedikartayo ti biagtayo ken Jehova, imbagatayo nga amin nga ik-ikutan ken sanikuatayo ket usarentayo nga agpaay kenkuana. Insurat ni Kabsat C. T. Russell: “Rumbeng nga ibilang ti tunggal maysa ti bagina kas dinutokan ti Apo a mayordomo iti mismo a tiempona, impluensiana, kuartana, kdpy., ken aramiden koma ti tunggal maysa ti amin a kabaelanna a mangusar kadagitoy a talento nga agpaay a pakaidayawan ti Apo.” Nabaknangtayo man wenno napanglaw, ar-aramidentayo met laeng kadi dayta? Ti kadi panangusartayo kadagiti kuartatayo ipakitana a ti panagserbi ken Jehova ti kapatgan kadatayo?
12, 13. Ania ti nasken nga aramiden a regular ti tunggal indibidual ken pamilia? Kasano ti panangmatmat ni Jehova iti naragsak a panangtedtayo?
12 Maiparegta iti amin a pamilia nga aramidenda ti kas iti insurat ni Pablo iti 1 Corinto 16:2: “Tunggal umuna nga aldaw ti lawas tunggal maysa kadakayo mangilasin koma iti bukodna a balay iti idulinna a banag a kas iti irarang-ayna.” Kayatna a sawen a regular nga aramidenyo daytoy kas paset iti biagyo. No regular a mangted iti kontribusion dagiti nagannak, tuladen ida dagiti annakda. Kasta met, saanen a masapul a kanayon a palagipandakayo yantangay tunggal maysa ket ar-aramidenna ti “kas iti inkeddengna iti pusona, saan nga iti nadagsen a rikna wenno mapilpilit.”—2 Cor. 9:7.
13 Wen, no ti tunggal indibidual, pamilia, ken kongregasion ket mangted iti kontribusion “kas iti inkeddengna iti pusona,” nga aramidenda dayta kas panagyaman kadagiti bendision nga inawatda, sigurado a maay-ayo ni Jehova yantangay “ti Dios ayatenna ti naragsak a manangited.”