Agusar iti Epektibo nga Introduksion
1. Ania ti masursurotayo iti nagduduma nga introduksion nga inusar dagiti nagkauna a Kristiano?
1 Dagiti nagkauna a Kristiano, inkasabada ti naimbag a damag kadagiti tattao iti nagduduma a kultura ken relihion. (Col. 1:23) Nupay maymaysa ti mensaheda—ti Pagarian ti Dios— nagusarda iti nagduduma nga introduksion a maitutop iti kaskasabaanda. Kas pagarigan, idi nakisarita ni Pedro kadagiti Judio nga addaan iti nauneg a panagraem iti Kasuratan, inadawna ti insurat ni propeta Joel. (Ara. 2:14-17) Iti sabali a bangir, kitaenyo no kasano a nakirinnason ni Pablo kadagiti Griego kas nailanad iti Aramid 17:22-31. Iti panawentayo, adu a tattao kadagiti sumagmamano a teritoria ti mangraraem iti Kasuratan isu a nawayatayo a mangusar iti Biblia no mangasabatayo. Nupay kasta, masapul a naan-annadtayo no ti makasabaantayo ket saan nga interesado iti Biblia wenno iti relihion wenno saan a Kristiano ti relihionna.
2. Kasanotayo nga usaren ti tukon a literatura a tumulong kadagidiay interesado ken saan nga interesado iti Biblia?
2 Usarenyo a Sieepektibo Dagiti Tukon a Literatura: Iti daytoy a tawen serbisio, dagiti literatura nga itukontayo, kas iti magasin, tract, ken broshur ket masukatan iti tunggal dua a bulan. Uray no ti kaaduan a tattao iti teritoriatayo ket saan nga interesado iti Biblia, mabalintayo latta nga isarsarita ti maysa nga artikulo manipud iti magasin, tract, wenno broshur a nalabit paginteresanda. Mabalin a saantayo a makaibasa wenno makaibaga iti teksto iti damo a pannakisaritatayo, ngem no interesado ti bumalay, agsublitayto tapno tulongantayo a mangpatanor iti pammatina iti Namarsua ken iti naipaltiing a Saona. Iti sabali a bangir, no interesado dagiti makasaritatayo iti Biblia, mabalintayo ti agusar iti literatura ken iti presentasion a maibagay iti dayta. Kinapudnona, mabalintayo nga itukon ti libro nga Isursuro ti Biblia wenno dagiti broshur a Listen to God wenno ti Umimdengka iti Dios ket Agbiagka nga Agnanayon iti aniaman a gundaway, uray no sabali ti literatura nga itukontayo iti dayta a bulan. Ti napateg ket agusartayo iti epektibo nga introduksion.
3. Iti ania a pamay-an a mayarig iti daga ti puso dagiti tattao iti teritoriatayo?
3 Isaganayo ti Daga: Ti puso ti maysa a tao ket kas iti daga. (Luc. 8:15) Adda dagiti daga a masapul a sukayen a naimbag tapno agramut ken agtubo dagiti bin-i ti kinapudno iti Biblia. Dagiti ebanghelisador idi umuna a siglo ket sibaballigi a nagmula iti amin a kita ti daga, a nangyeg kadakuada iti pannakapnek ken rag-o. (Ara. 13:48, 52) Masagraptayo met ti kasta a balligi no pasayaatentayo ti pamay-an ti panangasabatayo.