Tagipatgenyo ti Pribilehioyo iti Panagserbi
1. Ania ti panangmatmat ti adu a tattao iti lubong iti trabahotayo a panangasaba?
1 Ibilang ti adu a tattao iti lubong ni Satanas a “kinamaag” ti trabahotayo a panangasaba. (1 Cor. 1:18-21) No saantayo a naannad, mabalin a maupay wenno bumaaw ti regtatayo gapu iti daytoy a di umiso a panangmatmat. (Prov. 24:10; Isa. 5:20) Ania dagiti panggapuantayo a mangipateg iti pribilehiotayo a panagbalin kas Saksi ni Jehova?—Isa. 43:10.
2. Apay a makuna a “nasantuan a trabaho” ti ministeriotayo?
2 “Nasantuan a Trabaho”: Kinuna ni apostol Pablo a ti ministerio ket “nasantuan a trabaho.” (Roma 15:15, 16) Kasano a kasta? No makiramantayo iti daytoy a trabaho, agbalintayo a ‘katrabahuan’ ni Jehova, “Daydiay Santo,” ken makatulongtayo iti pannakasantipikar ti naganna. (1 Cor. 3:9; 1 Ped. 1:15) Para ken Jehova, ti panangasabatayo ket maysa a “sakripisio ti panagdaydayaw.” Gapuna, ti ministeriotayo ket nagpateg nga aspeto ti panagdaydayawtayo.—Heb. 13:15.
3. Apay a naisangsangayan a pribilehio ti panangikasaba iti naimbag a damag?
3 Ti panangikasaba iti naimbag a damag ket naisangsangayan a pribilehio a manmano laeng ti mangtagtagiragsak. Pagragsakan met dagiti anghel nga aramiden daytoy a trabaho ken sigurado nga epektibo ti panangaramidda iti daytoy. (1 Ped. 1:12) Nupay kasta, pinili ni Jehova dagiti imperpekto a tattao, dagiti “damili a basehas,” para iti daytoy a naisangsangayan a pribilehio!—2 Cor. 4:7.
4. Kasanotayo a maipakita a tagtagipatgentayo ti ministerio?
4 Maipangpangruna a Trabaho: Gapu ta tagtagipatgentayo unay ti pribilehiotayo, ibilangtayo ti ministerio kas maysa kadagiti “napatpateg a bambanag” iti biag. (Fil. 1:10) Gapuna, linawas nga iwayaantayo ti makiraman iti daytoy. Ti maysa a musikero a mangipatpateg iti pribilehiona nga agtokar iti nalatak nga orkestra iti lubong ket agensayo a naimbag sakbay ti panagpabuyana ken ikagumaanna a pasayaaten pay ti panagtokarna. Kasta met laeng no makiramantayo iti ministerio. Masapul nga agsaganatayo tapno ‘maaramattayo a siuumiso ti sao ti kinapudno,’ ken mapasayaattayo ti ‘arte ti panangisurotayo.’—2 Tim. 2:15; 4:2.
5. Siasino dagiti mangap-apresiar iti ministeriotayo?
5 Saanyo nga ipalubos a maupaykayo gapu iti di umiso a panangmatmat ti kaaduan a tattao. Laglagipentayo nga adu pay a tattao iti teritoriatayo ti mayat a dumngeg iti mensahetayo. Nupay kasta, saan a dagiti tattao ti kayattayo nga ay-aywen. Napatpateg nga amang ti panangay-ayo ken Jehova, ken ap-apresiarenna unay dagiti napinget a panagreggettayo.—Isa. 52:7.