Tuladenyo Dagiti Propeta—Nahum
1. Ania ti masursurotayo iti libro a Nahum?
1 Dagiti rebba ti nagkauna a Nineve paneknekanna a pimmudno ti impadto ni Nahum, a ni Jehova balsenna dagiti kabusorna, ken saan a makabael uray ti karungsotan a kabusorna. (Nah. 1:2, 6) No adalentayo a naimbag ti impadto ni Nahum, adu ti masursurotayo a makatulong iti ministeriotayo.
2. Kasanotayo a mapagbalin a positibo ti mensahetayo?
2 Mangipaay iti Liwliwa ken Namnama: Iti damo, ti libro a Nahum ket kasla maipapan laeng iti deklarasion iti panangukom maibusor iti Nineve, ti natangsit a kabesera ti nagkauna nga Asiria. (Nah. 1:1; 3:7) Nupay kasta, dayta a deklarasion ket naimbag a damag para iti ili ni Jehova. Ni Nahum, a “Manangliwliwa” ti kaipapanan ti naganna, impasiguradona kadagiti padana a Judio a mabiiten a madadael dagiti kabusorda! Impatalged pay ni Nahum a ni Jehova ket “maysa a salindeg iti aldaw ti rigat.” (Nah. 1:7) No mangasabatayo, mangiranranudtayo met iti naimbag a damag ken iparparegtatayo kadagiti tattao nga agkamangda ken Jehova.—Nah. 1:15.
3. Kasanotayo a matulad ni Nahum iti panangusar kadagiti ehemplo ken ilustrasion?
3 Agusar Kadagiti Ehemplo ken Ilustrasion: Impaisurat ni Jehova ken ni Nahum nga idiligna ti pannakadadael ti Nineve iti Thebes (No-amon) a siudad ti Egipto, a nabiit pay idi a dinadael ti Asiria. (Nah. 3:8-10) No isarsaritatayo ti panagpatingga daytoy dakes a sistema ti bambanag, mabalintayo nga itampok dagiti padto ti Biblia a mangipakita a tinungpal ni Jehova ti saona, uray ti kabassitan a detalyena. Kas pagarigan, idi rinaut dagiti taga-Babilonia ken Media ti siudad ti Nineve idi 632 B.C.E., nagtudo iti napigsa ket naglippias ti Karayan Tigris, isu a narba ti maysa a paset ti natibker a pader ti siudad. Gapu iti dayta, alisto a naparmek ti Nineve kas impadto ni Jehova.—Nah. 1:8; 2:6.
4. Ania ti aramidentayo tapno agbalin a nalawag ken nalaka a maawatan ti ikaskasabatayo?
4 Nalawag ken Nalaka a Maawatan: Ti estilo ti panagsurat ni Nahum ket dramatiko ken napnuan iti mangiladawan a sasao. Nalawag dagiti puntona. (Nah. 1:14; 3:1) Umasping iti dayta, kayattayo nga usaren ti sasao a nalaka a maawatan. (1 Cor. 14:9) Iti damo a pannakisaritayo, ilawlawagyo no apay a simmarungkarkayo. No adda iyad-adalanyo iti Biblia, tulonganyo ida a mangpatanor iti pammati ken ni Jehova ken iti Saona ken no kasano nga agaplikar kadakuada dagita nga impormasion.—Roma 10:14.
5. Ania a pammatalged ti masarakantayo iti padto ni Nahum?
5 Ti panagtalek ni Nahum a matungpal amin a sao ni Jehova ket nalawag a makita iti libro iti Biblia a napanaganan iti naganna. Bayat nga umas-asideg ti panungpalan ti sistema ni Satanas, maliwliwatayo iti kinuna ti Dios: “Ti rigat saanto a bumangon iti maikadua a daras.”—Nah. 1:9.