Kanayon a Nakasagana a Mangasaba
1. Kasanotayo nga ammo a kanayon a nakasagana a mangasaba dagiti ebanghelisador idi umuna a siglo?
1 Dagiti naregta nga ebanghelisador idi umuna a siglo inwaragawagda ti naimbag a damag ‘nga awan sardayna’ iti sadinoman a pakasarakanda kadagiti tattao. (Ara. 5:42) No mangasabada iti binalaybalay, saanda la ketdi a labsan dagiti tattao nga adda iti lansangan. Sigurado a kasabaanda met ida. Uray no addada kadagiti pagtagilakuan kalpasan ti panangasaba, sigurado a mangasabada iti di pormal. Kas ken Jesus, kanayon a nakasaganada a mangasaba.—Mar. 6:31-34.
2. Ania ti ramanen ti panagbiag maitunos iti nagantayo?
2 Kanayon a Nakasagana: Ti nagantayo a Saksi ni Jehova saanna laeng nga ipakita no ania ti ar-aramidentayo; ipakitana met no siasinotayo. (Isa. 43:10-12) Gapuna, kanayon koma a nakasaganatayo a mangikalintegan iti namnamatayo, uray no saantayo a mangaskasaba iti binalaybalay. (1 Ped. 3:15) Sagsaganaanyo kadi dagiti gundaway a mabalinyo ti mangasaba iti di pormal ken pampanunotenyo no ania ti ibagayo? Mangitugtugotkayo kadi iti literatura nga ipaimayo kadagiti interesado? (Prov. 21:5) Mangaskasabakayo laeng kadi iti binalaybalay, wenno iranranudyo met ti naimbag a damag kadagiti tattao iti dadduma a lugar no ipalubos ti kasasaad?
3. Apay a saantayo a tagtagibassiten ti panangasaba iti lansangan, paradaan, parke, lugar ti negosio, ken dadduma pay?
3 Mangasaba iti “Publiko”: Mangaskasabatayo iti lansangan, paradaan, parke, lugar ti negosio, ken dadduma pay. Ti kadi panangikagumaantayo a mangaramid iti dayta ket ordinario, saan unay a napateg, wenno opsional? Kinuna ni apostol Pablo nga isu ket nangasaba iti “publiko” ken iti binalaybalay. (Ara. 20:20) Ti panangasaba iti binalaybalay ket isu ti kangrunaan ken kaepektibuan a pamay-an ti panangidanon iti mensahe ti Pagarian kadagiti tattao. Nupay kasta, dagiti tattao, saan a dagiti balbalay, ti kangrunaan a birbiroken dagiti ebanghelisador idi umuna a siglo. Ginundawayanda ti tunggal oportunidad a mangipakaammo iti kinapudno—iti publiko, iti di pormal, ken iti binalaybalay. Sapay koma ta kasta met ti aramidentayo tapno naan-anay a maitungpaltayo ti ministeriotayo.—2 Tim. 4:5.